الحلقة الثالثة من مسلسل على بياض للكاتبة مي حُريز
الحلقة الثالثة من مسلسل على بياض للكاتبة مي حُريز
الفصل التالت:
عاصم: انت مقلق ليه بس متخافش محدش هياخد باله
ابراهيم بتوتر: انت متأكد؟ اوعى توديني في داهية
عاصم: انت خايف عشان اول مرة بس لكن بعد كده هتتعود.
ابراهيم: انا خايف نتكشف
عاصم: هنتكشف ازاي بس الموضوع بسيط خالص هتطلب خامات معينه من الشركة هيبعتوا لشركتنا يشتروها احنا بقا هنحط خامات درجة واحدة اقل بس مع الكمية فرق السعر هيبقى كبير انت هتستلم الخامات اللي اتبعتت و تقول عليها امين و تاخد نصيبك من فرق السعر و الفرق بين الدرجتين مش كبير محدش هياخد باله خالص و الشغل هيطلع زي الخامات الغالية بالظبط و العميل هيبقى مرضي و كلنا مرضيين.
ابراهيم: ربنا يستر
——-
منة: مالك بس يا بنتي متعصبة كده ليه اهدي شوية
ليلى: خلاص يا منه مش قادرة استحمل اكتر من كده ضغط ضغط ضغط هو ايه انا مش بني أدمه و ليا طاقة.
منة: ايه الجديد يعني ما طول عمرك كدة
ليلي: لا مش طول عمرى كده انا اتخنقت بفكر جديا أسيب الشغل
منة: طب لقيتي شغل بره
ليلي: لا مدورتش اساسا. انا عاوزة فترة نقاهه بعد الشغل اساسا اقعد كام شهر كده اريح أعصابي و بعدين ابقى ادور
منة: طب ما تدورى قبل ما تسيبي احسن هتزهقي لو قعدتي في البيت
ليلى: يا بنتي خلاص جبت اخرى و الله كله بيرمي شغله عليا اللي عاوز ياخد اجازه ليلى تشيله و اللي عنده شغل زيادة ليلي تاخده و اللي عنده شغل محتاج تاخير في الشغل ليلى تتأخر و تعمله و اللي وراه شغل مهم في ويك اند ليلى تعمله و كل ده ليه عشان كلهم متجوزين و وراهم مسئوليات لكن ليلى فاضيه مش وراها حاجة ما تضيع وقتها في الشغل بدل ما تقعد فاضية كأني لو قعدت فاضية شوية هعيا
منة: طب ما تقولي لا
ليلى: قلت لا قالوا اتغيرتي و مبقيتيش زي الاول و لا ليلى بتاعة زمان و كأن اللي كنت بعمله اكسترا بقا حق مكتسب بالنسبالهم و كلهم خدوا جنب و قلبوا عليا
منة: طب فكرى تاني بردو متتسرعيش عشان ممكن تزهقي و كمان الشغل بقا صعب مش اول ما تدورى هتلاقي
ليلى: مش مهم المهم أني افصل و ارتاح شوية قبل ما يجرالي حاجة
———
ريهام: ايه يا شريف مش ياسر اتجوز خلاص!!
شريف: مش فاهم
ريهام: فين العربية اللي وعدتني بيها؟
شريف: هو انا وعدتك؟؟ انا قلتلك نبقى نشوف بعدين
ريهام: لا وعدتني
شريف: طب ممكن تصبري شوية بس عليا محتاج السيولة الفترة الجايه للشغل يعني أنتي عارفه دلوقتي مفيش دخل كتير بييجي و محتاج دايما احافظ علي السيولة عشان امشي الشغل و ادفع الرواتب
ريهام: انا مالي و مال مشاكل الشغل
شريف: أمال مين اللي ماله
ريهام بدلع: شيريف انا عاوزة العربيه بليز عشان خاطري
و فضلت تدلع و تزن و تدلع و تزن لحد لما وافق و هو مجبر كعادته معاها.
————-
شيرين: ياااه معقولة الهاني مون خلص بسرعة كده
ياسر: جري هوا محسيتش بيه
شيرين: فعلا يا حبيبي الأيام السعيدة بتعدي بسرعة
ياسر: ان شاء الله يا حبيبتي كل ايامك معايا هتكون شهر عسل مينتهيش
شيرين: بحبك
ياسر: و انا بعشقك
————
سوسن: حمد الله عالسلامة يا ولاد وحشتوني اوى بقا كده كل ده شهر عسل؟
شيرين: الله يسلمك يا ماما و أنتي كمان وحشتيني اوى معلش ياسر صمم نقعد اكتر شوية مكنتش اعرف انك هتوحشيني كده
سوسن: بقا كده يا ياسر مش تقول طيب كنت شبعت منكم شوية قبل ما تسافروا
ياسر: معلش يا طنط كنت عاملها مفاجأة و ادينا رجعنا اهو و هتزهقي مننا
سوسن: انا عمرى ما ازهق منكم أبداً بس انتو تعالوا كل يوم ولا يهمكم
عايدة: يالا بقا اتجدعنوا و املولنا البيت عيال صغيرين و متحملوش هم تربيتهم احنا هنعمل كل حاجة
مصطفى: اه انا عاوز ولي العهد بسرعة شدوا حيلكم
ياسر: دعواتك يا حاج
مصطفى: ربنا يرزقكم بالذرية الصالحة و يسعدكم يا رب
عايدة و سوسن: اللهم امين
———
شريف: ايه اللي أنتي عملتيه ده يا مجنونه ؟
ليلى: انا مجنونة؟؟ ليه بقا ان شاء الله !!!
شريف: هو في حد عاقل يعمل العملة بتاعتك دي!!!
ليلى: زهقت يا شريف اتخنقت مبقيتش قادرة استحمل اكتر من كده
شريف: زهقتي ايه ده أنتي تزهقي بلد!! مكنتيش قادرة تغلسي عليهم شوية زي ما بتغلسي عليا بدل ما تتهورى و تستقيلي فجأه كده؟؟
ليلى: افضل اتريأ ما انت مجربتش اللي انا كنت فيه.
شريف: طب كنتي شوفي شغل تاني الاول محدش بيلاقي شغل بسهولة دلوقتي
ليلى: لا انا من كتر الضغط اللي كنت فيه محتاجة فترة كده اقعد في البيت ارتاح و مفكرش في اي حاجة محتاجة افصل شوية و اريح اعصابي
شريف: يا لهوى لا بلاش ارجوكى ده انتى كنتى مأسفنانا كلنا و أنتي بتشتغلي و مش فاضية امال هتعملي فينا ايه لما تبطلي شغل و تفضي!! بصي انا ممكن اكلملك اي حد من أصحابي و تنزلي شغل من بكرة
ليلى و هى بتضحك برخامه: لا متشكرة جدا مش عاوزة منك ولا من أصحابك حاجة مش عاوزين جمايل من حد
دخلت عليهم البلكونة سوسن و قاطعتهم: مش تيجي تساعدي ريهام في ترتيب السفرة يا ليلى و كفاية رغي أنتي و شريف بقا الدنيا مطارتش
شريف: اه روحي اعملي بلقمتك بقا مادام قعدتي في البيت
بصتله ليلى بابتسامه صفرا و راحت مع مامتها عشان تساعد ريهام.
———
ليلى: ايه مالك منزلتيش عينك من على ياسر من ساعة ما دخل البلكونة؟ وحشك اوى كده؟
شيرين: يا ترى ايه كل الرغي ده بقالهم ساعة و اكتر هو و شريف نازلين رغي
ليلى بهزار : أكيد بيقولوا كلام قليل الأدب
شيرين: مش عارفة ليه أنتي واخدة الفكرة دي عن شريف. شريف مبيرغيش كده ولا بيتكلم بالحماس ده غير لما يكون شغل و شكل الموضوع كبير.
———
شريف: شركة فرنساوية عندهم سلسلة فنادق مشهورة في دول كتير في العالم و بيفكروا يدخلوا جديد في السوق المصري و عاوزين حد يعملهم شغلهم
ياسر: بس ده شغل كبير اوى اكبر من إننا نقدر عليه لواحدنا
شريف: الموضوع لسه بعيد مش هيتم بين يوم وليلة ممكن يطول يمكن سنة على ما نبتدي الشغل لسه في مناقصات و عروض و اجتماعات و لجان و ممكن يتراجعوا عن الفكرة كلها لو لقوا الموضوع مش مجدي بس احنا نعمل اللي علينا
ياسر: شكلك متحمسلهم اوى ربنا يجعل لينا في الشغل ده نصيب
شريف: يا رب. اصل التعامل مع الأجانب بيبقى مريح جدا غير ان دي شركة كبيرة لو بدأت هنا بينا هنكبر معاها و تنقلنا نقلة تانية خالص
ياسر: خلاص خليك معاهم خطوة بخطوة و ربنا يكرم
شريف: ان شاء الله.
————
سوسن: شايفة يا ليلى أختك راجعة من شهر العسل بسم الله ما شاء الله وشها منور ازاي
ليلى: اه ربنا يسعدها يا رب هي و ياسر
سوسن: شايفة العز بيعمل ايه
بصتلها ليلى باستغراب مش فاهمه قصدها
سوسن: شوفتي أختك شاطرة سمعت كلام مامتها و وصلت للي هي عاوزاه ازاي مش خايبة زيك
ابتدت ليلى تفهم مامتها: لا بقا يا ماما شيرين و ياسر بيحبوا بعض طول عمرهم متحسسينيش ان شيرين اتجوزته عشان الفلوس
سوسن: طب ما تحبي شريف ياختي هو حد ماسكك بقا حد يضيع فرصة زي دي من ايده يا فقرية
ليلى: ماما الحب مش بزرار هندوس عليه نحب بعض من فضلك كفاية بقا و بعدين احنا مش فقرا احنا الحمد لله كويسين و مرتاحين جدا
سوسن: اه بس راحة عن راحة تفرق. ده شريف ده هيعيشك في عز عمرك ما تحلمي بيه و بعدين منين مبتحبوش بعض و منين كل لما ييجي عندنا تدخلوا البلكونة تتودودوا فيها لوحدكم انتو الاتنين بتقولوا ايه ان شاء الله
ليلى: بنرغي عادي. احنا اصحاب من زمان على فكرة
سوسن و هي عاوجة بقها: اصحاب…. طيب يا موكوسة خليكي عبيطة كدة لحد لما تيجي واحدة تانية تلهفه منك
ليلى: و الله يا ريت عشان نخلص من الموضوع ده بقى
———-
علي: انا خلاص مبقيتش قادر استحمل طول الوقت غيرة و شك و كل شوية نكد و مشاكل خلاص هنفجر من كتر الضغط
شريف: اهدى بس. جايز متعصبة عشان حامل خدها على أد عقلها و ريحها و خلاص
علي: مش موضوع حامل احنا في الهم ده من يوم ما اتجوزنا
شريف: يا خبر من يوم ما اتجوزت؟
علي: اه تخيل؟؟ عمرها ما وثقت فيا موبايلي بيتفتش اكونتاتي متراقبة لو اتاخرت بره خمس دقايق ابقى بخونها لو كنت معاها و قابلت اي واحدة اعرفها زميلتي ولا قريبتي و سلمت عليها يبقى دي كانت صاحبتي زمان و كنت ماشي معاها و لو واحده عدت من جنبنا يبقى انا بصيتلها عشان انا عيني زايغة و المصيبة أني مبكونش عارف هي بتتكلم عن ايه ولا عن مين فجأة بلاقي وشها قلب بعرف ان النكد جاي بس ايه السبب الله اعلم.
شريف: طب ايه اللي يخليها تشك فيك اوي كده ما هو أكيد انت عملت اي حاجة تخليها تشك فيك!!
علي: أبداً و الله انا من ساعة ما عرفتها و انا ماشي عالصراط المستقيم بس هي مش قادرة تنسى حوارات زمان
شريف: يخربيتك!! و ايه اللي عرفها اللي كان بيحصل زمان؟؟
علي: انت ناسي انها كانت صاحبة اختي و على طول كانت عندنا و تعرف عني كل حاجة تقريبا!!
شريف: اه صحيح.. طب يعني انت ملقيتش غير اللي تعرف عنك كل حاجة و تتجوزها؟؟ اشرب بقا.
علي: هو يعني كان بمزاجي؟
شريف: امال بمزاج مين؟
علي: حبيتها يا شريف اعمل ايه مين فينا ليه حكم على قلبه ما انت مجرب و عارف.
قالها و بعدين اخد باله من وش شريف اللي قلب و كأنه افتكر حاجة نكدت عليه فرجع قاله: اسف يا شريف انا عارف انك مبتحبش تتكلم في الموضوع ده؟؟ بس لعلمك كده احسن بكتير كنتوا هتكرروا نفس المأساة دي. صدقني كويس أنكم مكملتوش مع بعض
شريف و هو بيحاول يتصنع نص ابتسامة: انت لسه فاكر!! ده انا نفسي نسيت. المهم خلينا فيك انت و ياسمين دلوقتي. هتعمل ايه؟؟
علي: مش عارف بس انا مش راجع البيت تاني دلوقتي عشان مرتكبش جناية
شريف: أمال هتروح فين
علي: مش عارف و مش عاوز اروح عند اهلي هيفضلوا يسألوني في ايه و يتدخلوا و المواضيع تكبر
شريف: طب خد مفتاح شقتي بات فيها
علي: ياااه هي الشقة دي لسه موجوده؟
شريف و هو بيضحك: طياري كده.
علي: ماشي تبقى كده انقذتني
سكت شوية شريف و بعدين قاله: ولا اقولك!! قوم روح يا علي. مراتك باللى انت بتحكيه ده لو بت برة المشاكل هتكبر اوى
علي: ليه كده ما تسيبني ابعد شوية يمكن تهدا و انا اهدا ولا انت عاوز الشقة النهاردة؟
شريف: أبداً و الله انا حتى مروحتش هناك من فترة بس بجد يعني انت بتبقى قدام عينيها و بتشك فيك مستني منها ايه لو بت برة و مش عند اهلك كمان!! قوم روح يا ابني
علي: بص يا شريف انا لو روحت ممكن اطلقها لانها كل لما تشوف وشي تقولي طلقني طلقني و خايف في مرة افقد اعصابي و اطلقها من كتر الزن ده
شريف: لا طلاق ايه اعقل يابني انتو هيبقى عندكم أولاد. هو الجواز كان غلطة مش هنكر بس خلاص مش لعب عيال هو!! طب خلاص خد مفتاح الشقة اهو بس متطولش عشان المشاكل متكبرش
اخد علي المفتاح و قاله: طيب شكرا
شريف: معلش هتلاقي الدنيا متربة عشان مقفوله بقالها كتير ابقى تعامل بقا
علي: اتغيرت يا شريف بقالك كتير مروحتش!!
شريف: الشغل واخد كل وقتي
علي: طيب يعني انا مفاتنيش كتير بالجواز
ضحك شريف و قاله: مفاتكش اي حاجة خالص. انا خلاص وهبت حياتي للشغل
———-
نادر: أنا مش مصدق نفسي انا حاسس ان القمر نزل من سماه و قعد معايا
ريهام: لا صدق يا حبيبي
رد عليها بصوت عالي و هو بيتنطط من الفرحة: الله…. قوليها تاني كدة… انا حاسس أني بحلم حد يقرصني
ريهام: وطي صوت يا مجنون الناس بتتفرج علينا
نادر: خليهم يتفرجوا انا حاسس أني عاوز أقول للعالم كله أني بحبك… بحببببببببببببك
—————
الدكتور: ألف مبروك يا أستاذ ياسر
ياسر بسعادة: الله يبارك فيك يا دكتور
الدكتور: بس المدام محتاجة راحة تامة لان الحمل مش ثابت
شيرين: يعني ايه يا دكتور
الدكتور: يعني تنامي في السرير لحد لما نعدي الكام شهر الاولانيين على خير و بعدين نبقى نشوف
ياسر: طبعا يا دكتور مادام حضرتك شايف كده
شيرين: يعني مش هقدر انزل الشغل؟
الدكتور: شغل ايه يا مدام انا بقولك راحة تامة في السرير وإلا انا مش مسؤول عن اللي يحصل
ياسر: حاضر حاضر يا دكتور اللي حضرتك تقول عليه
————-
شيرين: مبروك يا حبيبي
ياسر: مبروك يا حبيبتي يا ام عتريس
شيرين: عتريس عتريس المهم انه يبقى ابننا احنا الاتنين
ياسر و هو بيمسك أيدها و يبوسها: المهم انتي خلي بالك من نفسك اليومين دول و عاوزك تسمعي كلام الدكتور و متقوميش من السرير
شيرين: طب و الشغل هعمل فيه ايه؟
ياسر: يا ستي يتحرق الشغل المهم عندي انتي و ولي العهد تقومولي بالسلامة
شيرين: طب و شريف!!!!
ياسر: يتصرف يشوف مديرة مكتب تانيه عادي الحاجات دي بتحصل. اقولك!!! انا ممكن اخلي سلمى تمسك مكانك و ابقى اجيب محاسب تاني
شيرين: لا ده شريف اشتكى منها جامد لما مسكت و انا مسافره
ياسر: خلاص يشوف اي حد تاني مش مشكلة
سرحت شوية كأنها بتفكر في حاجة و قالتله: طب انا عندي فكرة …
