الحلقه الثانية من مسلسل حب فوق النيران بقلم شيماء نعمان

الحلقه الثانية من مسلسل حب فوق النيران بقلم شيماء نعمان

الحلقة الثانية

نعود للخلف قليلا حيث ظلت ارؤى تنتظر سيف ومازال هاتفه مغلقا حتى ملت هى ويحيى من الانتظار فغادروا الى المنزل
وصل سيف الى عنوان المكتب ولكنه كان متاخرا للغاية عندما اقترب من باب العمارة لم ينتبه الى الفتاة الخارجة من الباب اصطدم فيها ليقع ما بيدها ارضا
سيف:انا اسف والله معلش مخدتش بالى
اسرعت تلملم اشياءها المبعثرة :لا ولا يهمك
رفعت راسها لتتلاقى العيون للحظات ترك سيف هاتفه مفتوحا وهو ينظر اليها بدهشة كانه قفز من الواقع الى عالم الاحلام فها هى فتاته التى يحلم بها امامه هل هو نائم ام انه الواقع
هى ايضا لم يكن حالها اقل منه ولكنها كانت الاسرع امسكت بحقيبتها وفرت من امامه سريعا ظل مكانه لايتحرك للحظات افاق على صوت هاتفه:ايوه ياارؤى انتى فين
ارؤى:فين ايه ياسيف ……انا استنيتك كتير مجتش ليه
سيف:انا اودام العمارة اهوو انتى فى الدور الكام
ارؤى:انا روحت يا سيف من بدرى زعلانة منك والله
سيف بشرود:معلش ياحبيبتى اسف والله انتى فى البيت
ارؤى:ايوه يحيى وصلنى وروح انت فين صوتك ماله
سيف:ها لا ابدا مفيش انا راجع على البيت دلوقتى مش هتاخر
ركب سيارته وهو يتذكر هذه اللحظات التى لم تتعدى الثوانى اكانت حلم ام واقع هل بالفعل هى موجودة ام انها خيال لم يكن لها وجود ولكنها بالفعل موجودة رايتها انها نفس العيون نفس الملامح اى انها لم تكن خيال ولكن من هى ؟واين هى ؟
استقلت فرح سيارة اجرة تلهث بقوة كان احدا يجرى خلفها خرجت من شرودها على صوت السائق:هنا ياانسة
فرح:ها اه متشكرة اوى
اعطت له الاجرة وخرجت مسرعة الى منزلها وجدت والدتها ليلى تعد لهم طعام الغذاء:حبيبتى يا لولتى
ليلى:ايه اللى اخرك كده يا فرح
فرح:حبيبتى ماانتى عارفة الشغل يلا جهزى لغداء عشان هنزل كمان ساعة
ليلى:انا مش عارفة ايه الشغلانة اللى ما يعلم بيها الا ربنا دى
قبلتها سريعا:حبيبتى والله انا ببقى مبسوطة وانا بشتغل
ليلى:يارب يا حبيبتى اشوفك احلى عروسة فى الكوشة وتبطلى وجع القلب ده
فرح:ههههه ماشى يا لولتى بس اما ابن الحلال بس وانا هجيبه من قفاه
ليلى:يابت احترمى نفسك خشى يلا غيرى هدومك زمان بابا راجع من الشغل
قاطعهم صوت جرس الباب
اسرعت تفتح الباب لتجد عمها محمد:اهلا اهلا يا عمو حمدلله على السلامة
محمد:حبيبة عمك وحشتينى جوى يا فرح
فرح:وحضرت كمان وحشتنى اوى اتفضل
ليلى:مين يا فرح
فرح:ده عمو محمد يا ماما
اسرعت بارتداء حجابها وخرجت اليهم لاستقباله
ليلى:حمدلله على السلامة يا حاج
محمد:الله يسلمك ياام احمد كيفك وكيف الاولاد
ليلى:بخير يا حاج والله ……ازيك انت وازى اللى فى البلد
محمد:كلتهم بخير وينه كمال اخوى
ليلى:على وصول يا حج اتفضل
ماهى الا دقائق ودخل كمال ليجد اخاه الاكبر جالسا مع اسرته
حاج محمد الف حمد لله على السلامة
محمد:الله يسلمك يا خوى كيفك يا كمال
كمال :بخير يا حاج وحشتنى والله ووحشتنى البلد
محمد:عايزك فى حكاية كده يااخوى
كمال :انا تحت امرك بس نتغدى اول ونشرب الشاى ونقول كل حاجة
جلسوا سويا يحتسون الشاى بعد تناول الغداء
كمال مستفهما:خير يا حاج محمد ايه الموضوع اللى انت عايزنى فيه
محمد:كمال اسمعنى للاخروافهم انا هجولك ايه
ظل محمد يشرح لكمال ما حدث فى البلدة ومااتفق عليه الرجال فى جلسة عرب ان يتم زواج فرح من ابن عائلة سليم
ماان اكمل حتى انتفض كمال غاضبا:ازاى يعنى انا بنتى تتجوز كده وليه يا حاج محمد ذنبها ايه عائلتين وبينهم تار بنتى تتدخل فى الحكاية دى ليه شوف حد تانى بنتى لا
محمد:كمال مفيش وجت مفيش غير اسبوعين ويتم الجواز يا اجده يااما بحر دم ينفتح ميتجفلش واصل واولهم ولدك احمد
انتفض كمال بخوف:احمد …..واحمد ماله احنا بعيد عن البلد من سنين ولادى اتولدواوعاشوا هنا ملهمش دعوة لابتار ولا غيره
محمد:يمكن كلامك مظبوط بس لازم تعرف انهم من عيلة عوف يعنى منينا واللى يسرى علينا يسرى عليك وعلى ولادك
كمال:بس ده ظلم يا بنتى تتجوز واحد لاعمرها شافته وعرفته يااما ابنى يروح فيها ليه كده ليه
محمد:هو ده اللى اتفج عليه كبار البلد ودلوقتى الحاج علوان سليم عند اخوه بيعرفه على هيحصل جلت ايه
كمال:اقول ايه …..انت سبتلى فرصة اتكلم ولا اقول حاجة بتحطنى اودام الامر الواقع يا بنتى تتجوز ياابنى يموت

لا يعنى لا
كلمة صرخ بها سيف امام عمه علوان الذى ظل ينظر اليه غير عابئا بحديثه
يعنى ايه بترفض طلبى يا سيف
سيف:حضرتك عارف معزتك عندى اد ايه لكن انا متجوزش بالطريقة دى واحدة لاعمرى شفتها ولا حتى فترة خطوبة اعرفها واعرف طباعها وجواز يعنى جواز يعنى مفيش تراجع لو مرتحتش معاها اسيبها لا ده انت بتامرنى اتجوزها وفى خلال اسبوعين يرضى مين ده يا عمى
علوان:ماهو انت ياتوافج يا تستحمل اللى هيجرى ليك او لاخواتك
سيف بغضب:اخواتى مالهم بالموضوع
علوان:التار يا ولدى كيف النار بيسرى على الكل ولو عيلة عوف مخدتش تارهم منيك هيخدوه من اخواتك
سيف:انت بتضغط عليا ليه جواز ايه وتار ايه انا واخواتى ذنبنا ايه اروح اتجوز واحدة لا اعرفها ولا تعرفنى وطباعكم غير طباعى يبقى ازاى
علوان:من الناحية دى متجلجش البت عايشة عمرها هنا وسمعت انها مهندسة كمان يعنى متعملة وهتعرف تتعامل معاها
سيف:مش التعليم بس اللى بتكلم عليه انت مش سايبلى فرصة الرد اه اولا بتجبرنى اتجوزها ومفيش اودامى فرصة حتى للرفض
دخل عليهم حسين بوجه حزين:سيف مفيش وقت يا الجوازة تتم يااما اخسرك انت واخواتك يا بنى
دخلت عليهم زهيرة غاضبة بشدة:ليك عين يا علوان تحط يدك فى يدهم بعد اللى بينا وبينهم
علوان :زهيرة بلاش تتدخلى انتى ملكيش صالح
زهيرة:كيف مليش صالح عايز ولد اخوك يتجوز منيهم ونبجى نسايب مش كفاية ولدى اللى راح ومحدش خد بتاره منهم
علوان:ولدك الله يرحمه مش خايفة على ولاد اخوكى من التار يا زهيرة
اتجهت الى سيف بقوة:سيف اوعاك توافج يا ولدى اسمع كلامى اوعاك توافج
نظر اليهم بغضب وتركهم وغادر الى غرفته اغلقها عليه وهو يفكر كيف التخلص من هذه الزيجة الغريبة
…………….
ارتمت فرح فوق سريرها تبكى بشدة وامها تحتنضنها بقوة:حبيبتى اهدى ان شاء الله خير
فرح:خير منين يا ماما ده بيقولك الجواز بعد اسبوعين ليه يا ماما مش حرام عليكم عايزنى تموتونى بالحيا مع واحد لا اعرفه ولا يعرفنى ليه يا ماما ليه
كمال:ماهو ياالجواز يتم يا التار يا بنتى من اخوكى ……انتى فى ايدك القرار يا فرح يا ترفضى يا ……..توافقى
فرح:لا بقى ده ضغط عليا يااتجوز يا اخويا بعد الشر يجراله حاجة
جلس كمال على الكرسى بضعف :غصب عنى يا بنتى غصب عنى والله يارتينى خدتكم وهربت بره مصر خالص ساعتها يمكن مكنش ده كله حصل وانا اللى قلت خلاص موال وخلصنا منه اتاريه ورانا ورانا

دخلت امل غرفة سيف وجدته يقف امام نافذته يدخن سيجارته بشرود
امل :سيف هتعمل ايه ياحبيبى
سيف:عايزانى اعمل ايه ياامى اتجوز واحدة لا شوفتها ولا اعرفها يااما انا او اخواتى نتقتل ده كلام ياناس
امل:ياحبيبى ربنا حللك اكتر من واحدة يعنى لو اتجوزتها ومستريحتش معاها تقدر تتجوز اللى تحبها وتناسبك ومين عالم يمكن تكون حلوة ومحترمة ومودبة ويبقى ربنا كتبلك الخير معاها
سيف:وافرضى طلعت مش كويسة اعمل ايه انا ساعتها
امل:تقدر تادبها هتبقى مراتك ساعتها تقدر تعمل اى حاجة وتمشى على طوعك
سيف بنفاذ صبر:انا لسه هربى واعلمها على طباعى ………انتوا مش سايبين اودامى فرصة حتى للرفض
امل بدموع:والله ياحبيبى غصب عنى كفاية ابوك وزعله
سيف:وانا ميرضنيش زعلكم ولا يرضينى ان حد يجراله حاجة
امل:يعنى ايه
زفر بقوة:هشوفها اول هروح اقابلها واشوف هعمل ايه
امل:طيب يا حبيبى ربنا يسعدك وهدعيلك والله انها تبقى كويسة وحلوة
سيف:مش فارقة كتير ياامى خلاص قدر ومكتوب
امل:طيب ياحبيبى ادخل لابوك وعمك راضيهم بكلمتين وخد بالك عمتك زهيرة مش هتعدى الموضوع ده بالساهل عشان ابنها اللى يرحمه
سيف:ويعنى هى بايدها ايه اهى بتتكلم وخلاص من حزنها على صالح الله يرحمه
خرج سيف من غرفته متوجها الى والده وعمه وقف امامهم وهم ينظرون اليه بعيون مترقبة
انا موافق ياعمى بس اقابلها الاول واقعد معاها
ارتسمت ابتسامة ارتياح على وجه علوان وشرود على وجه حسين
علوان:انت كده ابن اخوى صوح ……..امسك ياولدى ده عنوان المكتب بتاعها روح جابلها وان شاء الله هتلاقيها زينة البنات
امسك سيف بالعنوان بغير اهتمام”بكره ان شاء الله هروح اشوفها
…………
ظلت فرح ليلها تصلى وتدعى ربها ان يزيح عنها ما وقع عليها من هموم واحزان فكيف لها ان تتزوج بهذه السرعة ومن انسان لاتعرفه وليس لها حتى حق الرفض او القبول وهى من رسمت لنفسها طموحات واحلام مع الانسان الذى سيرافقها بقية حياتها وهاهى احلامها تتحطم عند صخرة التار والدم ظلت تبكى وهى تستغفر ربها عسى ان ينجيها من هلاك هى ذاهبة اليه مكتوفة الايدى مغمضة العينين مصير يعلمه الله وحده
………..
نشرت الشمس اشعتها على ابطالنا وكل منهم يشعر انه ذاهب الى هلاك ويكاد يجزم انه بداخل بركان لايجروء على الهروب منه ابدا
ذهب كل منهم الى عمله وبداخلهم عدم الرغبة فى اى شئ يذكر جلس سيف على مكتبه يدق بقلمه امامه شاردا حزينا دخل عليه يوسف وباسم ولم يفهما ما به
يوسف:مالك ياسيف فى ايه
رفع راسه اليهم وقال بسخرية:انا زى الفل كلها اسبوعين وهبقى عريس
نظر الى بعضهم بدهشة فقال باسم :يعنى ايه مش فاهم
عاد سيف بكرسيه للوراء :يعنى كمان اقل من اسبوعين وهبقى عريس عقبالكم
يوسف:ازاى وامتى ومين هى
مط سيف شفتيه بلامبالة:ولا اعرفها ولا عمرى شفتها بس عمى فرض عليا انى اتجوزها ياكده يا اتقتل انا او اى حد من اخواتى
باسم:ازاى يعنى انا مش فاهم حاجة خالص وايه دخل الجواز فى القتل وقتل ليه اصلا
سيف:التار يا باسم …..التار اللى اتفرض علينا بين عيلتين يااما اتجوزها ياام اتقتل او اقتل انا اخوها ما هو ده النظام
يوسف:واشمعنى انت اى حد من بلدكم
سيف:حظى الاسود انى انا اللى عليا الدور شفت بقى
باسم:طيب وهتعمل ايه
سيف:مفيش كلام خلاص الجواز الخميس الجاى لا اللى بعده
يوسف:طيب شفتها تعرفها حتى
سيف:ولااعرف اى حاجة غير اسمها فرح وبتشتغل مهندسة ديكور
يوسف:يعنى متعلمة يمكن تتطلع كويسة وترتاح معاها
باسم:ازاى يعنى يا يوسف وافرض طلعت طباعها مختلفة عنه يبقى ايه الحل
سيف:ولا اى حاجة الجوازة لازم تتم مفيش مفر
قام سريعا:انا نازل
يوسف:رايح فين
سيف:رايح اقابلها اروح مكتبها يمكن تيجى منها وتقولى مش عاوزاك واخلص بقى
باسم:يارب ياسيف ياابن ام سيف تقولك مش عايزاك بكرهك عشان تبقى هى اللى كارهة وتخلص من الجوازة دى
سيف بحزن:وتفتكر ان ده ممكن يغيرحاجة معتقدش……….سلام انا ماشى

جلست على مكتبها تمسك بكوب القهوة تنظر امامها ومريم تتطلع اليها بحزن:حبيبتى طيب هتعملى ايه


فرح:مش عارفة يامريم مخنوقة اوى حاسة انى فى كابوس ومتكتفة ومش قادرة اخرج منه
مريم:والله انتى فى موقف صعب يعنى مفيش غيرك
فرح:بنات عمى كلهم اتجوزوا ونيرة اختى متجوزة مفضلش غيرى انا اودامهم
مريم:طيب بيشتغل ايه
فرح:بيقولوا مهندس وعنده شركة مع اصحابه واخوه
مريم:طيب ما يمكن يطلع ابن حلال وتحبيه
فرح:احب ايه يا مريم اللى يجى بالغصب والاكراه يجى من وراه حب ازاى ………بس انا حلفانة لو الجوازة دى تمت لاطلع عينه واخليه يقول حقى برقبتى
مريم:دى انا واثقة فيها….هو اسمه ايه
تنهدت بقوة:اسمه سيف………سيف حسين سليم
مريم:مين سيف سليم
فرح:ايه ده وانتى تعرفيه منين
مريم:فى حد فى شغلنا ميعرفش سيف سليم ده اشهر من نار على علم
فرح:ليه يعنى
مريم:اللى اعرفه عنه ان مهندس شاطر اوى فى شغله وفاتح الشركة دى من كام سنة بعد ما رجع من الخارج ده غير
انه راجل محترم واخلاق ولا البنات اللى بتجرى وراه وهو مش معبرهم هيموتوا عليه
فرح:ياخدوه ويخلصونى منه
مريم:يا بنتى مش يمكن يطلع هو ويبقى حظك من السما
فرح:اه بس جوازة غصب يا مريم غصب
……………….
دلف سيف الى داخل المكتب ينظر حوله وجد نهى تجلس على مكتبها تابع عملها
سيف:السلام عليكم
نهى :وعليكم السلام ورحمة الله
وقفت تنظر اليه باعجاب:اهلا اهلا وسهلا اتفضل
سيف:لا متشكر اوى لو سمحتى باشمهندسة فرح موجودة
نهى بارتباك :مين ………اه فرح اه موجودة اقولها مين
سيف:قوليها سيف ……..سيف حسين سليم
نهى:حاضر ثانية واحدة
تركته ودخلت غرفة فرح وهو ينظر اليه بسخرية من رد فعلها
نهى:فرح الحقى
فرح:ايه فى ايه
نهى:حتة واد بره ايه يخرب بيت كده على جوز عيون خضراء ايه يجنن
مريم:مين ده يا مجنونة
نهى :اسمه سيف……سيف حسين سليم
شهقت فرح بغضب:مين
نهى:بقولك سيف حسين سليم
فرح:شوفتى يا مريم وجاى لحد لهنا
مريم:اهدى يا فرح بس ……..نهى خليه يتفضل
خرجت نهى تاذن له بالدخول وابتعدت فرح قليلا تمسح وجهها من دموعها التى لم تفارقها منذ ليلة امس
دخل سيف فوجد مريم امامه مبتسمة فقال فى نفسه:بداية كويسة شكلها كويس
مريم:اتفضل يااستاذ سيف
سيف:متشكر اوى ياانسة فرح
مريم بارتباك :لا انا مش فرح انا زميلتها مريم
سيف:انا اسف اوى اومال فين هى
اشارت مريم خلفه:اهى ……فرح اهى
التف ليراها ومن ان راها حتى توقف به الزمن ظل ينظر اليها كانه دخل الى عالم احلامه مرة اخرى ليرى فتاته الجميلة امام عينيه
فرح……..انتى فرح
فرح:ايوه انا …..
سيف:وانا سيف
فرح :اتفضل يا باشمهندس
تركتهم مريم وحدهم وكل منهم بداخله شئ مختلف تماما عن الاخر
فرح:تحب تشرب ايه يا باشمهندس
سيف:ياريت قهوة مظبوط
طلبت فرح من نهى انا تاتى بالقهوة اليهم ظل ينظر اليها وهى تحاول ان تتحكم فى غضبها مما تعرف جيدا ما جاء به اليها
حضرت نهى بعد فترة صمت لتحضر القهوة وتضعها امامهما وتتركهم حتى بدات فرح بالحديث وهى تفرك يدها بعصبية شديدة
من غير مقدمات كتير يااستاذ سيف انا رافضة الوضع المفروض عليا وعليك ده …….بص انا عارفة انك زى مفروض عليك الوضع ده……..بس انت اكيد راجل ومحدش يقدر يغصبك على حاجة فلو سمحت قولهم انك مش عايزنى ….
اكملت بتنهيدة قوية :ارجوك انا بجد تعبانة اوى ومش قادرة اتخيل انى ممكن اتجوز بالطريقة دى
ظل سيف صامتا ينظر اليها بتمعن :طيب وبعدين
فرح:ولا قبلين انت قلهم انك شوفتنى ومرتحتش معايا مش مناسبين لبعض تفكيرنا مختلف اى حاجة …..اى حاجة المهم ان الجوازة دى متمش………..هااا قلت ايه
نظر اليها ببرود:قلت مش موافق
فرح:يعنى ايه
سيف:يعنى مش موافق على اقتراحك
فرح:طيب ايه عندك اقتراح تانى
سيف:ايوه طبعا
فرح:اوكيه هو ايه؟
سيف:انى اتجوزك
فرح:نعم انا بقول ايه وانت بتقول ايه جواز ايه انت هترضى تتجوز واحدة غصب عنها مش عايزاك
رفع قدما فوق الاخرى بغرور:على فكرة انا الف بنت تتمنى انى اكلمها مش اتجوزها
فرح بعند:خلاص ياسيدى روح للالف دول واتجوزهم كلهم وحل عن دماغى
سيف:تو…تو انتى عجبانى وهتجوزك
وقفت امامه غاضبة:ده بعينك ويحصل اللى يحصل انت فاكر نفسك ايه عاملى فلانتينو ومقطع السمكة وديلها خلاص روح اتجوز واحدة تافهة من اللى بيجروا وراك وريحنى
وقف امامها بثقة:الصراحة ممكن اتجوز واحدة من دول بس انتى دخلتى دماغى عجبتينى
فرح:وانت بقى مش دماغى ولا تعجبنى …….اقولك على حاجة
…….انت مستفز
ضحك سيف بقوة :ماانا عارف
فرح بغيظ”انت ايه بقولك مش عيزاك خلى عندك كرامة وابعد عنى احسنلك
سيف:يعنى هتعملى ايه
فرح: ملكش دعوة انا هعمل ايه …..لو راجل بجد سيبك من حكاية الجواز دى
اقترب منها بغضب وجذب ذراعها فجاة:على فكرة انا راجل غصب عنك بس مش هعرفك انا راجل ازاى غير لما تبقى فى بيتى ساعتها هتعرفى انى راجل وراجل اوى كمان
ابتعدت عنه بغضب:انت ازاى تمسك ايدى كده انت مجنون
سيف:احترمى نفسك يا بت انتى
فرح:مين دى اللى بت احترم نفسك
سيف:اوكيه هحترم نفسى …..اعملى حسابك يوم الخميس هجيب اهلى وهنيجى نقرا الفاتحة ونلبس الدبل والخميس اللى بعده فرحنا
فرح:انت ايه بتخطط وبترسم على اساس ايه فاكر ايه انى هخضعلك واقولك امين تبقى بتحلم
سيف:لالا عيب كده مينفعش تكلمى خطيبك كده ثم ياانسة فرح لازم تعرفى ان جوازنا هيتم برضاكى غصب عنك هيتم ولا انتى مستغنية عن اخوكى ما يمكن اقتله واخد بالتار منه
فرح:انت بتهددنى؟
سيف:تقدرى تقولى كده ويا بنت الناس احنا جوازنا اتفرض علينا احنا الاتنين يعنى كلامك لا هيقدم ولا هياخر تعرفى انا كنت جاى ناوى افركش الجوازة دى واكبر دماغى من اللى هيحصل بس بصراحة مكنتش اعرف انك حلوة اوى كده
فرح:الزم حدودك يااستاذ انت ومتفتكرش انك هتلوى دراعى بكلامك ده لا انسى
سيف:انسى ايه بس لازم تعرفى ان الحكاية منتهية خلاص يعنى كل اللى بتعمليه ده فى الهوا ……ولا ليه لازمة
نظر الى ساعته :معلش بقى ورايا مشوار متنسيش يوم الخميس يعنى كمان يومين هجيب اهلى وهجى عشان الخطوبة معلش هى سريعة بس الفرح بعدها باسبوع مش كتير يعنى عن اذنك بقى سلام
التف ليغادر نادت عليه:وانت تقدر تتجوز واحدة بتحب واحد غيرك
توقف وتوقف عقله للحظات :يعنى ايه
فرح:يعنى انا بحب واحد تانى ومتفقين على الجواز
سيف:مين ده
فرح:شئ ميخصكش
سيف:لا يخصنى مين هو
فرح:”ملكش دعوة انت لسه مصمم انك تتجوزنى برضه
احس انها تقول ذلك لتثنيه عن فكرة الزواج منها اقترب منها بعيون متفحصة لوجهها :برضه هتجوزك يافرح مش هضحى باخواتى ولا بنفسى عشان حاجة هايفة زى دى
فرح:هايفة ازاى لما تتجوز واحدة بتحب غيرك تبقى حاجة هايفة
سيف: على فكرة انا مش مغرم بيك ولا انا معجب ودايب ولا الكلام الفارغ ده لا انا راجل شايف اودامى ممكن ارواح تضيع لو رفضت وانا بقى مش مستعد اضيع انا او حد من اخواتى عشان حضرتك فهمتى ولا لسه
فرح:بس انا مش عايزة الجواز بالطريقة دى
سيف: مفيش حاجة اسمها عايزة او مش عايزة انا وانتى اتفرض علينا الجوازو وبرضاكى او غصب عنك هيتم ولا اخوكى يهون عليكى
فرح:ده اسمه لوى دراع يااتجوزك يااخويا يتقتل
وضع يده فى جيبه :بالظبط كده انتى تقدرى تقولى لا بس تتحملى عواقب رفضك ده عن اذنك

مقالات ذات صله