مسلسل “الست ذكية” الحلقة الثالثة والرابعة عشر

“يوميات الست ذكية (13) ”

********
********

عبد الصمد قاعد حاطط وشه فى الجورنال ومندمج فى القراءة

وجت الست ذكية وهاتك يا رغى

ولما انتبه لكلامها لاقاها بتقول ….

ماتيجو نشوف ايه اللى بتقوله

*
*

وبعدين يا عبد الصمد رفضوا العريس

هما مين دول

الجيران اللى جانبينا هو انت مش سامع الحكاية من الاول يا خويا

واحنا مالنا ياذكية ومال الناس

مالنا ازاى مش جيرانا ياعبد الصمد

طيب روحى شوفى شغلانة غيرى وسيبينى اكمل الاخبار

اخبار مين

اخبار العالم

لا اله الا الله هو انت مش لسة قايلى احنا مالنا ومال الناس

عارفة ياذكية ان كل يوم بحمد ربنا عشان اتجوزتك

بجد يا عبده . ربنا يخليك ليا ياخويا . بس ليه يعنى

عشان عشرتى معاكى دى اكبر تكفير لذنوبى

ماشى ياعبد الصمد الله يسامحك

كان نفسى كدة يكون لينا نفس الاهتمامات ويكون بينا تقارب

جرى ايه ياعبد الصمد هو فيه اكتر من كدة تقارب .ما انا قاعدة جانبك على الكنبة اهو

صحيح قاعدة جنبى بس بينا مسافات كتير

طيب اتاخر خدنى جنبك يا عبده

خدك ربنا يا شيخة . قومى شوفى حاجة تعمليها وسيبينى فى حالى

مالك بس يا عبد الصمد مهموم ليه كدة

عايز حد بيفهم اتكلم معاه

هو انت هتلاقى حد فى نضافة مخى ياعبد الصمد . انت مش عارف مخى ده فيه ايه

ماهو انا اللى محزنى انى عارف مخك فيه ايه

طيب ياعبد الصمد انا هتكلم معاك كلام كبير اوى

اتفضلى صدعينى

يرضيك ياعبد الصمد الجارة الجديدة اللى فوق اطلع اتعرف عليها وواخدالها معايا طبق مسقعة بالتوم وريحتها مفحفحة

تقوم تفتحلى الباب نص فتحة وتقولى انت مين ياست انتى ولما قولتلها انا جارتك ذكية وجايبالك مسقعة تقوم رازعة الباب فى وشى وتقولى سوفاج

انا اتهزئت يا عبد الصمد

انتى تستاهلى . واحدة ماتعرفيهاش ايه يوديكى عندها

مش جارة جديدة ولازم ارحب بيها

هو انتى ماعندكيش كلام الا عن الجيران

لا عندى كتير اوى بس ادينى ودنك وانت تكسب

خير

مش انا روحت السوق لقيت كيلو البتنجان بخمسة جنيه

اللهم ارحم عبدك الفانى يارب

وحاولت مع البياع ينزلى حتى ربع جنيه فى الكيلو مارضيش

ذكية سيبينى اقرا الجورنال وفارقينى

طيب انت بتقرا ايه

بقرا عن الاحداث اللى بتحصل

هو ايه اللى حصل

امريكا يا ستى بتتحكم فى العاالم كله ومسيطرة عليه

طيب والعالم يسكتلها ليه ياعبد الصمد

للأسف يا ذكية ماحدش بياخد قرارات حاسمة مع امريكا

وهى امريكا دى ياعبد الصمد مالهاش راجل يلمها

امريكا مين اللى مالهاش راجل يلمها ! هو انتى فاكرة امريكا دى واحدة ست زيك

لا ياعبد الصمد ايش وصلها ليه امريكا دى .ايش جاب لجاب. طيب انا عندى فكرة ياعبد الصمد

خير يا ام الافكار

ادينى عنوانها وانا اخد اتنين تلاتة من حبايبى ونروح نتصاحب عليها ونشوفها يعنى عايزة ايه مننا

عارفة ياذكية يمكن اللى بيحصلنا ده بسبب الناس اللى زيك اللى مش فاهمين اى حاجة فى اى حاجة ومودينا فى داهية

هو انت ليه يا عبد الصمد دايما مستقل بيا . اللى انت ماتعرفوش عنى يا عبده انى انا سياسية من الدرجة الاولى بس مابحبش اتكلم عن نفسى كتير

وايه الدليل ان شاء الله يا ست السياسية

انا ياعبد الصمد مابفوتش حلقة من حلقات رأفت الهجام والست ايستر بلوبيسكى

يا شيخة اتقى الله خليتيه هجام كمان . اسمه رأفت الهجان .

ياخويا وانا مالى هو انا هناسبه

طيب فارقينى ابوس ايدك كفاية . انا زهقت

زهقت من ياعبد الصمد

لا زهقت من نفسى

طيب اقولك فزورة

ياذكية الست لازم تعرف اهتمامات جوزها وتشاركو اهتماماته وتبعد عن اللى بيضايقه لازم الزوجين يبقو اصحاب

استغفر الله العظيم اصحاب ايه ياعبد الصمد سلامة عقلك احنا متجوزين على كتاب الله وسنة رسوله

طيب قومى من وشى لحسن يكون اخر يوم فى جوازنا انهاردة

 

 

“يوميات الست ذكية (14) ”

********
********

الست ذكية قاعدة ماسكة ورقة وقلم وقاعدة قدام التليفزيون

وبتنقل حاجات من على الشاشة ودخل عبد الصمد عليها وبيكلمها وواضح ان عنده مشكلة كبيرة

لكن هى مش معاه خالص

تعالو نشوف اللى حصل

*
*

ذكية

ذكية

وبعدين نقطع عليه بصل حلقات

ياذكية

ايه ياعبد الصمد فى ايه

بتكتبى ايه

بكتب وصفة الاكلة الجديدة بتاعة الشيف كرشو

اكلة ايه دى

بباريونى بالبمبريونى

ياذكية ده اسمها لوحده يوجع البطن احنا ناقصين هو انتى مش هتريحينا من الوصفات الفتاكة بتاعتك دى

دى اكلة طليانى يا عبد الصمد بيقول عليها حلوة اوى

طيب سيبك دلوقتى من الوصفة وخليكى معايا عايزك فى موضوع مهم يتعلق بمستقبلنا

يا مصيبتى انت اتجوزت علية يا عبد الصمد

لا يا ستى مااتجوزتش

طيب خلاص خلينى اكمل البرنامج

يعنى اهم حاجة عندك انى مااتجوزش عليكى وبس

ونروح مشوحين اللحمة وحاطين عليها جمبرى وسبيط وصدور فراخ وعيش غراب عشان الغراب مايزعلش ويقول اشمعنى انا لأ

يا ستى سيبك من الغراب وخليكى معايا يا حداية

لا اله الا الله . خير ياعبد الصمد خير فى ايه

انا فى ازمة

سلامتك يا عبد الصمد

هو انا بقولك انا عندى مغص

طيب يعنى فى ايه يعنى مالك

انا محتاج دهبك يا ذكية عشان اخرج من الازمة

نعم نعم نعم يا خويا . انت جرا لعقلك حاجة يا عبد الصمد

انا هروح فى داهية ياذكية . انا مضيت شيكات وميعادها جه ومش معايا سيولة تغطى المبلغ

يا سلام يا خويا يعنى تغطى المبلغ وتعرينى من دهبى

يا حبيبتى هعوضهولك ان شاء الله

اللى يروح مابيرجعش يا عبد الصمد وبعدين امى طول عمرها تقولى اوعى تفرطى فى دهبك يا ذكية

دهبك هو راجلك الحقيقى يابت . وكانت تقولى عمرك شوفتى عقد دهب نط من رقبة صاحبته واتعلق فى رقبة واحدة تانية

قولتلها لأ ياما . قالتلى لكن الراجل ممكن يسيبك ويتعلق فى رقبة واحدة تانية قولتيلها عندك حق ياما

لا حول ولا قوة الا بالله . كدة برضو ياذكية . انا مستقبلى هيضيع

طيب انا عندى حل يا عبد الصمد

خير قولى ابوس ايدك

فى برنامج بيجى بالليل اسمه القلوب الرحيمة اتصل بيهم ويحددولك معاد وتقوم لابس جلابية مقطعة وتنكش شعرك وانا هضحى بالعيال وابعتهم معاك

بجلاليب مقطعة برضو ومنكوشين وتقعدو تعيطو وتقول ياعالم مش لاقى أأكل عيالى وهما هيلمولك قرشين وتخرج من الازمة ياعبد الصمد

الله ينتقم منك ياشيخة عايزانى اشحت واتسول وانتى معاكى دهب

انسى دهبى يا عبد الصمد وشيله من دماغك خالص

وهتسيبينى اتسجن ياذكية

ياخويا ده يوم السعد والهنا داأنت هتروح السجن تلاقى كبارات البلد كلهم مشرفين هناك

وهتتصاحب على ولاد الريس يا بختك ياعبده . بس بقولك ايه ابقى اتصور معاهم عشان نحط الصورة فى الصالون وعيالك يتباهو بيك طول العمر

منك لله . حسبى الله ونعم الوكيل

انت بتدعى عليا ليه يا عبد الصمد انا قصرت معاك فى ايه . انا عمالة اشوفلك حل مش لاقية

هاتى الدهب ياذكية وخليكى واقفة جنبى

مش هقدر اقف جنبك يا عبد الصمد عشان ورايا شغل فى المطبخ بالإذن

يعنى ده أخر كلام عندك

عارف ياعبد الصمد مرة زمان ابويا احتاج من امى غوايشها الدهب وامى ماكانتش عايزة تديهومله ولكن كانت خايفة تقوله لأ فراحت

خبيتهم عند ستى ولما جه من برا قالتله الدهب اتسرق وقعدت تعيط والدهب فضل عند ستى وقبل ماستى تموت بعتت لأمى عشان تقولها على مكان الغوايش

وامى قعدت جنب ستى وهى بتطلع فى الروح وتقولها الدهب فين ياما وستى تقول الدهب ف الدهب ف وبعدين روحها طلعت وامى ماعرفتش مكان الدهب

واغم عليها وجالها انهيار عصبى بعيد عنك والناس كانت فاكرة انها زعلانة الزعل ده كله عشان امها اتاريها زعلانة على الدهب

احسن تستاهل وتستاهل اكتر من كدة كمان

الله يسامحك ياعبد الصمد

انا خارج

رايح فين

رايح اتصرف فى الكارثة اللى انا فيها

بالسلامة والقلب داعيلك ياعبد الصمد

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة