ترفيهمسلسل على بياض

الحلقة الأولى من مسلسل على بياض للكاتبة مي حُريز

الحلقة الأولى من مسلسل على بياض للكاتبة مي حُريز

الفصل الاول

———-

عايدة: صباح الخير
مصطفى: صباح النور
عايدة: يالا عالسفرة على طول الفطار جاهز
مصطفى: طيب تسلم أيدك. امال فين الولاد مش هيفطروا معانا؟
عايدة: ياسر و ريهام نزلوا الشركة من بدرى
مصطفى: و شريف؟؟
سكتت عايدة بتفكر مش عارفة تقول ايه بس مصطفى ماسابهاش تفكر كتير و قالها: لسه نايم مش كده؟
هزت راسها: آه
مصطفى: ما أكيد راجع وش الصبح طبعا
عايدة: ما هو أكيد كان سهران في الشغل يعني هو وراه ايه غيره
مصطفى: لا من ناحية وراه فهو وراه. وراه سرمحه و هلس و قلة أدب انا مش عارف الواد ده طالع كده لمين!! يا رب انا عملت ايه في دنيتي عشان ابني البكرى اول فرحتى يطلع كده
طبطبت عليه و قالتله اهدا انت بس عشان صحتك متستحملش كده و ادعيله ربنا يهديه
مصطفى: ربنا يهديه يا ستى . روحى صحيه بقا يقوم يشوف شغله الشركة اللي بنيتها في سنين بتعب و شقا هيضيعها باستهتاره و حركاته الطايشة
عايدة: لا الحق يتقال هو شايل الشغل على كتافه طول عمره و ممشي الشركة زي الفل
مصطفى: افضلي انتى حاميله و دافعي عنه لحد ما نلبس كلنا في الحيط
ردت و هى رايحة على أوضة شريف: بعد الشر علينا يا حبيبي متقلقش انت و كل حاجة هتبقى تمام
——
عايدة: شريف…. شريف.
شريف: ممممم
عايدة: ممممم ايه؟ الساعة ١٠ قوم روح الشغل
رد بزهق : بتصحيني ليه الساعة ١٠ حرام عليكي يا ماما لسه بدرى
عايدة: بدرى من عمرك يا حبيبي. قوم بسرعه ابوك متعصب و حاطك في دماغه. قوم يالا البس و هديه بكلمتين احنا ما صدقنا صحته اتحسنت
قام من السرير و هو زهقان: حاضر حاضر الواحد ميعرفش ينام في البيت ده شويه
——-
شريف: صباح الخير يا درش
مصطفى: قول مساء الخير. أخواتك الصغيرين صحيوا من بدرى و راحوا الشركة
ضحك شريف و هو بياخد زتونه من عالسفرة: ما لازم يعملوا كده عشان مرفدهمش. دي شركة و ليها مواعيد مش سايبة هي
مصطفى: ترفد مين يا ولا؟ أخواتك؟ دول زيهم زيك في الشركة اوعى تكون صدقت انك مدير بجد؟
شريف: لا العفو مدير ايه؟ ده انا مرمطون الشركة دي. الاسم مدير و الفعل مرمطون و الله سيبني يا درش خليني ساكت. عن اذنك بقا لما الحق المرمطة من أولها
عايدة: مش هتقعد تفطر
شريف: لا هتاخر و جوزك يزعل
ابتسم مصطفى و هز راسه و هو بيحط لقمة عيش في بقه
قامت عايدة وراه و هو بيربط الكرافات و قالتله: طب متنساش النهاردة معزومين بليل عند نسايب اخوك متتاخرش بقا.
رد بزهق: طب و انا لازمتى ايه. ما تروحوا إنتوا من غيري و اعتذرولهم بأي حاجة
عايدة: لا مينفعش انت اخوه الكبير و النهارده هيتفقوا على معاد و ترتيبات الفرح لازم تكون موجود و تقف جنب اخوك. آه و بقولك ياريت تبقى تمسك لسانك و متعملش مشاكل مع ليلى سيب البنت في حالها مش كل مره هنقعد نعتذر بعدها عن كلامك
بصلها و ابتسم و قالها: بصي يا عايدة لو استفزتني مش هسكتلها و الأحسن أنى مروحش و كلنا نرتاح و اوفر عليكم الاعتذار
عايدة بعصبية بس بصوت واطي عشان مصطفى ميسمعش: بلاش لعب عيال قلت هتروح يبقى هتروح و ياريت تكبر شوية و تبطل الهبل ده معرفش حاطط نقرك من نقرها ليه من و انتو عيال صغيرين
شريف: نقرى من نقرها!!! دي كلمه صغيرة اوى ده انا بسببها ياما كلت علق و انطردت من البيت. دي حاجة كده استغفر الله العظيم لما بشوفها اليوم بيقفل
عايدة: بقولك ايه خلي رأيك ده لنفسك مش عاوزين مشاكل خلى الجوازة تعدي على خير نفسي افرح بحد فيكم مش كفاية كان المفروض انت اللي تتجوز الاول و مش هاين عليك تفرحنا
شريف: لا لا اتجوز ايه هو انا زعلتك في حاجة ده انا حتى بحبك هاتي بوسه. باسها و مشي ناحية الباب
عايدة: يالا يا بكاش. خلي بالك من نفسك. و سوق على مهلك
شريف: حاضر و هلبس فنله خلف خلاف و هغسل رجلي قبل ما انام متقلقيش حافظ الوصايا كلها
———-
شيرين: صباح الخير يا شريف
بصلها و مردش عليها و شاورلها بأيديه انه عاوز فنجان قهوة
شيرين: طيب حاضر هخلى عم هلال يعملك القهوة حالا

دخل مكتبه و قلع جاكيت البدله و رماه عالكرسي
شالته شيرين و هى متضرره و علقته عالشماعه و قالتله: في حاجات مهمه عاوزه اخد رأيك فيها في الشغل
شريف: بعد القهوة أي حاجة بعد القهوة عشان مزعلش حد مني
ابتسمت و قالتله : طيب حاضر و خرجت بره على مكتبها
—-
سلمى: ها جه؟
شيرين: اه بس منصحكيش استني أما يشرب القهوة الأول عشان شكله مزاجه زفت
سلمى: الله يبشرك بالخير. طب لما يشرب القهوة و يتنقل لليڤيل الأعلى و يبقى قطران ابقي قوليلي عشان اجى اخرجه عن شعوره
شيرين و هي بتضحك: طيب متقلقيش هبقى اقولك
ياسر: شريف جه؟
شيرين: أيوه لسه جاي
حدفلها بوسه في الهوا و قالها: طب أنا داخله
——
ياسر: صباح الفل
شريف: صباح النور. ايه الاخبار
ياسر: تمام الأمن مستتب مفيش جديد. بس رايي تبقى تنزل تبص عالشغل بنفسك بردو عشان نطمن
شريف: امال إبراهيم بيعمل ايه؟
ياسر: مش مرتاحله انا إبراهيم ده. معلش يعني هو صاحبك و دفعتك و كل حاجة بس مش مريح كده. حاول تنزل تشوف الشغل و العمال بنفسك عشان محدش فينا هيفهم في الشغل زيك
شريف: حاضر حاضر بكره ابقا انزل ابص عليهم بصه
ياسر: متنساش النهارده معزومين عند شيرين
شريف: اه ماما قالتلي. ربنا يتمملكم بخير
ياسر: الله يخليك عقبالك.
شريف: بعد الشر
ضحك و قاله: ماشي بس بقولك و النبي يا شريف بلاش جر شكل مع ليلى عشان طنط بتضايق و بتطلعه عليا بعد كده
شريف: لو بتضايق قولها تلم بنتها هي اللي بتبدأ انا ببقى رد الفعل مش الفعل
ياسر: لا بقا يا شريف انت اللي بتبتدي معرفش انت حاططتها في دماغك ليه مع انها ظريفة جدا
ضحك اوى و قاله: ليلى ظريفه؟ يابني احنا بيننا تاريخ اسود منيل بستين نيله من أيام ما كنا عيال سيبني اخلص تاري شوية
ياسر: يابني ده كان اسمه لعب عيال معرفش انت ليه شايل منها قوى كده لحد دلوقتي
شريف: ما هو انت لو كنت مكانى و كنت كل ما تفكر تزوغ من حصة و لا تعمل اي شقاوة في المدرسة تلاقي اهلك عارفين في البيت و ابوك مستنيك بالحزام عالباب كنت هتشيل منها اكتر مني
دي ياما فتنت عليا و ياما جابتلي مشاكل
ياسر: ما هو انت اللي كنت شقى اوى بصراحة و بتعمل كل حاجة غلط في الدنيا
شريف: و هى مالها؟؟ ما كل واحد حر هي مالها؟؟
دخلت شيرين و عم هلال بالقهوة فسكتوا
عم هلال حط القهوة و خرج
شيرين: هنستناك النهارده يا شريف لازم تيجي
شريف: ان شاء الله بس يكون في علمكم انتو الاتنين مفيش جواز لحد ما نسلم الحاجات اللي معانا
ايه بتبصوا لبعض ليه؟ عاوزين تتجوزوا دلوقتي في عز زنقة الشغل و تاخدوا اجازه إنتوا الاتنين و تسيبوني أخبط دماغي في الحيط. ده بعدكم و ده السبب اللي هيخليني اجى النهارده عشان متحددوش معاد الفرح من نفسكم و تحطوني قدام الأمر الواقع
ياسر: طيب طيب بليل نتكلم
شريف: طيب ماشي يالا يا شيرين على مكتبك أنتي كمان و ابقى هاتي الشغل المهم اللي قلتي عليه كمان ١٠ دقايق أكون شربت القهوة
شيرين: حاضر
——-
شيرين: مش قولتلك مش هيرضى نتجوز دلوقتي مصدقتنيش. كده لازم نستنى عالاقل كمان ٣ شهور انا قربت اكمكم جنبك
ياسر: معلش يمكن بليل لما الكبار يكلموه يغير رأيه أنا موصي ماما و بابا يضغطوا عليه
شيرين: الظاهر انك متعرفش اخوك كويس. ريحوا نفسكم احسن
ياسر: و الله بيني و بينك هو عنده حق بعد ما نسلم الشغل احسن ناخد اجازه براحتنا و نسافر و ننبسط و مفيش حد يكلمنا كل شويه يسألنا عالشغل … و بعدين بصلها برومانسية و قالها: هعملك هانى مون محصلش يا حبيبتي
شيرين بدلع: بجد هتوديني فين يا حبيبي
ياسر: لا دي مفاجأة متسأليش انا هخطفك
خرج شريف من جوه قطع عليهم اللحظة الرومانسية: جرى ايه يا ياسر انت لسه هنا؟ روح شوف شغلك. شيرين هاتى الشغل و تعالي
شيرين: حاضر حاضر حالا
——-
سلمى: ها شرب القهوة و مزاجه اتزفت اكتر؟؟
شيرين: اه لسه مخلصين شغل ادخليله قبل ما ييجي شغل تاني
——
سلمى: صباح الخير يا شريف
شريف: صباح النور. ازيك يا سلمى
سلمى: الحمد لله. كنت عاوزه اطلب منك طلب
شريف: طبعا اتفضلي
سلمى: كنت محتاجة كام يوم اجازه
هي قالت كده و عينك ما تشوف الا النور فتح فيها بصوت عالي لما الشركة كلها اتلمت على باب مكتبه
شريف: اجازة ايه يا سلمى دلوقتي؟؟ احنا في عز السيزون و مش ملاحقين عالشغل انتى هتستهبلي
سلمى: يا شريف انا بقالي ٦ شهور مخدتش يوم واحد اجازه زهقت محتاجة أغير جو و العيال زهقوا نفسي افسحهم يومين قبل اجازة نص السنه ما تخلص
شريف: و انا بقالي سنتين مخدتش يوم اجازة في ايه انتو بقيتوا بتدلعوا كده ليه
سلمى: طب بلاش اسبوع خليها يومين تلاته مع الويك اند عشان اعرف اسافر في اي حته
شريف: بقولك ايه انسي الكلام ده انتى تطلعي الجمعه العين السخنه و ترجعي السبت بليل هتبقى زي الفل
سلمى: مبلحقش يا شريف برجع مهدودة و تعبانه اكتر من الاول من الشيله و الحطة
شريف: يبقى تقعدي في بيتك معززه مكرمه و تبقي تتفسحي لما نخلص الزنقة دي براحتك
سلمى: يا شريف عشان خاطرى جوزى واخد اجازة و لو مروحتش معاه هيروح لواحده يرضيك يروح الغردقة لواحده واحده اجنبية تلطشه كده ولا كده؟
شريف: لا متخافيش جوزك لو قعد في وسط مليون ست مفيش واحده هتبصله
سلمى: يا شريف بليز
شريف: الموضوع انتهى اتفضلي على مكتبك و قام فتح الباب لقى الموظفين متجمعين بيسمعوا الخناقة قام مزعقلهم: اي حد ناوى ولا بيفكر و لا عقله بيصورله انه ييجي يطلب مني اجازه الفترة دي يراجع نفسه احسنله. محدش عندي بياخد اجازه في الفترة دي غير في حاله واحده بس. الف بعد الشر عنكم كلكم منها. يالا كل واحد على مكتبه.
——-
ريهام: ايه يا شريف معصب نفسك ليه عالصبح كده؟
شريف: مانتى شايفه بيستهبلوا عاوزين إجازات دلوقتي
ريهام: طب اهدى اهدى يا حبيبي روق دمك ميستاهلوشي
شريف: ممممم عاوزة ايه بقا
ريهام: هو انت على طول فاقسني كده
شريف: اه يا حبيبتي تقدرى تقولي زي اخوكى الكبير بقا و فاهمك كويس
ضحكت و قالتله : طب حيث كده بقا ادخل في الموضوع على طول
شريف: آه قصرى و قولي عاوزة كام من الآخر
ريهام: ٥٠٠٠ جنيه بس
شريف و هو مخضوض: ليه حرام عليكي
ريهام بدلع: عاوزه اشتري طقم جديد احضر بيه العزومة بتاعة بليل يرضيك يعني شيرين و ليلى يبقوا لابسين احلى مني
شريف: لا طبعا ميرضينيش بس أنتي عندك لبس كتير جدا ثم انك لسه شاريه فستان جديد الاسبوع اللي فات
ريهام: ده كان لخطوبة صاحبتي مينفعش اروح بيه عزومة
شريف: انتى بتودي مرتبك فين ده احنا لسه اول الشهر
ريهام: متفكرنيش يا شريف بجد هو ده مرتب؟؟ ده بيطير كله في اول اسبوع لازم تراجع نفسك شويه و تظبطلي الراتب
شريف: اظبطه ايه اكتر من كده ده انتى بتاخدي راتب مبياخدهوش مدير بنك يا شيخة ارحميني
ريهام: طب المهم هتديني الفلوس ولا لأ
شريف: أمرى لله يا مفترية مبعرفش اقولك لأ خدي الكريديت كارد من المحفظة بس اوعى تفترى أبوس ايدك
طارت من الفرحة و جريت باسته وقالتله: ربنا يخليك ليا يا شيريف يا حبيبي و ميحرمنيش منك أبداً.
——-
سوسن: أهلا و سهلا منورين يا جماعة
عايدة: ده نورك يا حبيبتي ربنا يكرمك
سوسن: منور يا مصطفى بيه اخبار صحتك ايه دلوقتي
مصطفى: متشكر يا هانم. الحمد لله بخير
عايدة: انتو مش هتبطلوا حكاية بيه و هانم دي ده احنا عشرة عمر
مصطفى: عندك حق يا عايده ده انا و المرحوم محمد كنا اكتر من الأخوات
سوسن: الله يرحمه و يحسن اليه و هو بردو كان دايما يقولي مصطفى ده زي اخويا و اكتر و الله
مصطفى: الله يرحمه. ازيك يا ليلى يا بنتي؟
ليلى: الحمد لله يا أنكل بخير. ازاي حضرتك
مصطفى: الحمد لله يا حبيبتي تعالى جنبي هنا اصلك انتى الوحيدة اللي بتفكريني بأبوكي الله يرحمه
وقع شريف من الضحك و زغدته ريهام و هي بتحاول تكتم الضحكة خدت بالها عايدة فقالت: بتفكرك بأبوها ايه بس دي زي القمر و ست البنات
مصطفى: طبعا قمرين كمان و مفيش في جمالها بس روحها روح ابوها قويه كده و حقانيه و متخافش من حاجة عشان كده بتفكرني بيه
عايدة: اه ابقى وضح كلامك عشان ميتفهمش غلط
ضحكوا كلهم و جت سوسن ندهت عالبنات عشان يرتبوا معاها السفرة. قامت ليلى و شيرين و عايدة كمان شدت ريهام و قامت و سابوا مصطفى مع الولدين
مصطفى موجه كلامه لشريف: ايه عجبتك اوى الكلمة ابقى امسك فشتك العايمة شويه ياخويا
شريف: اه بصراحة عجبتني اوى في الجون يعني
ياسر: أبوس ايدك يا شريف مش عاوز مشاكل
شريف: متقلقش. انا بس مقدرتش امسك نفسي الإفيه كان جامد جدا
ياسر: طب نركز في المهم. معاد الفرح عشان نبقى متفقين قبل ما نتكلم معاهم
مصطفى: اللي انت عاوزه انت و عروستك يا حبيبي
شريف: هو ايه اللي هو عاوزه و انا كيس جوافه قاعد جنبه
مصطفى: و انت مالك هو انت اللي هتتجوز ولا هو؟
شريف: لا هو بس انا اللي هلبس في الشغل. بعد ما نسلم الشغل اللي في ايدنا عشان خاطري
مصطفى: و ايه يعني أما يتجوزوا دلوقتي. ياسر اصلا ماسك الحسابات ملوش دعوه بشغلكم و شيرين في الإدارة بردو
شريف: شيرين ماسكة شغلي كله لو غابت دلوقتي الدنيا هتتعك و محدش بيعرف يظبط الشغل غيرها و الحسابات مهمه جدا دلوقتي عشان المشتريات لا لا مش هينفع خالص
ياسر: طيب خلاص بس لو استنيت لبعد التسليم انا هاخد اجازه كبيرة براحتى و عاوز هاني مون برة اه مش هضحي عالفاضي
شريف: ما تشوف عيالك يا درش شافطينني اول بأول عشان متقوليش الفلوس بتروح فين
ضحك مصطفى و قاله: ربنا يخليكم لبعض و ميحرمكوش من بعض أبداً انا خلاص حسن الختام و انتو ملكوش الا بعض. خلوا قلبكم على بعض و خلي بالك من أخواتك يا شريف
شريف: ايه يا راجل الدراما دي. ده احنا هنجوزك قطة صغيرة تجدد شبابك
ضحك مصطفى و ياسر اوى
مصطفى: بس ياد يا قليل الأدب
شريف: دي قلة الأدب دي احلى حاجة سيبلي انت بس نفسك و انا هرجعك ٣٠ سنه لورا
ياسر : طب خلى بالك عشان أمك جايه لو سمعتك هترجعك بطنها تاني
ضحكوا التلاته و هما بيبصوا ناحية عايده و سوسن و البنات
سوسن: اتفضلوا السفرة جاهزة
عايدة: تعالى هنا يا شيرين جنب خطيبك
شيرين و هي بتبص لياسر و بيبصلها بكل رومانسية: حاضر يا طنط
عايدة: و انتى يا ريهام تعالى هنا جنبي. ليلى معلش اقعدى جنب شريف هناك عشان أنتي عارفه هو بيحب ايه
سوسن و هي بتغرف لشريف الشوربة: انا عارفة انك بتحب شوربة المشروم بالكريمة بألف هنا يا حبيبي
شريف و هو بيدوق الشوربة : متشكر يا طنط تسلم ايدك
سوسن: دي ليلى اللي عاملاها و الله انا ملحقتش من باقي الأكل فقلتلها تعمل الشوربة
تف الشوربه من بقه بسرعه فلاقاهم كلهم بيبصوله باستنكار راح قايل: سخنه. سخنه في ايه؟ تسلم ايدك يا ليلى
ميلت عليه ليلى و قالتله بصوت واطي: لو اعرف انك بتحبها كنت حطيتلك فيها سم فيران مش خسارة فيك و الله و علت صوتها و قالت: انت ابن حلال و الله و تستاهل كل خير
ابتسملها ابتسامه صفرا و ركن الشوربة و شاف صنف تاني ياكل منه و أتأكد الاول ان مش ليلى اللي عاملاه
———
ليلى: بتشرب ايه يا شريف
تف الميه في الكوباية تاني و قالها: بسم الله الرحمن الرحيم خضيتيني مش تتنحنحي ولا حاجة
ليلى: اتنحنح و انا داخله بلكونة بيتنا ليه؟ العصافير هتكون خالعة راسها
شريف: يخربيت تقل دمك. عاوزة ايه؟؟ بشرب ميه اتبطيتي!!
ليلى: لا مش قصدى دلوقتي قصدي يوم الخميس اللي فات لما كنت في الكافية في المهندسين مع واحدة كده بيئة اوى بس جامدة الصراحة مش هنكر
شريف: أنتي بتراقبيني ولا ايه؟
ليلى: اراقبك؟؟ انت؟؟ ليه يعني؟؟ انا كنت في عيد ميلاد هناك و شوفتك بالصدفه
شريف: طب و عاوزة ايه دلوقتي؟
ليلى: هو انت كنت بتشرب ايه ساعتها اصل اتهيألي انك بتشرب منكر
شريف في سره شربتي السم الهاري يا بعيده: ليلى ملكيش دعوه بيا هو في ايه انا بقيت بمشي أتلفت ورايا منك مكفاكيش أسافين زمان عاوزة تكملي عليا دلوقتي!!!
ليلى: طب ما تمشي عدل يحتار عدوك فيك
شريف: ملكيش دعوة بيا خالص لو شوفتيني في حته امشي منها مادام اللي بعمله مبيعجبكيش
ليلى: و انا مالي بيك اصلا انت فاكر نفسك ايه. انا بس خايفه على باباك و مامتك لما يعرفوا مصايبك دي يجرالهم حاجة
شريف: لو عرفوا هيبقى منك و لو ده حصل هتديني عذر كويس اوى عشان أنفذ اكبر حلم عندي و هو أني اقتلك
ليلى: يا عم روح انت تعرف تقتل دبانة اصلا
شريف: حلى عنى يا شيخة بقا أنتي بقيتي بتجيلي في الكوابيس
ليلى: ما تقول انك بتحلم بيا متتكسفش
شريف: اه بحلم بيكي و بصحى انادي عليكي بليل أوعي كده وسعي انا اللي همشي و اسيبلك الدنيا بحالها.
ليلى: اهرب يا بشمهندس اهرب ما انت كل لما تتزنق تهرب
دخل جوه قالهم: طب تسلم ايدك يا طنط و ربنا يتمم بخير يا جماعه. عن اذنكم انا عشان عندي معاد مهم
سوسن: معاد ايه؟ ما لسه بدرى احنا لسه مخدناش الحلو دي ليلى عام….
شريف: لا تسلمي يا طنط مليش في الحلويات عن اذنكم. خليكوا خليكوا انا عارف الطريق.
——
عايدة: بس شوفتي ليلى و شريف وقفوا مع بعض في البلكونة و طولوا يا مسهل ربنا يهديهم
سوسن: يا رب احنا هنلاقي احسن من شريف ولا احسن منكم بس ربنا يهديهم مش عارفة معاكسين بعض ليه
عايدة: ده حب بيناغشوا بعض اسأليني أنا
سوسن: تفتكري؟؟!!
عايدة: ايوه افتكر إيش عرفك انتى. ههههههه
——

شريف: ألو ازيك يا سالى أنتي فين؟
سالي: ازيك يا شريف عامل ايه؟ انا في البيت
شريف: طب عاوز اشوفك
سالي: اوكى تحب نتقابل في حته؟
شريف: لا لا مليش مزاج اروح اي حته دلوقتي بقولك ينفع اجيلك البيت؟ دماغي مقلوبه و مش عاوز دوشة
سالي: طبعا ينفع تعالى تعالى و انا انسيك الهم ده
شريف: أيوه بالظبط انا عاوزك تنسيني اسمي
سالي بعد ما رقعت ضحكة مسخرة: طب يالا مستنياك
———
إبراهيم: صباح الخير يا شريف ايه المفاجأه الحلوة دي
شريف: ازيك يا بشمهندس انا لقيتك مبتسألش قلت اسأل انا
إبراهيم: الشغل يا شريف كتير اوى و بنسابق الزمن عشان نسلمه في المعاد
شريف: طب تعالى وريني وصلتوا لايه…. صباح الخير يا رجاله
– صباح الخير يا بشمهندس.
شريف: الله ينور شدوا حيلكم عاوزين الشغل يتسلم في المعاد
– ان شاء الله يا بشمهندس
شريف: هايل يا بشمهندس إبراهيم تسلم انت و الرجالة
إبراهيم: الله يخليك يا بشمهندس تلميذك
شريف: لو في اي حاجة ناقصاكم في الخامات او اي حاجة معطله الشغل معاكم قولي على طول انا الفندق ده تحديدا عاوزه يتسلم في معاده و على اعلى مستوى. دي شركة كبيرة و اول مره يدونا شغل الديكور بتاعهم لو عجبهم الشغل هتبقى فاتحة خير لينا ان شاء الله
إبراهيم: ميكونش عندك فكرة كله هيبقى زي الفل و احسن من اللي في بالك متقلقش
شريف: ان شاء الله انا واثق فيك
إبراهيم: ده شرف ليا يا بشمهندس
شريف: طب ما تسيبك من الرسميات دي بقا و ابقى تعالى اسهر معانا النهارده زي زمان بقالك فترة مختفي ليه
ابراهيم: الشغل يا شريف في المواقع غير المكتب بخلص اخر اليوم مهدود
شريف: بطل حجج فاضية انا عارف كويس انت بتسهر مع مين كل يوم. ابقى تعالى النهاردة خلينا نشوفك
ابراهيم: امرك حاضر هجيلكوا النهارده. نفس المكان القديم؟
شريف: ايوه يا عم على حطة ايدك متتاخرش بقا
ابراهيم: لا متقلقش
———-
ياسر: ايه يا شريف اتاخرت كده ليه؟
شريف: عديت عالموقع قبل ما اجى زي ما اتفقنا
ياسر: طب كويس اوى و ايه الاخبار؟
شريف: متقلقش الشغل ماشي كويس و زي الفل شيل انت ابراهيم من دماغك
ياسر: و انا حطيته فيها اصلا؟ انا بس مش برتاحله كده لله في لله معرفش ليه و كده ولا كده لازم نتابع الشغل بنفسنا منسلموش كل حاجة كده و خلاص
شريف: خلاص المرة الجاية ابقى انزل معايا و مرة في مرة هتتعلم
ياسر: هتعلم ايه هو انا مهندس؟
شريف: مش محتاجة شهادات هتتعلم واحدة واحده عالاقل عشان محدش يضحك عليك في الخامات و المشتريات
ياسر: ماشي هنزل معاك لو انت اللي هتعلمني اوعا تقولي ان ابراهيم هو اللي هيعلمني
شريف: أكيد انا اللي هعلمك…. ها كنت عاوز ايه؟ شيرين قالتلي انك عمال تسأل عليا من الصبح
ياسر: اه كنت جايبلك السيڤيهات بتاعة المحاسبين عشان نختار اللي هنقابلهم. محتاجين حد بسرعة يساعد مع سلمى عشان اعرف اخد اجازة طويلة للجواز
شريف: طب و انا مالي اختار انت و ريهام انت حسابات و هي HR اختاروا بمعرفتكم ده شغلكم
ياسر: بس انت عارف يا شريف اننا مبنعرفش ناخد قرار نهائي من غيرك
شريف: لا هتعرفوا انتو مش صغيرين عاوزكوا تشيلوا شوية من الشغل عني بقا مش كل حاجة فوق دماغي. يالا روح اقعد معاها أفرزوا السيڤيهات و اعملوا الانترڤيوز و ابقوا بلغوني في الآخر عملتم ايه انا واثق فيكم
ياسر: حاضر اللي تشوفه
———
بعد كام يوم
ريهام: انا خدت فكرة سريعة عن السي ڤي بتاعك يا أستاذ نادر و عرفت ان عندك خبرة خمس سنين في شركة منافسه. ممكن اعرف عاوز تسيبهم ليه
نادر: و الله الفترة الأخيرة مكنش في اي حافز للشغل يعني الأيام كلها شبه بعضها في الشغل و سواء اشتغلت او مشتغلتش مفيش اي فرصة أنى اترقى او اكبر في الشركة عشان كده ابتديت ادور برة
ريهام: عظيم يعني انت بتدور على فرصة عشان تكبر
نادر: بالظبط
ريهام: بس احنا إدارة الحسابات عندنا صغيرة يعني مدير مالي و تحته اتنين موظفين لو اتقبلت هتكون واحد منهم يعني بردو الفرصة انك تكبر و تترقى مش كبيرة اوى خصوصا ان المدير المالي واحد من الشركا يعني مش حد ممكن يمشي في يوم و تاخد مكانه
نادر: الشركة هنا ما شاء الله بتكبر بسرعة الصاروخ سمعتكم برة في السوق هايلة و انا واثق ان بعد كام سنه من دلوقتي هتبقوا في مكان تاني خالص و هتاخدوا حصة اكبر من دي بكتير من السوق فأنا حابب أشارككم في النمو ده و أكون جزء منه و متأكد ان الشركة شغلها هيتوسع و إدارة الحسابات هتكبر عن كده بكتير و حابب جدا أكون من أوائل الناس اللي بدأت معاكم
ابتسمت ريهام: بصراحة اجابتك مقنعه و حلوة جدا. انت متدرب على الكلام ده قبل كده ولا ايه؟
ابتسم و قال: لا مش موضوع متدرب بس ما شاء الله سمعتكم في السوق زي الطبل و الكل بيتنبألكم بمستقبل هايل فعلا
ريهام: طيب انا شخصيا معنديش اعتراض عليك و أستاذ ياسر المدير المالي مدي موافقته عالسي ڤي بتاعك بعد الانترفيو معاه فاضل بس خطوة واحده
نادر: خير خطوة ايه
ريهام: لازم البشمهندس شريف الرئيس التنفيذي يقابلك
نادر و هو بينشف عرقه: حضرتك خضيتيني كده يعني كلمة رئيس تنفيذي دي خضتني. انا بسمع كتير عن البشمهندس و نفسي أتعرف عليه من زمان بس مش عارف لما قولتي كده اتاخدت ليه
ريهام: لا متقلقش خالص البشمهندس شريف شخص لطيف جدا و بعدين ده مجرد اجراء روتيني لأي حد بيتعين معانا في الشركة
نادر: يعني افهم من كده أني اتقبلت
ريهام: ايوه بس هقولك مبروك بعد المقابلة مع شريف. في الواقع خليني اشوف لو ينفع يقابلك دلوقتي بدل ما نمشورك و تفضل رايح جاي
نادر: تمام
ريهام: طب من فضلك انتظرني بره دقيقتين بس على ما اشوفه
نادر: اوكى عن اذنك
ريهام: ألو شريف ازيك. عندك وقت تقابل المحاسب الجديد
شريف: ياسر قابلة؟
ريهام: اه انا و ياسر قابلناه و تمام بالنسبالنا فاضل بس انت تشوفه
شريف: طيب هاتيه و تعالي
ريهام: تمام
———-
شريف: أهلا أهلا يا أستاذ نادر
نادر: أهلا يا بشمهندس
شريف و هو بيشاورله يقعد: اتفضل. معاك سي ڤي
ريهام: بعتهالك عالميل يا شريف
شريف: فعلا!! طب استني أما اشوف
فتح الميل و قرا السي ڤي بسرعة و بعدين راح قايل: هايل هايل لا خبرتك ممتازة و مناسبة جدا بس ليه عاوز تسيب شغلك دي شركة كويسة جدا
بص نادر لريهام و ابتسموا لبعض و بعدين قال: الحقيقة انا كان عندي أسبابي اللي قلتها للأستاذة ريهام بس دلوقتي بقا عندي سبب تاني اهم بعد ما شفت حضرتك
شريف: خير ايه هو؟
نادر: انا بسمع كتير عن حضرتك من السوق و كده سمع خير طبعا بس كنت متخيل انك اكبر من كده في السن متخيلتش انك شاب يمكن تكون من سني تقريبا او اكبر كام سنه و لما جيت الشركة و شفت الموظفين كلهم شباب من نفس السن تقريبا بصراحة ده حمسني اكتر أنى أكون جزء من التيم بتاعكم.. يعني شركة بالنجاح ده كل الموظفين بتوعها شباب مين ميحبش ينضم للتيم ده و يبقى وسط الشباب الجميل ده
شريف: يعني انت اول ما دخلت عليا قولت ايه الواد الچان ده معقولة ده بتاع حسابات ده المفروض يكون واجهه للشركة دلوقتي اكتشفت انك مثبتاتي كمان يعني دي حاجة هايلة انت تنفع جدا في خدمة العملا محتاجين حد شكله كويس و عنده أسلوب و كاريزما زيك و الله مشاكلنا كلها هتتحل
ابتسم نادر و بص لريهام اللي بصلته في نفس اللحظة و ابتسمت و رد: و الله يعني حضرتك بتحرجني بس انا محاسب. مجرد محاسب و بس
شريف: لا يا راجل انت مش عارف قيمة نفسك كويس عموما انا معنديش مانع انك تتعين معانا محاسب لحد ما نكتشف باقي مواهبك على مهلنا بقا
نادر و السعادة طالعة من عينيه: متشكر جدا يا فندم ان شاء الله أكون عند حسن ظنك
شريف: الف مبروك
نادر: الله يبارك فيك
ريهام: الف مبرووك يا أستاذ نادر
نادر: الله يبارك في حضرتك
ريهام و هي بتحاول تفك الرسميات شوية: حضرتك!!! طيب حضرتك اتفضل مع حضرتي في المكتب نخلص الإجراءات
نادر و هو بيبتسم بخجل: اتفضلي يا فندم عن اذنك يا بشمهندس
شريف: اتفضلوا
الإعجاب و الكيميا بين ريهام و نادر كانوا واضحين جدا من اول لحظة هي شافته شاب وسيم مكدبش شريف لما قال عليه چان و مؤدب و واثق في نفسه جدا و يمكن دي اكتر حاجة عجبتها فيه يعني كل اللي كانت بتتعرف عليهم كانوا دايما بيتهزوا شوية قدام شخصيتها القوية و خصوصا لما يعرفوا هي بنت مين و أخت مين بس نادر متهزش للحظه قدامها كان و فضل طول الوقت معتز بنفسه و واثق فيها اوى بطريقة شدتها و خلتها تحاول تقرب و تتعرف عليه اكتر
أما هو فعجبه تواضعها و روحها الحلوة رغم ان اللي زيها و اللي في جمالها و منصبها و عيشتها يحقلها تشوف نفسها عالناس اوى لكن كانت سلسة سهله مش متعبة في التعامل مش بتخليه يفكر قبل ما يتكلم او يتصرف لقا نفسه بيقربلها لواحده من غير ما ياخد باله.
————

بعد كام شهر
شريف: ياااااه الحمد لله الشغل أتسلم على خير متتصوريش كنت متوتر ازاي و على أعصابي و هما بيستلموا الشغل كنت خايف يكون في اي غلطة مخدتش بالي منها
شيرين: الحمد لله يا شريف انت تعبت الفترة الأخيرة دي جدا و الحمد لله ربنا وفقك
شريف: الحمد لله. اندهيلي ريهام و ياسر عاوز اجتماع دلوقتي و تعالي معاهم
شيرين: طيب حالا هبلغهم
———
شريف: بشكركم يا جماعة على مجهودكم الفترة اللي فاتت و الحمد لله الشغل أتسلم في معاده على احسن وجه
ياسر: الحمد لله ده تعبك انت يا شريف
ريهام: مبروك يا شريف انا فرحانة اوى انك فرحان
شريف: ايوة فرحان جدا دي شركة كبيرة و كانوا مبسوطين جدا من شغلنا فمتفائل اوى باللي جاي ان شاء الله.
ريهام: ان شاء الله
بص لياسر و قال: اصرف مكافأة شهر لكل العمال و المهندسين اللي اشتغلوا في المشروع ده و نص شهر لكل موظفين الإدارة هنا
ياسر: مش كتير كده يا شريف؟
شريف: لا مش كتير خليهم يفرحوا معانا
ياسر: أمرك
شريف: عندى ليكم خبر يجنن
كلهم: ايه قول بسرعة
شريف: الفندق اللي سلمناه لما عرفوا انك هتتجوز قرروا يعملولكم فرحكم هدية عندهم كنوع من الدعايا عشان الأوتيل لسه جديد
ياسر: بجد هايل اوي
شريف: ايه رأيك يا شيرين
شيرين: موافقة طبعا الأوتيل تحفة اصلا و دي حاجة حلوة اوى كفاية ان انت اللي عامل كل الديزاينز
شريف: طب على خيرة الله بس عاوزك تعرفي سلمى كل حاجة عن الشغل قبل ما تاخدى إجازتك عشان مزهقكيش تيليفونات كل شوية
ياسر: سلمى؟؟ ملقيتش غير سلمى طب ما كده الشغل عندى انا هيقع يعني انا و سلمى هنسيب الإدارة مرة واحده
شريف: الشغل مش كتير دلوقتي و سلمى تقدر تتابع هنا و هنا و اهو نادر شغال كويس و يقدر يسد في الحسابات لواحده الفترة دي
ياسر: يعني عينت نادر عشان يساعد سلمى تقوم تطيرلى سلمى ما تشوف حد تاني
شريف: مفيش حد تاني بيعرف يعمل شغل شيرين غيرها متقلقش انت هترجع تلاقي الدنيا ماشية و مفيش حاجة هتحصل.
بص لشيرين: خلاص يا شيرين؟ عرفيها كل حاجة بقا مش عاوز اطلب منها حاجة تقولي اصل معرفش و اصل محدش قالي
شيرين: حاضر يا شريف متقلقش
شريف: طيب خلاص اتفضلوا دلوقتي شوفوا شغلكم
خرج ياسر و شيرين بس ريهام فضلت
شريف: خير يا ريهام عاوزة حاجة؟
ريهام: اه عاوزه ارغي معاك شوية فاضي؟؟
شريف : و لو مش فاضي افضيلك نفسي ارغي يا حبيبتي ارغي
ريهام: شوفت العربية بتاعتي نزلوا منها موديل جديد بس ايه رهيب و مختلف خالص من جوه و برة يجنن يا شريف
شريف: اه شوفتها في الشارع من كام يوم عجبتني جدا
ريهام و هي بتدلع: طب بقول ايه يا شيريف هو انا ينفع أغير عربيتي و اجيب الموديل الجديد اصله عاجبني اوى هتجنن عليه
شريف: و الله يا ريهام يعز عليا اقولك على حاجة لأ بس اديكي شايفة مصاريف جواز ياسر كتير ازاي
ريهام: انت مش لسه قايل الفرح هدية
شريف: ما انا ما صدقت اوفر في حاجة عشان اخوكى عاوز هاني مون كبير بره
ريهام: يعني هي جت عليا انا ما انا هبيع عربيتي و ندفع الفرق بس
شريف: طب متزعليش بصي استني بس أشم نفسي من جوازة اخوكى و بعدين هعملك اللي عاوزاه
ريهام: امتى يعني
شريف: يتجوز بس و يسافر و نتكلم
ريهام و هي بتقوم: احنا لسه هنتكلم؟؟ احنا خلاص خلصنا كلام بعد الفرح تجيلى العربية
شريف: يا ساتر عليكي مفترية كده ليه
ريهام: يعني ان مكنتش افتري على اخويا حبيبي افتري على مين
شريف: لا حاولي تشوفي حد تاني عشان انا تعبت منك. اتجوزي و ابقي افتري على جوزك براحتك
ريهام: لا بردو هبقى اجى افتري عليك
شريف: يعني مفيش فايدة
ريهام: نو. سلام
شريف:سلام

زر الذهاب إلى الأعلى