مسلسل أبغض الحلال الحلقة التاسعة والعشرون والثلاثون والأخيرة

الحلقة 29

نوال بتفتح الباب

“نسمة.. تعالى يا حبيبتى ادخلى”

دخلت نسمة على اوضتهم على طول

دخلت وراها نوال… وسمع صوتهم سمير وقام دخل لهم

سمير”فى ايه؟؟”

نوال”انتى ايه اللى نزلك دلوقتى؟؟حصل حاجة”

نسمة”بلال طلقنى”

نوال صرخت

“ايييييييييييييييييه”

سمير بيزعق”يعنى ايه طلقك…. ازاى طلقك كده وليه وفين عمتك”

نسمة”عمتى نايمة وخلاص انا طلبت الطلاق وهو طلقنى وخلاص”

سمير”ايه خلاص… شفتى يانوال… هو ده اللى كنت بقوله عيال ومعندهمش تحمل للمسئولية”

نوال”مش معقول كده يا نسمة انتو مكملتوش شهر…ايه السبب اللى يخليكوا تتطلقوا”

نسمة”اتسرعنا فعلا واحنا مننفعش لبعض… وكفاية متضغطوش عليا الله يخليكم سيبونى كفاية اللى انا فيه”

رن جرس الباب

سمير”اهو تلاقيه نزل يصالحك… مش عايز نشوفية دماغ وتقومى مع جوزك”

نسمة مستغربة ان بلال ينزل يصالحها

“معدش ينفع يا بابا خلاص اتطلقنا”

سمير”وهما اللى اتطلقوا مبيرجعوش لبعض يعنى”

راح سمير بيفتح الباب وهو ماشى للباب بيقول

“بس والله ما انا ساكت له على موقف زى ده… اتهبل ده ولا ايه”

بيفتح الباب… شاف نادية قدامه… ومعاها شنطتها

“فيه ايه انتى كمان”

دخلت اترمت ف حضنه وبتعيط

“فيه ايه يانادية… انتوا ايه اللى حصلكم كلكم”

جت نوال من الاوضة… واول ما شافتها

“نادية!!!!!!!!”

مسحت نادية دموعها… يحيي هيطلقنى يا بابا …مبقاش عايزنى خلاص”

سمير”لأ مش ممكن… انا مش مصدق اللى بسمعه واللى بيحصل النهاردة..انا هيجرالى حاجة”

نوال”بعد الشر يابابا… دلوقتى نفهم اللى حصل…ايه اللى حصل يانادية…تعالى طيب غيرى هدومك الاول وبعدين احكيلنا”

جت نسمة على صوتهم

“نادية!!!!!!!”

“نسمة!!!!!!”

ضرب سمير كف على كف ودخل اوضته

“غيروا هدومكم وناموا والصباح رباح”

 

تانى يوم الصبح…ف بيت سمير

مديحة قاعدة وسمير وال3 بنات

مديحة”طيب يا نسمة قوليلى انا فيه ايه…بلال مش عايز يقول حاجة وبيقول كل شئ نصيب”

نسمة”صح يا عمتو كل شئ نصيب… احنا مش عايزين بعض”

سمير”ده اسمه كلام…. مش قلتلك يا مديحة عيال ومعندهمش تحمل مسئولية”

مديحة”انا تعبت بهاتى بقالى ساعة هنا وفوق ساعتين لما خلاص مش عارفة اوصل لحاجة”

نسمة”متتعبيش نفسك ياعمتو… احنا خلاص كده”

مديحة”يابنتى ازاى بس… ونادية كمان حكايتها ايه”

نادية”يحيي عايزنى اخلف يااما يطلقنى”

مديحة”ازاى يطلقك كده مش لما تشوفوا السبب ايه مش يمكن هو السبب”

خبط الباب… قامت نسمة تفتح

“اهلا ياماما…تعالى اتفضلى”

ولمحت سعاد سمير قاعد جوه وبصوت واطى

“مقلتليش ليهان باباكى قاعد انا كنت فاكراه ف الشغل”

نسمة بعد ما افتكرت

“انا اسفة يا ماما انا اتفاجئت بيه منزلش وكان المفروض اقولك انه هنا”

 

سمير لمح تردد سعاد فى الدخول…مال على نوال

“خليها تدخل متسيبوهاش ع الباب كده”

 

قامت نوال

“تعالى ياماما اتفضلى”

دخلت سعاد وسلمت على مديحة والبنات وقعدت

سعاد”ايه يانادية اللى حصل… انتوا حصلكم ايه كلكم ياستار يارب”

مديحة”شفتى يحيي اللى كنا بنقول عليه كويس عايز يطلقها علشان الخلفة من غير ما يكشف”

نوال”ياعمتو يحيي مش غلطان… نادية اللى كانت بتاخد حبوب منع الحمل من وراه”

سعاد ومديحة بيبصوا لنادية والاتنين ف وقت واحد

“ليه”

وعيطت نادية

“علشان مش عايزة اخلف”

سعاد”وهو فيه واحدة مش عايزة تخلف الا لو كان فيه سبب”

ورن موبايل سمير فى الاوضة…وقام يرد

نادية”انا خايفة اخلف ومعرفش اربى ابنى”

مديحة”ومتعرفيش ليه”

نادية”خايفة اموت ولا يحصلى حاجة ف الولادة وحتى لو محصليش حاجة وانا كنت كويسة لو انا ويحيي اتطلقنا لاى سبب ابنى يتربى محروم من حد فينا”

سعاد”استغفر الله العظيم… يا بنتى ماانا خلفت 4 مرات ومحصليش حاجة”

نادية”بس اتربينا محرومين منك.. وصبرى كمان هيتربى محروم من باباه… ولو كانت نسمة حامل كان ابنها هيتربى مفارق ..يبقى اجيب عيال اعذبهم ليه”

سكتت سعاد… بصت لمديحة

مديحة”وليه مبصتيش لكل اللى عايشين حياتهم عادى… مهما كان فيه ناس بيتطلقوا فيه ناس اكتر بيعيشوا حياتهم مستقرة… انتى نفسك مشكلتك ايه مع يحيي غير الاطفال…يعنى لو مكنتيش مانعة الخلفة مكنش حصل مشكلة… مشكلة اختك كانت ف حماتها ودى كنا ملاحظينها من قبل الجواز … باباكى ومامتك اللى حصل بينهم ده برضه نصيب… ومامتك عاشت مع جوزها كويسة وانا عشت مع جوزى كويسين”

سكتت نادية… نوال ونسمة ساكتين

سعاد”كلام عمتك صح يا نادية…متخربيش بيتك بايدك ويحيي كويس مش وحش”

جه سمير من الاوضة

“يحيي كان ع التليفون”

والتفتت نادية وبكل امل سألته

“قالك ايه”

سمير”بيقولى ان جلسة نوال بكرة واننا لازم نروح المحكمة الصبح”

نادية”مسألش عليا”

سمير وهو بيقعد وبيتجنب نظراتها

“لأ”

وطت نادية وشها ف الارض بخيبة امل

مديحة”ولا انت اتكلمت معاه”

سمير”سألته وقلتله عايزين نحل المشكلة اللى بينكم قالى خلاص كل حاجة انتهت ونادية هى اللى اختارت”

قامت نادية جريت على الاوضة وهى بتعيط … مش مصدقة ان كل اللى بينها وبين يحيي انتهى بجد

 

فى المحكمة… يحيي استقبل سمير ونوال وقعدوا مع بعض يستنوا رقم الجلسة

“بصى يا نوال… لما القاضى يسألك عايزة الخلع ليه قوليله اسبابك كلها عادى انا مش هحفظك صيغة انتى اتكلمى واحكى علشان القاضى يصدقك”

نوال”حاضر…بعدها بقى يحكم”

يحيي”لا طبعا لسه وقت ممكن القضية تاخد سنة وزيادة”

نوال”يحيي انت مش هتكلم نادية”

يحيي”خلاص يا نوال… نادية جرحتنى وخدعتنى وانا استحملتها وصبرت عليها كتير… انا مستنى بس لما اظبط امورى واطلقها واديها كل حقوقها”

سمير”يا يحيي كل مشكلة وليها حل…انا لو مكنتش بعتبرك ابنى مكنتش اتكلمت معاك كده… انا مش عايز اخسرك”

يحيي”وانا يا عمى مكنتش اتمنى ان يحصل كده… بس خلاص كل شئ نصيب”

 

من بعيد ظهر رامى ومعاه محامى

لما شافته نوال… ارتبكت وبعدت وشها عنه

وقف رامى والمحامى بتاعه بعيد … لحد ما اتنادى على رقم الجلسة بتاعتهم

 

فى بيت ام رامى بالليل فى اوضتها وهى ع السرير وهو قاعد على كرسى جنبها

“يعنى ايه يارامى حكم …ماتقول وتفهمنى القاضى قال ايه بالكلام العادى كده”

“يعنى حد من اهلى يتكلم مع نوال وحد من اهلها يتكلم معايا ويحاولوا الاتنين يصلحوا بيننا ويرجعوا للقاضى يقولوله اتفقنا ولا لأ”

“ومين اللى هيعمل كده”

“انا قلت محمود جوز اختى وهى قالت باباها”

“طيب…. بقولك ايه يارامى المخفية مرات ابوك واخوها بيخوفونى وانا قاعدة لوحدى”

“بيخوفوكى ازاى يعنى”

“وهما طالعين ولا نازلين بيفضلوا يزعقوا جنب الباب واخوها ابو مطواة ده بيفضل يلقح بالكلام … انا خايفة ليدخل عليا يخبطنى بحاجة”

“وهو هيعمل ليه كده هما ف حالهم واحنا ف حالنا”

“معرفش انا خايفة وخلاص ماتاخد اجازة وتقعد معايا”

“ازاى يا ماما …مينفعش طبعا”

 

الايام بتعدى

بلال ونسمة وسمير راحوا للمأذون واتطلقوا رسمى بعد ماتنازلت نسمة عن كل حقوقها المادية

وكل ما مديحة وسمير يسألوهم …يقولوا مفيش نصيب واحنا اتفقنا على كده ومحدش يسألنا

نسمة مش بتروح الكلية وبتاخد محاضراتها بالتليفون او بالنت من ايه صاحبتها

نسمة مكسوفة تروح الكلية والناس تعرف انها اتطلقت وهى عروسة وقررت انها تروح ع الامتحانات بس

 

نادية اخدت اجازة من المدرسة لانها مبقتش قادرة تركز ف حاجة

طول الليل دموعها على خدها وبتتقلب على السرير من غير نوم وكل تفكيرها ف يحيي وحبها وشوقها ليه

 

نوال اكتر واحدة نفسيتها مرتاحة فى البيت وان كانت ساعات يصعب عليها صبرى لما تبص له وتفكر لما يكبر ويسألها ليه اتطلقوا وتحكيله هيفهمها ولا هيلومها

 

سعاد بتكلمهم وبيكلموها كل يوم

 

مديحة وسمير اتفقوا ان فشل ولادهم مع بعض ميأثرش على علاقتهم واقتنعوا ان كل شئ نصيب وبطلوا يسألوا عن السبب

 

سمير اتصل برامى زى حكم الشرع والمحكمة واخد منه الرد اللى هيقوله ف الجلسة الجاية وهى ان رامى مش موافق على الخلع

 

محمود اتصل بنوال لنفس السبب وردها انها مصممة على الخلع

 

وف يوم ونادية قاعدة مع اخواتها

“اعمل ايه دلوقتى فى حاجات عايزاها من البيت”

نوال”جيبيها من البيت مش معاكى مفتاحك”

نادية”اه معايا بس مش عايزة اروح لاحسن يحيي يفتكرنى رايحة له”

نسمة”مش انتى عارفة مواعيده… روحى ف معاد ميكونش موجود فيه”

نادية بصت ف الساعة

“زمانه ف المكتب دلوقتى…تيجى معايا”

نسمة”ماشى.. هقوم ألبس″

 

نسمة ونادية اول ما الاسانسير وقف

بيخرجوا منه…لقوا يحيي قدامهم كان هيركب ونازل

يحيي ونادية بيبصوا لبعض من غير ما يتكلموا

نظرات حب\\ شوق\\ عتاب \\ لوم

نسمة شافتهم حست بالحب الكبير اللى بينهم

قاطعتهم

“ازيك يا يحيي”

يحيي”ازيك يا نسمة عاملة ايه… ازيك يا نادية”

ردت نادية وهى خارجة من الاسانسير ورايحة ناحية باب الشقة

“كويسة”

ردها احبط يحيي… سأل نسمة

“جايين البيت ليه … فيه حاجة”

نسمة”اه نادية كانت عايزة هدوم”

يحيي”براحتكم… مش عايزة حاجة”

نسمة”بصراحة عايزة اسألك على حاجة ف قضية نوال… فاضى بس 5 دقايق”

يحيي”اه… تعالى”

دخلوا البيت ورا نادية اللى سابتهم ودخلت اوضتها تاخد الهدوم

“ايه يا ستى عايزة تسألى على ايه”

وقربت منه نسمة وبصوت واطى ميوصلش للاوضة اللى فيها نادية

“عايزة اقولك ان حرام الحب اللى بينك وبين نادية ده يضيع”

“اختك مبتحبنيش يا نسمة ولا بتحب حد”

“مين قال كده… نادية بتموت فيك وطول الليل مبتنامش وبتقلب ف صورك ورسايلك ع الموبايل ودموعها على خدها… نادية قاعدة من المدرسة والدروس ومبتخرجش م البيت بس هى بتكابر علشان مبتحبش حد يشوفها ضعيفة”

“لو كانت بتحبنى كانت تبقى عايزة تخلف منى”

“نادية خايفة من الحمل والولادة على نفسها وعلى البيبى…خايفة يجرالها حاجة او بعد كده تطلقوا وعيالكم تتربى زينا”

“مقلتليش حاجة زى كده”

“قلتلك نادية مبتحبش حد يشوفها ضعيفة… طمنها يا يحيي لو لسه بحبها”

“طبعا بحبها”

“ادخلها واتكلموا مع بعض… انا هرجع البيت… ويارب تتصالحوا”

                         *******************

دخل يحيي الاوضة وهو بيتسحب

شاف نادية واقفة ضهرها للباب ووشها للدولاب

ماسكة هدومه وبتحضنها ودموعها نازلة

قرب منها …وقف وراها وقرب من ودنها

“وحشتينى”

وقعت الهدوم من ايديها وبعدت عنه

“انت هنا… انت مش كنت نازل”

لفت وقفلت الشنطة اللى كانت حطت فيها كل الهدوم اللى كانت عايزاها

مسك ايدها بعدها عن الشنطة ومسح دموعها

“بقولك وحشتينى”

وانفجرت فيه وهى بتعيط
“مش انت اللى قلتلى يا اخلف يا نتطلق… مش انت اللى قلت لبابا اننا خلاص هنتطلق ومسألتش عليا… انت مبتحبنيش”

“والله بحبك… بحبك ومحبيتش حد غيرك وعايز اخلف منك انتى عايز ارتبط بيكى اكتر عايز اسرة كبيرة عايز نربى ولادنا مع بعض لحد ما نجوزهم ويخلفوا ونبقى انا وانتى عواجيز وقاعدين نناكف ف بعض… بحبك يا نادية وبكره عِندك”

“وانا بحبك يا يحيي … انت اول واخر حب ف حياتى بس مبحبش حد يستغلنى… انت استغليت حبى ليك وبتجبرنى اخلف بالعافية”

“مش عايزة تخلفى ليه”

“لو مُت زى اميرة انت هتفرح بالبيبى صح”

“ماهى نوال وغيرها وغيرها خلفوا… اميرة عمرها كان كده…لو خايفة ممكن نروح لاحسن دكتور ولو قال ان الحمل فيه اى خطورة عليكى انا اللى هقولك اوعى تحملى ومش عايز عيال”

“ولو اتطلقنا …هربى عيالى لوحدى او تاخدهم انت وتحرمنى منهم”

“ومين قال انى هقدر اسيبك… انا طول الفترة اللى فاتت دى بتحجج بحكاية المؤخر انما انا مش قادر اطلقك… كان عندى امل اننا نرجع ومكنتش عايز اقطع اخر امل بيننا… انا كنت بتعذب فى بعدك واللى عذبنى اكتر انى حسيت انى مش فارق معاكى ولا سألتى”

“انا اللى كنت بموت كل دقيقة وانا عارفة اننا خلاص مش هنشوف بعض تانى”

“انا مقدرش استغنى عنك… انا بحبك اوى يا نادية”

ضمها ليه… سندت راسها على قلبه

“ولا انا اقدر يا يحيي… انا كمان بحبك اوى”

رجعها لورا… وبص لها ف عينيها

“يبقى توعدينى نروح للدكتور ونشوف حكاية الاطفال دى وانا اوعدك انى عمرى ما هبعد عنك انتى وولادنا”

“ولادنا؟؟”

“ان شاءالله… طول ما احنا مع بعض يبقى هنقدر على اى مشكلة ونحلها مع بعض… قومى غيرى هدومك وانا مش نازل المكتب علشان وحشتينى اوووى وعايز اشبع منك”

ردت نادية بابتسامة وفرحتها مالية وشها وقلبها

“طيب هطلع اقول لنسمة واتصل ببابا”

“ههههههه نسمة مين انتى لسه فاكرة…نسمة زمانها قربت من البيت دلوقتى… قومى انتى ظبطى نفسك كده وانا هتصل بباباكى واقوله اننا اتصالحنا وهنسافرالصبح نعمل شهر عسل جديد”

 

الحلقة 30 والاخيرة

سعاد ويحيي ونادية عند الدكتور

وبعد الكشف…

“هى كويسة ومفيش حاجة تمنع الحمل الا…”

وقل يحيي وقاطعه

“الا ايه… هو فيه مشكلة”

الدكتور”لا .. بس انها اخدت الحبوب لمدة طويلة هيأخر الحمل شوية يعنى مش معنى انها بطلتها تحمل على طول… يعنى بعد 6 شهور تبقى تيجى تكشف تانى لو مكنش حصل حمل”

وحست سعاد بقلق يحيي…فسألت الدكتور

“انما عامة يا دكتور معندهاش حاجة تقلق”

الدكتور”لا خالص… مسألة وقت بس″

خرجوا من عند الدكتور… وحس يحيي ان نادية ساكتة طول ماهما عند الدكتور وبعد ما خرجوا

مسك ايدها… وسألها

“لسه خايفة”

ردت وهى لسه سرحانة

“اوى”

سعاد”سيبيها لله يا نادية محدش بياخد اكتر من نصيبه”

 

فى المحكمة… نوال ويحيي وسمير قاعدين مستنيين الجلسة

جه رامى عليهم

“السلام عليكم”

رد يحيي وسمير ونوال دورت وشها بعيد عنه

رامى”عمى لو سمحت انا عايز اشوف ابنى… انا من يوم وفاة بابا مشفتوش ووحشنى اوى”

قامت نوال وقفت بعيد…حس سمير انها فوضته

سمير”ماشى يا رامى …عايز تشوفه امتى وابقى اتفضل بس ده مالوش دعوة بالقضية اللى بيننا”

رامى”انا عارف… انا بس عايز اشوفه… ممكن النهاردة”

سمير”ممكن… تعالى الساعة 8 كده ان شاءالله”

رامى”متشكر اوى يا عمى”

 

فى بيت ام رامى بالليل…

رامى قاعد بيتعشا ومامته قاعدة جنبه

“هااا احكيلى بقى الواد عامل ايه”

“الحمدلله… تصدقى كان ماسك فيا زى ما يكون عارفنى…وانا مكنتش عايز اسيبه خالص”

“منها لله اللى اخدته مننا… ده انا هتجنن واشوفه”

“ماما… هو ينفع ارجع نوال”

“وانا مالى مش هى اللى رفعت قضية”

“ايوه بس الكلام ده حصل لانى مطلبتش منها انها ترجع …مش انتى قلتيلى مجيبش سيرة رجوع علشان ميركبوناش”

“اه… مكنتش فاكراها هترفع قضية بجد”

“واهى رفعت والمحامى بتاعى بيقول اكيد هتكسبها… انا عايز ابنى ونوال كمان كويسة مش وحشة”

“مليش دعوة اعمل اللى انت عايزه”

وقامت ومشيت وسابته … وقبل ما تدخل

“روح خليها تيجى هى والواد يملوا علينا البيت بدل ما احنا لوحدنا”

 

فى بيت سمير… سمير ونوال فى اوضتها

“رامى كلمنى وعايز يصالحك وترجعى له”

“قال كده بس”

“اه قال انه عايزك ترجعى انتى وصبرى تانى”

“ارجع على نفس العيشة القديمة مع مامته؟… انا ماصدقت خلصت”

“يعنى انتى موافقة ترجعيله بس المشكلة ف مامته”

وطت نوال وشها ف الارض وردت

“رامى كويس لو بعيد عن مامته وسيطرتها… وصعب عليا لما شاف صبرى وصبرى كمان كان ماسك فيه وانا حسيت انى هفرق بينهم … بس برضه مش هقدر ارجع تانى”

“طيب انا عندى حل”

وردت بلهفة

“ايه”

“نقوله يجيب شقة بره”

“مستحيل يسيب مامته وخصوصا بعد باباه ما مات”

“يا ستى احنا نقول شرطنا وخلاص واللى ربنا رايده هيكون”

“ماشى يابابا اللى تشوفه”

 

فاتت شهور

سمير قال لرامى على الشرط… ولان رامى معندوش اى حل ولا جرأة رفض انه يجيب شقة بره… واستمرت القضية وكل ما يحب يشوف صبرى يشوفه

 

نسمة خلصت امتحانات سنة تانية ونجحت فيها رغم كل الظروف اللى مرت بيها

 

يحيي ونادية عايشين حياتهم بسعادة يحيي ف انتظار خبر حملها وهى قلقانة وبتحاول تنسى خوفها بحبها ليحيي

 

البنات علاقتهم بسعاد طبيعية زى اى ام وبناتها…بعيدا عن سمير

وعلاقتهم بسمير طبيعية ومتأثرتش بوجود سعاد ف حياتهم

 

فى بيت سمير… مديحة قاعدة مع سمير ومتوترة ومترددة

“مالك يا مديحة…شكلك عايزة تقولى حاجة”

“اه…عايزة اقول حاجة وخايفة تزعلوا”

“من امتى انا بزعل منك”

“والله يا سمير وشى منك ف الارض”

“ما تقولى قلقتينى”

“بلال”

“ماله”

“عايز يخطب وانا قلتله مش هروح معاه الا لو انت وافقت”

ورد عليها بانكسار

“وانا معقول هقول لأ… ربنا يتمم له بخير”

“هتيجى معايا ؟؟”

“بصى زى ماانتى اهتميتى بمشاعر ابنك انا كمان لازم احترم مشاعر بنتى… مش ممكن اروح اخطب لطليقها..ولا ايه”

وردت مديحة بكسوف

“معاك حق… انا مش عايزة نسمة تزعل”

“ربنا مايجيب زعل … بكرة ربنا يكرمها هى كمان وكل شئ نصيب”

“بص يا سمير… انا طول عمرى بعتبر بناتك بناتى… علشان كده بلال هيسافر فرع الشركة ف السعودية بعد ما يخطب والسنة الجاية يبقى ياخد مراته معاه يعنى هيبقوا بعيد”

“بعيد ولا قريب يا مديحة متفرقش ف حاجة… ربنا يكرمهم ويعوض نسمة خير”

“ان شاءالله…هطلع انا مش عايز حاجة”

“لا شكرا”

مشيت مديحة ونادى سمير على نسمة وحكى لها كلام عمتها

“ساكتة ليه”

“ابدا عادى”

“زعلتى… معلش يا حبيبتى ربنا يعوضك خير”

“ابدا يا بابا… انا الحمدلله ف الشهور اللى فاتت قدرت افهم ان اى حاجة وحشة بتحصلنا بتقوينا… انا مريت بتجربة صعبة واكبر من سنى بس فهمتنى حاجات كتير… فهمتنى انى بعد كده احكم عقلى ف كل حاجة واول حاجة قررتها انى مش هفكر ف اى ارتباط خالص الا لما اخلص واشتغل وبلال ربنا يوفقه مع اللى اختارها وانا اخترت طريقى خلاص… طريق العقل”

حضنها سمير وهو فرحان بكلامها

“ربنا يكملك بعقلك يا حبيبتى”

 

فى بيت ام رامى

رامى قاعد مع اخواته واجوازهم

اخته”بص بقى يارامى بدل انت مش قادر تقول لماما احنا هنقولها…احنا جايين النهاردة علشان كده”

رامى”انا عارف انها هترفض”

الاخت”احنا هنقنعها”

جت ام رامى من الحمام… وقعدت

“منورين يا ولاد… ياه كل يوم البيت فاضى عليا”

الاخت الكبيرة” ماهو علشان البيت كبير عليكى يا ماما حاسة انك لوحدك”

الاخت الصغيرة”صح يا ماما… وعلشان كمان سلوى اللى فوق دى اكيد بتضايقك”

ام رامى”اه والله…ده انا لما اخوكم بينزل بقفل عليا بالمفتاح”

الاخت الكبيرة”علشان كده يا ماما احنا اتفقنا اننا نبيع البيت ونقسم وكل واحد ياخد حقه”

ام رامى”نبيع البيت؟؟!!”

الاخت الصغيرة”اه وتشوفيلك شقة على قدك وتبقى بعيد عن سلوى واخوها”

الاخت الكبيرة”وعلشان رامى كمان يا ماما…حرام يتحرم من ابنه ومراته هو كمان يجيب شقة ويقعد فيها مع مراته وابنه”

ام رامى”ازاى اخرج من البيت اللى اتجوزت فيه وعشت حياتى كلها فيه”

الاخت الكبيرة”ماهو البيت والارض يجيبوا مبلغ كبير وبصراحة بقى احنا محتاجين الفلوس دى”

ام رامى”محتاجينها ف ايه”

الاخت الصغيرة”مش هو ميراثنا يا ماما…محتاجينه او لأ ده حقنا”

ام رامى”حقكوا ايه ما سلوى وابنها هياخدوا جزء كبير اكتر منكم”

محمود جوز الاخت الكبيرة”يا حماتى الارض بمبلغ كبير اوى وتكفى الكل… قولى انتى اه بس″

وبصت ام رامى لرامى

“وانت كمان عايز تقسم”

رامى”انتى عارفة ياماما انى عايز ابنى… وكلامهم صح احنا ناخد حقنا ونشوفلك شقة واشوفلى شقة وارجع نوال وابنى”

كلهم ف نفس الوقت

“وافقى ياماما… محتاجين الفلوس ياماما… كلنا متفقين ياماما”

 

فى بيت سمير… نوال ونسمة فى الاوضة… دخلت عليهم نادية

“ازززززززززيكم يا حلوين”

سلموا عليها الاتنين

نسمة”ايه ده مسمعتش الباب”

نادية”بابا شافنا واحنا طالعين ففتح لنا قبل ما نخبط”

نوال”ازيك يا نادية وازى يحيي”

نادية”الحمدلله…على فكرة يحيي خلص اجراءات التنازل عن القضية خلاص”

نسمة”واحنا اتهدينا فى العزال … ياختى كنتى تعالى ساعدينا شوية”

ومسكت نادية بطنها

“للاسف مش هينفع غير اجى ضيفة من غير ما امد ايدى ف حاجة”

وبصوا نوال ونسمة لبعض

نوال”هو حصل”

نادية بتهز راسها

“لسه جايين من عند الدكتور حالا وقلت اجى اقولكم”

نسمة”تلاقى يحيي مزقطط”

نادية”يحيي كان هيلم علينا الناس لماعرف”

نوال”بذمتك مش فرحانة”

نادية”عارفين فكرة ان فيه حد بيتكون جواكى دى لوحدها عاملة احساس كده مش عارفة اوصفه”

نوال”ربنا يكملك على خير يارب”

نسمة”يارب تجيبى بنوتة شبهى”

وسمعوا جرس الباب… والباب بيتفتح ويتقفل

نوال”مين جه دلوقتى”

نسمة”مش عارفة هروح اشوف”

خرجت نسمة من الاوضة

نادية”هتروحى شقتك الجديدة امتى”

نوال”يومين كده ان شاءالله”

نادية”وحماتك هتعملى معاها ايه”

نوال”مليش دعوة بيها الا ف اضيق الحدود يدوب زيارات لصلة الرحم وخلاص.. بعد ما باعوا البيت اشتروا لها شقة قريبة من بنتها واحنا شقتنا بعيد الحمدلله”

نادية”انتى هترجعى لرامى ليه…علشان صبرى بس ولا حبيتيه”

نوال”اللى بينى وبين رامى بقى مودة وعشرة وابننا..يعنى الحب بكل معانيه”

نادية”لالالالا ده احنا بقينا فلاسفة بقى”

نوال بتضحك”ولا فلسفة ولا حاجة”

نادية”صوت عمتك بره… هروح هقولها ع الحمل”

نوال”وانا هاجى اسلم عليها”

                 ***********************

لما خرجت نسمة تشوف مين جه

لقيت مديحة وبلال

سلمت عليهم وقعدت

بلال”انا جاى اسلم عليكم علشان مسافر الفجر”

سمير”بالسلامة يا بلال ربنا يوفقك”

بلال”ممكن كلمتين يا نسمة”

بصت نسمة لسمير

سمير”قومى كلمى ابن عمتك”

دخلوا الاتنين البلكونة

“نسمة… انا عارف ان الفترة الاخيرة كنت وحش اوى معاكى… بس والله انا مش وحش… احنا الاتنين كنا ضحية غلطة ودفعنا تمنها”

“فات اوان الكلام ده يا بلال خلاص.. ربنا يوفقك مع ليلى انت بتحبها وهى بتحبك وخلاص اتخطبتوا ربنا يسعدكم”

“انا بس مش عايزك تكونى زعلانة منى وتسامحينى من قلبى… والله العظيم انا بحكبم انتى ونادية ونوال اوى ومقدرش اخسركم”

“وانت كمان يا بلال غالى علينا اوى واخواتى بيحبوك”

“كرهتينى”

“لأ… بس مبقتش احبك نفس الحب اللى كنت بحبهولك… بقيت ابن عمتى وبس”

“سامحينى من قلبك”

“مسامحاك من قلبى… انت برضه سترتنى ومحدش عرف حاجة عن اللى حصل وده يشفع لك عندى”

ومد ايده يسلم عليها

“اشوف وشك بخير”

“ترجع بالسلامة”

وبص جوه البيت شاف نادية ونوال قاعدين بسلموا على مديحة

“هدخل اسلم عليهم قبل ما امشى وابقى سلمى على طنط سعاد كتير هى واسلام”

ردت وهى بتسحب ايديها من ايديه

“ان شاءالله… ابقى طمنا عليك”

———–———-———————-————

 الى اللقاء في المسلسلات القادمة

بقلم الكاتبة: دينا عماد

 

 

الرد

لن يتم نشر عنوان بريدك الإلكتروني. الحقول الإلزامية مشار إليها بـ *