مسلسل أم فتحي الحلقة الحادية عشر

11

قوليلي يا مروة يا مرات ابني
نعم يا ماما

بقالك قد ايه كدة متجوزة ابني فتحي

اربع شهور

ومش حاسة كدة انك دايخة ونفسك في الفسيخ

يا ربي . السؤال الزفر بتاع كل شهر . لأ يا ماما مش دايخة ولا نفسي في الفسيخ

يعني ايه مانفسكيش في الفسيخ انتي بتصطعبطي ولا بتستهبلي

لا حول ولا قوة الا بالله يا ماما قولت لحضرتك قبل كدة انا مابحبش الفسيخ اصلا

طب اتوكسي على وكستك يعني مش حامل الشهر ده كمان

لأ مش حامل

يا مصيبتي يا مصيبتي عليك يا فتحي يبني . يللي وقعت في ارض بور ومش باين لها زرع ابدا

والله كدة حرام . انتي كل شهر توتريلي اعصابي وتنكدي علية

وكمان ليكي عين تتكلمي . واحدة غيرك كانت اتكسفت على دمها ونزلت عينها في الارض

يا ماما مايصحش كدة دي مش طريقة . وبعدين دي حاجة بتاعة ربنا

ايوة يا مؤمنة يا موحدة انتي اعملينا فيها شيخة

استغفر الله العظيم

ايوة استغفري من عمايلك السودة فيا وفي الواد الغلبان اللي مش هاين عليكي تفرحيه بحتة عيل يشيل اسمه

لا بجد انا مش قادرة استحمل ولما يجي فتحي ليا كلام معاه

ايوة يابت قوليله امك عايزة تتربى وتتعلم الادب وروح اديها المين على وشها

اوف . عن اذنك انا داخلة اوضتي

ايوة يختي ادخلي امسكي الموبايل واديله التقرير اليومي .

اما اقوم اكلم سهير اختي اتفك معاها بكلمتين بدل ما اطق من جنابي

ترررررررررررررررررن ترررررررررررررررررررررررررررررن

ايوة يا مديحة ازيك

ازيك يا سهير

مالك يا مديحة صوتك مش عاجبني

البت مرات فتحي يختي سدت نفسي عن الدنيا

خير يختي فرحيني

بقالها اربع شهور متجوزة الواد ولحد دلوقتي مش حامل

لو لوووووووووووووووووووووووووليييييييييييييييييييييييييييييييييييييييييييييييييييييييييييييييييييييي

انتي بتزغرطي يا سهير ؟

ايوة بزغرط

بتزغرطي على ايه

بزغرط على خيبتكو . اصل انتي فرحتيني عشان دي بركة دعايا عليكي

وعلى ابنك وذنب نسمة بيخلص من حبابي عنيكو

 

اخص عليكي يا سهير انتي شمتانة عشان مرات ابني مش حامل

ايوة شمتانة وان شاء الله مش هتشوف حمل ابدا وربنا هيقطع نسل ابنك من الدنيا

بعد الشر عليه الف مرة . لو مخلفش من دي هخليه يسيبها ويتجوز ست ستها ويخلف ويتهنى بولاده

ايوة كدة يا مديحة خليه يطلقها يختي بدل ماعمره يضيع جنبها من غير عيل

تفتكري كدة يا سهير

ايوة طبعا انا عايزة مصلحة فتحي . ونسمة موجودة وهي اولى

بابن خالتها وهتجيبله بدل العيل عشرة . احنا عيلة ولادة من قديم الازل

 

خلاص يختي على بركة الله نقرا الفاتحة

.
.
.

تررررررررررررررررررررن تررررررررررررررررررررررررنمين

انا فتحي يا امي

السلام عليكم

وعليكم السلام يا حبيبي اهئ اهئ اهئ

ايه ده مالك يا امي بتعيطي ليه

مراتك بهدلتني يا فتحي وانت غايب

ازاي الكلام ده

 

اهئ اهئ اهئ ليه وليه ياابني بقولها يا مروة يابنتي يا حبيبتي

ياروح قلبي نفسي اشوف ولاد فتحي قبل ما اموت

تقوم ترد عليا تقولي مالكيش دعوة بينا وما تتحشريش بيني وبين جوزي

معقول مروة قالت كدة !!

 

اومال يعني بكدب عليك . اهئ اهئ رديت عليها قولتيلها ربنا يسامحك يا بنتي .

انا قلبي عليكي يا مروة عشان انتي في غلاوة بناتي بالظبط

 

قالتلي ربنا يخدك انتي وبناتك ويريحنا منكو اهئ اهئ اهئ

قالت الكلام ده معقول انا مش مصدق !!!!!

وياريت يابني على كدة وبس .

 

دي كمان بقولها حطيلي الغدا يا مروة يابنتي يا حبيبتي قالتلي الغدا

عندك في المطبخ اغرفي لنفسك وبعدين اغسلي الاطباق اهئ اهئ اهئ

لا يا امي مش معقول

طب هاتها قصادي وانا اواجهها يا حبيبي اهئ اهئ .

يا عيني عليكي يا ام فتحي يللي اتبهدلتي من مرات ابنك

واتقل مقامك وابنك مش عايز يجيبلك حقك اهئ اهئ ا

هئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئ

ئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئ

طب اهدي اهدي يا امي انا هتصرف . هي مروة فين

 

قافلة عليها اوضتها وكنت سمعاها بتكلم اصحابها

في التليفون وعمالة تضحك وضحكها سمع الجيران

 

طيب انا داخل اشوف في ايه

مروة

ايه ده . ايه يا حبيبتي الدموع دي كلها مالك

 

انا تعبت تعبت تعبت فاهم مش قادرة استحمل عايزة امشي

من هنا رجعني لاهلي مش قادرة اكمل زهقت زهقت

 

طب اهدي اهدي يا حبيبتي في ايه بس

 

مامتك بتكرهني ومش طيقاني في البيت بتنكد علية عدد انفاسي .

وكل شوية مسكالي موضوع الخلفة زي ما تكون دي حاجة بايدي

 

طب خدي المنديل ده امسحي دموعك يا حبيبتي انا مااقدرش اشوفك منهارة بالشكل ده

فتحي جيبلي شقة بعيد عن مامتك لو عايز حياتنا تستمر مع بعض

يا حبيبتي انا مقدر اللي انتي متحملاه عشاني بس انا اعمل ايه . دي مهما كان امي ولازم نستحملها

 

امك انت مش امي انا وابقى استحملها لوحدك . انا حاسة اني من ساعة ما اتجوزتك وانا في حرب .

مش بيت هادي وكله سكن ومودة . اللي

 

بيحصل فيا ده حرام حرااااااااااااااااااااااااااااام

طيب اهدي بس وكل حاجة هتتحل

مافيش حاجة هتتحل الا لما نمشي من هنا ونبعد عن كل الهموم دي ومشاكل مامتك واخواتك

طيب يا حبيبتي ممكن تسمعيني

 

مش عايزة اسمع حاجة . ولو سمحت وديني عند ماما دلوقتي انا محتاجالها اوي .

محتاجة اترمي في حضنها واعيط . ماحدش هيحس بيا الا امي

 

حاضر يا حبيبتي حاضر بس اهدي

يا حبيبتي يابنتي كل ده بيحصلك من غير ماتحكيلي

ماكنتش عايزة اشيلك الهم يا ماما وكنت فاكرة اقدر اتحمل لوحدي بس ما قدرتش يا ماما والله ماقدرت

 

طب ياحبيبتي اهدي عشان خاطري ماتقطعيش قلبي يامروة . انا مش عارفة

يعني حماتك دي ماعندهاش رحمة خالص كدة

 

وبعدين انتي يادوب بقالك اربع شهور متجوزة هس مستعجلة ليه على الخلفة بالشكل ده

 

انا بحس يا ماما انها واخدة موضوع الخلفة ده حجة عشان تنكد علية وهي اساسا

لا عايزاني اخلف ولا نفسها تشوف ولاد فتحي ولا حاجة

 

على العموم يا حبيبتي انا هاخدك لدكتورة شاطرة كانت بتروح عندها

نهى بنت خالتك ونشوف في ايه معطل موضوع الحمل

 

طيب وليه يا ماما يكون العيب من عندي مايمكن يكون من عند فتحي

على العموم يا حبيبتي هو كمان لازم يعمل تحاليل وربنا يكتبلكو الخير يارب ويحفظك من شر حماتك وولادها

 

والله يا ماما اخته غادة طيبة جدا وهي الوحيدة اللي دايما في صفي بس للأسف

مش بتجي كتير عشان بيتها بعيد وملخومة بولادها ومدارسهم لكن الست هالة

والست دينا عندنا كل اسبوع بأرفهم ومشاكلهم

 

طيب وفتحي موقفه ايه

هو بيقف قصاد اخواته لكن مامته مابيقدرش يزعلها

هو موقفه برضو صعب يابنتي ونلتمسله العذر . دي امه

لكن امه ظالمة يا ماما والمفروض يقف في وشها

 

يا حبيبتي ما ينفعش . احنا كمان مش عايزينه يغلط فيها ولا يتجاوز

حدوده ونكون سبب في غضبها عليه

 

يا ماما انا مش عايزة اروح مع فتحي

لا بقولك ايه يا مروة انا دايما اقول عليكي اعقل بناتي

يا ماما مش طايقة اشوف حماتي كرهتها يا ماما كرهتها مش طيقاها

 

حاسة بيكي يا حبيبتي والله حاسة بيكي يا نور عيني . بصي يا مروة

احنا نشوف موضوع الخلفة الاول وبعدين نشوف حل مع حماتك .

قومي دلوقتي اغسلي وشك عشان تروحي مع جوزك

 

حاضر يا ماما هسمع كلامك

.
.
.
انت جيت يا فتحي

ايوة جيت يا امي . ادخلي انتي يا مروة ارتاحي

ترتاح من ايه ياخويا . من وش امك ؟

امي بقولك ايه بالله عليكي سيبي مروة في حالها

الله اكبر يا حلاوة باين حماتك وصتك تبهدل امك عشان تراضي بنتها

والله العظيم حرام عليكي اللي بتعمليه فينا ده . هي كانت مروة عملتلك ايه عشان تكرهيها بالشكل ده

انا لا بكرهها ولا بحبها . انا قلبي عليك انت وعلى مصلحتك ونفسي اشوف ولادك يا ضنايا

لو سمحتي يا امي دي حاجة تخصني انا ومراتي وبس ولو سمحتي ما تتدخليش

 

كدة يا فتحي . هي وصلت لكدة اهئ اهئ اهئ . انا مااتدخلش في حياتك ؟

كتر خيرك يابني .طب يا فتحي والله ما انا قاعدة في البيت انا هلم هدومي

واروح عند ممدوح حبيبي ومراته اللي زي السكر ايناس الغالية

 

يا امي استني بس نتفاهم

مافيش تفاهم انا داخلة الم هدومي وخلي الننوسة تنفعك

.
.
.
ترررررررررررررررررررررررن ترررررررررررررررررررررررررن

مين

افتحي يا ايناس

مين اللي بيرن الجرس

انا حماتك ايه مش عارفة صوتي ولا بتستهبلي

يادي النيلة ايه اللي حدفها علينا الساعة دي .

افتحي يابت

اهلا اهلا اهلا طنط حبيبتي وحشتيني اموووووووووووووووه اتفضلي

ازيك يا ايناس

الحمدلله يا طنط

ازي امك

الحمدلله كويسة خالص وبتسلم عليكي

الله لا يسلمها البعيدة

لكن ايه يا طنط الشنطة الكبيرة دي هو حضرتك مسافرة

لأ حضرتي جاية اقعد في بيت ابني . عندك مانع ؟

تقعدي فين !!! اهلااااااااااااااااااااااااااااااااااااااااااااااا يا مفاجآتك يا طنط

فين ممدوح

ممدوح نايم هصحيه لحضرتك

والعيال فين

ناموا هما كمان . دول هيصعقوا من الفرحة لما يشوفوكو

صاعقة لما تشيلك

ممدوح اصحى يا ممدوح الحق امك برا هي وشنطة هدومها .

امي !!!! اهلا وسهلا بيها

اهلا وسهلا بيها فين يا ممدوح . ان شاء الله هتنام فين

تنام في اوضتنا

يا سلام واحنا ننام فين

خلاص تنام في اوضة الولاد

ياحلاوتك وانهي سرير اللي هيستحمل امك ان شاء الله

ايناس ايناس ايناس سدي بقك شوية . هروح اسلم على امي وربنا يحلها

ال يا قاعدين يكفيكو شر الجايين

امي امي حبيبتي الغالية ازيك يا ست الكل

ازيك يا ممدوح يا حبيبي

منوراني يا ست الحبايب

دا نورك يا حبيب امك

تشربي ايه يا امي

اشرب ايه دا ايه يا واد انت . انا جعانة عايزة اتعشى

حاضر يا حبيبتي

ايناس

نعمين

حضري عشا لامي

حاضر حاضر يا ممدوح

بس ايه الخطوة العزيزة دي يا ست الكل

الظروف حكمت اعمل ايه

مالك زعلانة من ايه

زعلانة من الدنيا بحالها . اخوك بهدلني عشان بسأل مراته على موضوع الخلفة

بصراحة يا طنط عندك حق دي طولت اوي

مش كدة برضو يا ايناس

ايناس ما تتدخليش وتولعيها اكتر

ما تسيبها يابني الست بتقول الحق . يوه . مالك يا ايناس تخنانة اوي كدة وزايدة يجي عشرة كيلو

اصل انا حامل يا طنط

يا لهوي . حامل يعني ايه دانتي عندك اربع عيال

جرا ايه يا طنط هو انتي لا عاجبك اللي بتخلف ولا اللي قاطعة خلف

 

ايوة يختي خلفي وانتي غرمانة حاجة . ابني يشقى ويتعب وانتي تجبيله

عيال ينحلوا وبره وياخدوا اللي وراه واللي قدامه عشان ما يلاقيش

في جيبه تمن حزمة فجل يخش بيها على امه

 

يا امي ربنا اللي بيرزق

ايوة يابني بس الست لازم تحس بجوزها وتخلي عندها دم

يا طنط طيب ما حضرتك مخلفة خمسة

هو انتي يابت هتعملي راسك براسي ولا ايه . وانتي مالك ومالي

طب يا امي يلا عشان تنامي في اوضة الولاد

وماله زي بعضه روح دخلي الشنطة جوا

.
.
.
ماما يا ماما

يا ماما يا ماما

ايه يا عمار ايه اللي صحاك انت واخواتك

مين الست التخينة اللي نايمة في سريري دي

ايه ياعمار دي تيتة مامة بابا يا حبيبي

يا ماما انا مش عارف انام . دي عاملة دوشة بمناخيرها

معلش يا حبيبي هنعمل ايه ظروفنا كدة

طيب ما تصحيها عشان تمشي

بس يا ولد لحسن بابا يسمعك يطين عيشتك روح نام

انام ازاي

حط قطنتين في ودانك ونام وامشي من وشي وخلي اخواتك ينامو
.
.
.

ونكمل في الحلقة الثانية عشر بإذن الله
.
إلى اللقاء في الحلقة الثانية عشر

.
.
.
بقلم الكاتبة هبة نور

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *