مسلسل ورقة جواز عرفي الحلقة التاسعة والعشرون والثلاثون والأخيرة

الحلقة التاسعة والعشرون

تانى يوم الصبح
صحى هشام فى ميعاده ملقاش شرين زى العاده محضره الفطار بص على اوضتها لقى الاوضه مفتوحه
هشام : شرين …………..يا شرين
دخل الاوضه ملقاش اى حد ولقى على المكتب علبة وجواب
هشام قاعد على الكرسى وهو مش قادر يستوعب ان شرين مشت خلاص
فتح العلبه لقى شبكة شرين
وفتح الجواب لقى شيك بـ100 الف جنيه وورقه مكتوب فيها
” انهارده السنه خلصت وكل حاجه بينا سواء حلوه او وحشه برده خلصت انا سبتلك الشبكه وشيك المؤخر انا مش محتجاهم وكمان قدمت استقالتى من الشركه عشان احس انى خلاص مبقتشى استغلاليه وارجع بقى لشرين بتاع زمان ………انا مش هنكر ان مشاعرى اتحركت ولاول مره وانا معاك بس مش هقدر اقول انه حب ولا انت برده اللى حسيته ده حب ده بس حصل عشان احنا كنا مع بعض فتره كبيره ممكن نسميها تعود او عشره او شفقه اى حاجه بس الاكيد انه مش حب …….انا عارفه ان هشام اللى بيشوف الكلام ده مش هو هشام اللى عرفته من سنه وعشان كده انا مبقتشى بكرهك ولا زعلانه منك بس ياريت كفايه لحد كده عشان بجد انا تعبت ومن حقى انى اعيش بقى حياتى زى مكنت بحلم وزى مانا عاوزه من غير مبقى مغصوبه عليها انا بجد بتمنالك السعاده وان شاء الله هتلاقى البنت اللى هتحبها بجد وتكمل معاها بقيت حياتك انت انسان كويس اوى وان شاء الله هتلاقى اللى تستاهلك ……..اخر طلب هطلبه منك انى بجد مش عاوزه اشوفك تانى ….. اه وبعد اذنك اناهحتفظ بالسلسله اللى كنت جيبهالى فى عيد ميلادى عشان هى غاليه عليه اوى ……مع السلامه”
هشام مسك الورقه ودموعه بتنزل : بس والله انا بحبك ……بجد بحبك اوى يا شرين …..بس انا هنفذلك طلبك عشان انا واعد نفسى انى مش هزعلك وهعمل كل اللى انتى عاوزاه ….بس بجد انا بحبك اوى

………………………………………………………………………….

شريفه بتحضر الفطار لشهد عشان تنزل كليتها وفجاءه لقت جرس الباب بيرن
شريفه : شهد شوفى مين ……خير الله ما اجعله خير
وطلعت من المطبخ وشهد بتفتح الباب
شهد باستغراب : شرين
شريفه جيه تجرى من المطبخ : شرين …..فى ايه مالك ……وايه الشنطه دى
شرين : ممكن ادخل الاول وبعدين هحكى كل حاجه
شرين دخلت وشهد وشريفه بيبصو لبعض بقلق
شرين : انا هحكلمك كل حاجه بس ياريت محدش يزعل منى
شرين بداءت تحكى لمامتها وشهد كل حاجه وازاى اتجوزت هشام والورقه العرفى ووسط كلمها بداءت تعيط
شريفه قربت منها واخدتها فى حضنها : كل ده كنتى شيلاه لوحدك …..ليه مقولتيش من الاول
شرين بعياط : كنت خايفه على بابا وقتها كان تعبان الله يرحمه
شريفه : بقى هشام كده واحنا اللى حبناه بجد ربنا ينتقمـــــــــ
شرين : لا ياماما متدعيش عليه هشام حبكم بجد هشام كويس والله بلاش تكرهيه هو عمل كده عشان مكنشى يعرف الغلط من الصح وكان بياذى نفسه اكتر ماذى الناس حرام نبقى احنا والزمن عليه عشان خاطرى متكرهوش
شهد : انتى بتحبيه يا شرين
شرين بارتباك : لاء دى مجرد شفقه ……مش حب
شهد : متاكده
شرين : ان هقوم ادخل اوضتى انا تعبانه اوى
ودخلت شرين اوضتها وفضلت شهد قاعده جانب مامتها
شريفه : اختك شكلها مش طبيعيى
شهد : عشان شرين بتحب هشام بس غاويه تتعب نفسها
شريفه : بعد اللى عمله؟؟
شهد : ماما متظلمهوش هشام بيحبها بجد واتغير وهو معانا ومشوفناش منه حاجه وحشه بجد هو صعبان عليه اوى
شريفه : واختك مش صعبانه عليه
شهد بزعل : صعبانه عليه برده …….. ربنا يهديهم لبعض …….انا هنزل بقى سلام
فات شهر وحالة شرين بتسوء مش بتكلم حد على طول فى اوضتها وبتلعب بالسلسله اللى فى رقبتها وبتفكر فى هشام وتفتكر كلام نرمين تعيط
هشام برده حالته النفسيه وحشه بس بيروح شغله وبيضيع وقت كبير فيه ورفض يروح عند باباه وفضل قاعد فى شقته وكان بينام فى الاوضه بتاع شرين عشان ريحتها فيها وكان دايما بيصلى وبيدعى لشرين فكل صلاه
وكان على طول بيتصل بشهد وشريفه وبيعرف اخبار شرين بس من غير ما تعرف حاجه

…………………………………………………………………………..

فى يوم شهد كانت فى كليتها وقاعده فالكافتريا حزينه اوى لوحدها
……..: سرحانه فايه
شهد وهى مبرقه : احمد ……. انتى جيت امتى
احمد: لسه واصل من ساعه ……….انا نازل عشان نتجوز
شهد بحزن : معدشى ينفع
احمد : ليه بتقولى كده
شهد : انت معرفتش اللى حصل
احمد : للاسف عرفت وزعلت اوى بابا كلمنى وحكالى على حالة هشام
شهد : وشرين كمان حالتها وحشه اوى
احمد : عشان كده احنا لازم نتجوز
شهد : ايه الجنان ده ………. احنا فاايه ولا فى ايه .؟؟
احمد: احنا لازم نربط العيلتين ببعض عشان نقرب المسافه ……صدقينى ده مصلحه ليهم ولينا كمان اكيد
شهد : تفتكر ماما وشرين هيوافقو بعد اللى حصل
احمد: بلاش مقاطعه ……..احنا نحاول ونشوف هيحصل ايه
شهد : اوكى لما نشوف

……………………………………………………………………………..

شهد روحت دخلت على شرين وهى فرحانه
شهد : شيرى حبيبتى عندى ليكى خبر حلو اوى
شرين : بجد قولى نفسى افرح بقى
شهد : انا جايلى عريس
شرين : بجد …. مبروك يا شهد ربنا يسعدك ….بس مين ده بقى اللى امه داعيه عليه
شهد : داعيه عليه قصدك دعياله ………العريس يا ستى يبقى احمد
شرين باستغراب : احمد مين ؟؟
شهد بارتباك : احمد اخو هشام
شرين اول لما سمعت اسم هشام سكتت شويه : لا ء يا شهد
شهد : لاء ليه …….. احنا بنحب بعض
شرين : مفيش حاجه اسمها حب ……… انا قولت خلاص لاء يعنى لاء
وقامت شرين وسابت شهد ودخلت اوضتها
وشويه ولقت موبيلها بيرن

الحلقة الاخيرة

شرين قاعده فى اوضتها لقت تليفونها بيرن مسكته لقت اسم هشام على التليفون
شرين وقلبها بيدق جامد وصوتها متحاش : السلام عليكم
هشام : وعليكم السلام ………….وحشتينى
شرين ساكته مش بترد
هشام بحزن : انا بكلمك عشان موضوع احمد وشهد …….بصى يا شرين انا ظلمتك زمان فبلاش تخلينى ابقى سبب فى ظلم احمد وشهد كمان احمد وشهد فعلا بيحبو بعض وانتى عارفه احمد كويس بجد راجل وهيحافظ على شهد هو مش زيى مقدرتش احافظ عليكى ……..عشان خاطرى ده لو عندى ليكى خاطرى او عشره زى مقولتى بلاش ترفضى بسببى ……ولو رفضك ده عشان انتى خايفه تشوفينى انا بوعدك انى هنفذ طلبك انك متشفونيش تانى
هشام سكت شويه : انا هسافر دبى بدل احمد وامسك المكتب هناك عشان مضايقيش اكتر من كده ……..بس بعد اذنك تسمحيلى بس احضر الفرح وصدقينى مش هضايقك ……….وانا بحد بتمنالك السعاده ……مع السلامه
شرين ساكته ودموعها بتنزل من غير صوت ولما خلص هشام : مع السلامه وقفلت التليفون وانهارت جامد فالعياط

……………………………………………………………………………..

هشام سافر واحمد خطب شهد والفرح بعد شهر وكان الكل مشغول وقبل الفرح باسبوع شرين كانت قاعده فى اوضتها مع ليلى
ليلى : انتى عجبك شكلك ده
شرين بتحدى : ماله شكلى
ليلى : انت خسيتى يابنتى النص وعينك بقت سوداء من كتر العياط وقلة النوم ………ليه بتعملى كده فى نفسك ……..انتى بتحبيه اعترفى بقى وبلاش تظلمى نفسك كده
شرين بعياط : اه بحبه ارتحتو كده …….بحبه اوى كمان ووحشنى اوى نفسى اشوفه ونفسى اتكلم معاه زى الاول…….نفسى  احس بالامان وهو جانبى اهتم بيه واهتم بحاجته واحضرله الاكل …………..حتى خناقه معايا وحشنى …… انا تعبانه اوى يا ليلى
ليلى وهى بتحضنها : طب ليه عملتى كده ليه مكملتيش وسمعتيه
شرين حكت لليلى كلام نرمين ليها ومقبلتها لهشام
ليلى : تانى نرمين يا شرين ………..متسمعيش ليها هى اكيد بتقول كده عشان تضايقك………. انتى مش عرفاها…….. وبعدين لو كلامها صح متجوزوش ليه وهشام سافر ليه
شرين : مش عارفه بس انا وقتها كنت مضايقه اوى ………كنت بحاول اقنع نفسى انى مش بحبه انى بس اتعودت عليه بس بعد ما سبت البيت حسيت انا قد ايه بحبه
ليلى : هو خلاص طلقك عند الماذون
شرين : مش عارفه ومسالتش …………عمو عبد الرحمن قالى انه هيخلص الموضوع
ليلى : خير ………. ان شاء الله هيبقى خير ………..خلاص بقى بطلى عياط عشان نفرح بشهد واحمد

…………………………………………………………………………….

قبل الفرح بيوم نزل هشام مصر عشان يحضر الفرح وفاليوم ده كان عند كريم وليلى بليل
هشام : شرين وحشانى اوى …….متعرفيش اخبارها ايه ياليلى
ليلى : كويسه
كريم : انتم الاتنين معذبين نفسكم على الفاضى
هشام : انا بجد بحبها بس مش عاوز اضايقها ……..خليها براحتها بدام مبسوطه كده
ليلى : هشام بصراحه كده شرين مش مبسوطه وهى كمان بتحبك
هشام : بجد ………ازاى يعنى
ليلى : انا هحكيلك
وهحكت ليلى لهشام وكريم كل حاجه وكلام شرين ليها
 هشام بفرحه : بجد ……….هى نرمين الغبيه دى …….بس خلاص انا هتصرف
ليلى : هشام هو انت طلقت شرين
هشام : لاء بابا اللى قال هيعمل الاجرائات وقالى هبقى اقولك وبعدين انا سافرت
ليلى بفرحه : يعنى انت وشرين لسه متجوزين
هشام وهى بيضحك : ههههههههههههههه احنا نسينا نطلق
كريم : والله انتم مجانين

………………………………………………………………………………

يوم الفرح الكل فالقاعه وشرين وليلى مع شهد فالكوافير وشويه جه احمد عشان يخدهم هو كريم
شرين بصت بعنيها تدول على هشام ملقتهوش مشت وهى زعلانه كانت نفسها تشوفه وراحو كلهم على القاعه
فى القاعه الكل قاعد وشرين عنيها على الباب وشويه ودخل هشام وفى ايده نرمين وهى لبسه فستان تقريبا عريان
شرين من الصدمه مقدرتشى تمسك دموعها وقامت دخلت الحمام
شويه وحاولت تمسك اعصابها وتمسح دموعها وضبطت الميك اب بتاعها ودخلت تانى القاعه
شرين لسه دخله لقت هشام واقف على البيست وماسك فى ايده المايك وبيبص عليها
شرين وقفت متجمده مكانها
هشام فى المايك : السلام عليكم …….انا هشام عبد الرحمن ……..معلشى هحكلكم حكايه كده ومش عاوزكم تزهقو ……..من حوالى سنه وشهرين كنت انسان مستهتر جدا وصايع وبشرب مخدرات وكل حاجه وحشه فالدنيا انا عملتها لدرجة انى اتجوزت عرفى من وحده هى اصلا متعرفنيش …..اه بجد متستغربوش …………كانت لعبه برضى بيها وحده رخيصه اوى ومش محترمه بتحب اذيت الناس وبس
وبص لنرمين وهو بيضحك نرمين قامت بغيظ وسابت الفرح ومشت
هشام وهو بيكمل : وعشان البنت اللى اتجوزتها دى كانت محترمه اوى وبتحب اهلها اوى وخافت عليهم من الفضيحه وافقت بالاتفاق مع والدى انها تتجوزنى رسمى لمدة سنه  وشافو انهم كده بيعقبونى وانهم ممكن يعلمونى حاجه صح ………….وفعلا اتجوزت احسن انسانه فالدنيا انسانه رغم اذيتى ليها محاولتشى تكرهنى ولا تضايقنى كانت بتعملى كل حاجه عملتنى ازاى اصلى واقراء قران علمتنى ايه هو معنى العيله علمتنى ازاى اسامح واساعد غيرى حتى لو اذانى بمعنى اصح علمتنى اكون انسان وعلمتنى ازاى اكون راجل محترم وقد المسؤليه ومكتفتشى بكده وبس لا دى كمان علمت اهلى وخلتنا لاول مره نتجمع ونكون مبسوطين ونحب بعض ونهتم ببعض
……….وكمان علمتنى اهم حاجه علمتنى ازاى احب وازاى اضحى كل مره كنت بصلى فيها كنت بدعى وانا ساجد زى ماقالتلى  كنت بقول ربنا يخليها ليا وتحبنى زى مانا بحبها ونكمل حياتنا طول عمرنا مع بعض واحنا مبسوطين … وهفضل ادعى بكده طول عمرى ……..شرين انا بحبك بجد والله العظيم بحبك مش شفقه ولا تعود ولا عشره ……….وعارف انك انتى كمان بتحبينى رغم كل عيوبى بس قلبك الطيب حبنى عشان خاطرى بلاش نعذب بعض اكتر من كده تعالى نبداء من جديد …….قدام كل الناس دى قدام اهلى واهلك انا بقولك انى بحبك وعاوزك تكونى مراتى طول العمر …….موافقه
شرين كانت واقفه ودموعها بتنزل غصب عنها مش عارفه هى دموع فرحه ولا دموع حزن ولا دموع اشتياق لهشام
وشويه وقربت منه وهزت راسها بالموافقه
هشام بفرحه : بجد موافقه
شرين بعياط : موافقه ……. وبحبك اوى
هشام بيقرب عشان يحضنها شرين رجعت لوراء: مينفعشى لما نتجوز
هشام وهو بيشدها لحضنه : احنا مطلقناش اصلا يا مجنونه
هشام شالها وقعد يلف بيها جامد من كتر الفرحه والكل كان مبسوط وبيصقفلهم
وشريفه كانت بتعيط من الفرحه هى وفريده
النهايــــــــــــــــــــــــــه

التربيه والعيله بيفرق كتير فتصرفات كل واحد فينا وياما ناس عامله نفسها محترمه ومن جواه سواد وعيظ من كل الناس وياما ناس بتعمل حاجات غلط بس هى كويسه وده مش معناه انهم صح بس مفيش حد فهمهم الصح من الغلط
فى ناس كتير بجد بتعمل حاجات غلط وهى متعرفشى وفى ناس اكتر عارفه بس مش عارفه ايه الصح ………..لو فايدنا ننصح لحد بس بطريقه مناسبه عشان يتعلم ياريت منبخلشى بلاش نتريق على تصرفات غيرنا واحنا مش عارفين اسبابها
وياريت كل واحد قرار انه هيكون اسره يكون قد القرار ده ويكونها ويربيها صح عشان دى مسؤليته قدام نفسه والمجتمع وكمان قدام ربنا
وبلاش نهتم بالناس وكلامهم ومشاغلنا وننسى عيالنا وننسى اهتمامنا بيهم عشان كده احنا ممكن نطلع جيل جاهل مش متربى وكمان ميقدرشى يتحمل المسؤليه ربنا يهدينا ويحمينا من كل شر

———–———-———————-————

 ماتنسوش تعلقوا علي الحلقة في صفحة مدام طاسة والست حلة

 الى اللقاء مع مسلسل جديد

شكر خاص للكاتبة :ريم أحمد

 

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *