مسلسل أحبك أبي … ولكن “الحلقة الثالثة”

الحلقة الثالثة

حازم كان مع باباه فى العربيه وفجاءه افتكر تغريد وتصرفها معاه وابتسم ابتسامه غريبه اوى

عبد السلام : انت اتجننت يا حازم

حازم وهو بيفوق من سرحانه : هااا لا ليه

عبد السلام : انت بتضحك مع نفسك

حازم : لا ابدا بس افتكرت حاجه …………..صحيح يابابا انت فاكر عمو محمود صادق اللى فالقاهره

عبد السلام بعد متغيرت ملامحه : اه طبعا بتسال ليه

حازم : اصلى شوفت امبارح تغريد بنته فالنادى ……….بس قابلتنى مقابله وحشه اوى وكنت بسالها عن باباها وتامر ومامتها وسابتنى ومشت

عبد السلام بحزن : على فكره مامتها توفت من سنتين واخوها تامر مسافر بره جاتله بعثه وسافر من حوالى سنه وهى عايشه هنا مع خالتها

حازم باستغراب : وعمو محمود فين …….؟؟

عبد السلام : عايش فالقاهره

حازم : مش فاهم برضه طب هى ليه هنا ومش عايشه مع باباها وليه حزينه كده دى اتغيرت اوى دى مكنتشى بتبطل هزار وضحك

عبد السلام : بعدين يا حازم هتعرف ……….ع فكره تغريد بتشتغل معايا فالمستشفى لو شوفتها متتكلمشى معاها كتير ولو اتعاملت معاك  بطريقه

رسمى متزعلشى منها

حازم : مش فاهم برضه ليه كل ده

عبد السلام : قولتلك بعدين يلا عشان وصلنا

حازم بص لباباه وهو مستغرب ومش فاهم حاجه

………………………………………………………………………….

 

فات حوالى نص ساعه وعبد السلام وحازم قاعدين فالمكتب

عبد السلام : هتقوم معايا دلوقتى تشوف الجديد فالمستشفى وكمان اعرفك ع دكاترة القلب اللى هيشتغلو معاك

حازم : بابا بس شغلى هنا مش بشكل نهائى ……….انا قدام 3 شهور اجازه وهكون معاك فيهم بس بعد كده ممكن اقبل العرض اللى جايلى

عبد السلام : مش وقته الكلام فى الموضوع ده ياله قوم معايا

حازم بينه وبين نفسه ” هو كل حاجه مش وقته “

 

عبد السلام كان ماشى مع حازم فالمستشفى وهو بيفرجه التطورات اللى عملها فالمستشفى وهو فخور اوى بشغله

عبد السلام : عندى فى قسم القلب 4 دكاتره بس طبعا انت هتكون المشرف بتاعهم ……..مش عشان ابنى عشان انت معك الدكتوره يعنى خبره

اكتر منهم

حازم  باستسلام : حاضر

عبد السلام : اه وع فكره تغريد من الاربع دكاتره دول

حازم بفرحه : بجد طب تمام

عبد السلام : ده قسم القلب …..وده مكتب الدكاتره …..وده بقى هيبقى مكتبك تعالى عشان تشوفه

حازم : لا اتعرف ع الدكاتره الاول المكتب مش هيطير

عبد السلام : ماشى اللى يرحك

ودخل عبد السلام مكتب الدكاتره : السلام عليكم

مكنشى موجود غير دكتور واحد قاعد يشتغل ع مكتبه

محمد : وعليكم السلام ……..اهلا يا دكتور

عبد السلام : معلشى هعطلك شويه ……..اقدملك الدكتور حازم  هيبقى المشرف الجددي بتاعكو

محمد وهو قايم من مكتبه : اهلا وسهلا يا دكتور

وسلم على حازم

عبد السلام : الباقى فين ؟؟

محمد : دكتوره نهى ودكتور احمد وخدين الشفت بليل انهارده

عبد السلام : ودكتور تغريد مجاتشى لسه ولا ايه

محمد : لا دكتور تغريد هنا من بدرى بس تلف ع الحالات

عبد السلام : طيب ……..احنا فى مكتب دكتور حازم ……..لما تخلص شغلها ابعتهالى

محمد : حاضر يا دكتور ……….واتشرفنا يا دكتور حازم ونقدر نتعاون ان شاء الله

حازم بابتسامه : ان شاء الله

وخرجو وراحو ع مكتب حازم وقاعدو شويه فيه وبعد حوالى ساعه

الباب كان بيخبط

عبد السلام : ادخل

 

تغريد : السلام عليكم …….حضرتك بتسال عليا

عبد السلام : تعالى يا دكتوره ……….اقدملك الدكتور حازم طبعا تعرفيه …….من انهارده هيبقى المشرف على قسم القلب

تغريد بدون اى اهتمام : اهلا يا دكتور

عبد السلام : اخبار الشغل معاكى ايه

تغريد : الحمد لله الدكاتره هنا بيساعدونى وبتعلم منهم

عبد السلام وهو بيبص لحازم اللى عينه متشالتشى من على تغريد : تغريد اصغر دكتورة في المستشفى ولسه بتتعلم عشان كده عاوزك تساعدها

حازم : اكيد طبعا

تغريد : طب حضرتك عاوزنى فى حاجه …..؟؟

عبد السلام : لا شكرا تقدرى تتفضلى

تغريد : عن اذنكم

عبد السلام : طب وانا كمان هقوم بقى اروح مكتبى …….عندك دكتور محمد لو عاوز تساله على اى حاجه وتابع معاه الحالات

حازم : اوكى

خرج عبد السلام وحازم فضل يفكر فى تغريد وهو سرحان

فلاش باك

حازم : عاوزه تدخلى كليه ايه يا تغريد

تغريد : طب طبعا

حازم : يا جامد …………اشمعنا

تغريد : كده عاوزه ابقى دكتوره اطفال

حازم : طفله هتعالج اطفال

تغريد : ع فكره انت رخم

حازم وبيحاول يبقى جد : مش تحترمى فرق السن

تغريد : عشان انا مش طفله ………….ويلا روح من هنا

حازم : وكمان بتطردينى من عندكم يعجبك كده يا عمو

محمود : بس بقى انتم على طول كده ناقر ونقير

تغريد : شايف يا بابا بيقول عليا ايه

حازم : طب اتخصصى قلب زى وانا مش هقول عليكى طفله

تغريد : بالعند فيك مش هتخصص قلب

تامر : مش فاهم انتم بتتخانقو على ايه…………ياعنى شوفتى نفسك دخلتى طب

تغريد وهى قايمه : هدخل بالغيظه فيكم كلكم

وبصت لحازم وهى بطلع لسانه : ومش هتخصص قلب

 

رجع حازم للواقع وهو بيكلم نفسه

“ياترى ايه اللى غيرك كده يا تغريد ………وليه اتخصصتى قلب وايه اللى حصل بينك وبين عمو محمود بجد نفسى اعرف ايه اللى حصل “

وفى وسط سرحانه خبط الباب ودخلت تغريد وهى لونها مخطوف

تغريد : دكتور حازم فى حاله مستعجله ودكتور محمد معاه حاله

حازم وهو بيقوم من مكان : فين ؟؟

ومشو هم الاتنين على مكان الحاله كانت ست كبيره وحالتها صعبه جدا حازم حاول معاه كتير بس للاسف الحاله اتوفت

تغريد كانت وقفه وراه ووشها اصفر وشكلها مش طبيعى

حازم : البقاء الله ………..دكتوره تغريد روحى قولى لاهل المريضه ان حاله توفت

تغريد بخضه : مين انا ………….لاء

حازم بعصبيه : لاء ايه يا دكتوره ……….اتفضلى شوفى شغلك

تغريد مشت وخرجت من الاوضه كان واقف بره بنت المريضه وجوزها

تغريد بصوت مبحوح : للاسف ……….للاسف البقاء لله

البنت بتعيط جامد : ماما ………لا متقوليش كده يا ماما

تغريد : حست انها دايخه ومش شايفه كويس: احنا عاملنا الــــــــــــــــ

ووقعت اغمى عليها


———–———-———————-————

ونكمل في الحلقة الرابعة  .. الى اللقاء في الحلقة الرابعة

بقلم الكاتبة :ريم أحمد

 

 

مقالات ذات صله