طريقة عمل مكرونه بالبشاميل والفراخ
طريقة عمل مكرونه بالبشاميل والفراخ
تجيبى كيلو الا ربع مكرونه قلم وتسلقيه عادى
ثانيا مقادير البشاميل وطريقة عمله:
8 معالق اكل سمنه ( ومتقوليش كتير الدقيق بيبقى اد السمنه اعملى وانتى ساكته لو سمحتى 
)
3 بيضات وسط
8 معالق اكل دقيق
كيلو لبن( اونص الكميه ميه ونصها لبنوتحطيهم على بعض براحتك)
ملح – فلفل ابيض ( لومفيش يبقى رشه صغيره فلفل اسود عشان البشاميل ميغمقش)
نجيب الحله اللى هنعمل فيها البشاميل ونحطها على النار ونحط السمنه
النار تكون وسط عشان الدقيق ميتحرقش بس مش هاديه اوى نحط الدقيق وبالمضرب السلك نقلب عشان ميكلكعش ولا يتحرق
هتلاقى 5 دقايق ولونه غير شويه كده تمام اوعى يتحرق ركزى بالله عليكى
نشيله من على النار بس خلى النار ولعه متطفيش هنرجعه تانى وننزل واحده واحده باللبن واحنا بنقلب بسرعه عشان ميكلكعش ونرجعه على النار مع التقليب بسرعه هيبتدى يتقل معاكى كل لما يسخن لحدما يبقى لا سايل اوى ولا تقيييييل اوى وسط تمام كده ترفعيه من على النار وتسيبيه يبرد ليه بقى عشان لما نحط البيض ميبقاش بيض مقلى من السخونيه ..
الصور
هنرجع للبشاميل بعد ما يبرد
مقادير وطريقة عمل حشوة الفراخ:
صدر فرخه مش متقطع تروحى للفرارجى تقوليله عايزه صدر على بعضه(لوملقتيش يبقى هاتى بانيه عادى مفيش مشكله)
بصله متوسطه
ملح فلفل اسود بهارات
هنجيب الدر ونقطعه مكعبات وسط ولو بانيه قطعيه حتت عادى ونجيب الكبه (معندكيش كبه يبقى مفرمه يدوى عاديه …. معندكيش لا ده ولا ده يبقى قطعى البانيه مكعبات صغيره اوى عشان الصدر يكفى الصينيه اوى تجيبى صدرين)
هنحط البصل فى الكبه ونفرمه مش ناعم ومش خشن وسط(لو على ايدك بالسكينه وقطعيه عادى )
بعدين نشيل البصل ونحط الفراخ تتفرم فرمه بسيطه متنعميهاش اوى
نكون حاطين حله على النار فيها معلقتين سمنه او زيت حسب رغبتك
نشوح البصل لحد ما يصفر وننزل بالفراخ ونقلب هنلاقى لون الفراخ بقى ابيض ونزلت عصاره تمام كده تحطى معلقتين ميه والملح والفلفل وبهارات بسيطه وتقلبى وغطيها ووطى النار وسيبيها لحد ما تشرب ميتها
نصيحه (دوقى اكلك وظبطيه الدواقه بتخليكى تظبطى طعم الحاجه)
وده شكلها النهائى
عايزه تضيفى قطع طماطم ضيفى زيتون اسود ماشى براحتك
نيجى بقى للمرحله الاخيره
البشاميل هيكون برد نجيبه ونحط عليه الملح والفلفل ودوقى لحد ما تظبطى ملحك زى ما تحبى وبعدين نحط الثلاث بيضات وتقلبى كويس اوى لحدما يبقاش للبيض اثر
نجيب حله اوطبق ونحط نص كمية المكرونه ونحط عليها شوية بشاميل مش كتير ونقلب وبعدين نجيب الصينيه اللى هنعمل فيها ندهنا معلقة سمنه ونرش بقسماط مطحون ونوزعه كويس ونفضى الزياده بعدين نجيب المكرونه اللى عليها البشاميل ونفرده كويس ونضغط عليها بس مش اوى عشان متعيطش هههههه حبه خفه على الماشى المهم نجيب الحشوه ونفردها عليها كويس ونجيب نص المكرونه التانى نعمله بالبشاميل برضه ونفرده على الوش وبعدين نجيب البشاميل اللى فضل ونحطه على الوش ونساويه بالراحه وندخلها الفرن على درجة حراره 200 لحد ما تحمر هى بتاخدوقت شويه بس الطعم ايه حكايه
ودى النتيجه النهائيه
بالهنا والشفا
منقوووووول
