نشرة اخبار المتجوزين
خبر عااااااااااااااااااااااااااااااااااااااجل
تعالوا بسرعة
نجاة الاستاذ راضي من تحت انقاض مراته وفرحة عارمة تملأ أجواء العمارة
تمكن سكان العمارة المتطوعين في حملة انقاذ الاستاذ راضي
من انتشاله حيا بعد خمسة ساعات من تراكم مراته المكونة
من خمسين طن من اللحوم البشرية المركزة في القاعدة
وذلك بعد الاستغاثة والصراخ ومعنا على الهاتف الاستاذ راضي
ايوا يا استاذ راضي حمدا لله على سلامتك ايها الرجل الهمام
الله يسلمك يا استاذة حشرية
ياترى طلعت سليم ولا فيه كسور وكدمات
أنا طلعت مفشفش ومدغدغ ومش قادر اقف على رجلي .
الناس انقذوني وشالوني ونيموني في السرير
طيب ايه اللي سكتك على مراتك لحد ماوصلت للحجم العائلي ده
انا تعبت معاها يا استاذة والله وهي مابتبطلش اكل طول اليوم .
فكرنا نشفطلها الدهون . جهاز شفط الدهون انفجر في وشنا
قولتيلها تعمل ريجيم واشتركتيلها في مركز للتخسيس في الشارع
اللي ورانا لقيتها وهي نازلة واخدة كيس نايلون مليان سندوتشات
بطاطس محمرة ولحمة ولما سألتها ايه اللي انتي بتعمليه ده ياست
انتي قالتلي اصلي بجوع في السكة وبحب اتسلى وانا ماشية
يالهوي هي بتلحق تجوع لحد مابتوصل للشارع اللي وراكو
شوفتي المأساة اللي انا فيها يا استاذة حشرية
ربنا معاك انت واللي زيك وياخد بيدكو ياخويا . اما اقوم اروح عشان احط المحشي ع النار
————————————————————-
سيداتي وستاتي نواصل اخبارنا مجددا
معاكو حشرية الرخمة من قناة مكسورين الجناح
نرجع للخبر بتاع الحاجة حفيظة اللي اتخانقت على ورك فرخة مع جوزها الحاجة اسماعيل
وجالنا فيديو مصور بالأحداث اتفضلوا شاهدوا الفيديو ولنا عودة ان شاء الله
ايه اللي مخبيه ورا ضهرك ده يا اسماعيل
مافيش حاجة يا حفيظة
وريني يا اسماعيل مخبي ايه عشان كدة كدة هعرف
يا ست سبيني في حالي بقى وروحي شوفي مصالح بيتك
طب وريني ايدك . ايه ده . مش ده ورك الفرخة بتاعي يا اسماعيل
لأ مش هو . يخلق من الشبه اربعين
سيب ورك الفرخة يا اسماعيل
ابعدي ايدك عن ورك الفرخة لاكسرهالك
بس ده بتاعي يا اسماعيل انت كلت بتاعك امبارح
وهاكل ده انهاردة . انتي شريكتي يا ست ولا ايه
طب يا اسماعيل والله ما مسمحاك في ورك الفرخة اطفحه بالسم الهاري
طبعا شوفنا الفيديو اللي بيعبر عن التضحية والإيثار بين الزوجين
وان الواحد مايهونش عليه ياكل اللقمة من غير التاني
حقيقي مستوى مشرف وراقي وحاجة تسر العين
لينا عودة مع باقي الاخبار والبلاوي
نشرة اخبار المتجوزين
نحن معكم وبكم
بفضايح البيوت نرتقي
عذرا للسرية حكاوينا ع المكشوف واللي يعيش ياما يشوف
نشرة اخبار المتجوزين بيوتكم على الشاشة
فاصل ونعود اليكم بأخبار طازة
انا بعت ام محمد وام خميس ينتشروا في الشوارع ويجيبوا اخبار
انتظرونا على قناة مكسورين الجناح
———————————————————
نشرة أخبار المتجوزين بقلم .. الكاتبة :هبة نور
