ترفيهمسلسل يا انا ياحماتي

مسلسل يا انا يا حماتي الحلقة العاشرة

الحلقه العاشرة

انا وبابا كنا واقفين في المستشفى مش فاهمين فى ايه والقلق والخوف هايقتلنا

الدكتور من ساعة مادخل عندها من حوالى نص ساعه ماطلعشي

يارب سترك

بعد شويه الدكتور خرج وملامحه مطمنشي

بابا بخوف : خير يادكتور

الدكتور : هندخلها العنايه المركزه … هى فى غيبوبه

انا بصرخه مكتومه : ااااااااااااااايه

بابا بعصبيه : اهدي يانهى

وبعدين بص للدكتور : ليه يادكتور … هى عندها ايه

الدكتور : لسه سبب الغيبوبه مش معروف .. ممكن تبقى جلطة …لسه مش هقدر

احدد دلوقتى بعد الاشعه هنعرف ايه السبب … بعد اذنكم

فضلت واقفه اعيط وبابا بيطبطب عليا

2015-08-14_202155

قطع عياطى صوت التليفون وكان حسام مكنتش عارفه ارد واقوله ايه بس لو مردتشى هايقلق اكتر

انا وانا بحاول ابان طبيعيه : السلام عليكم

حسام : وعليكم السلام … ها يا نهى عملتى ايه

فضلت ساكته شويه

حسام بلهفه : ردى عليه فى ايه

انا : حسام طنط فالمستشفى

حسام بصدمه : ايه ….. ليه مالها

انا : لسه مش عارفين … انا لقتها واقعة على الارض وجبناها المستشفى والدكتور بيقول عندها غيبوبه

حسام : ايييييييه ….. انا بركب وهاجي حالاً …انتم فين بالظبط

انا : فى مستشفى ___

حسام بدموع : ماشى مسافة السكة

انا : حسام … خلى بالك من نفسك …. ان شاء الله هتكون كويسه

حسام بحزن : يارب . ان شاء الله

 

بعد كام ساعه كنت انا قاعدة بدعيلها وبابا قاعد جابني بيقرأ قرءان وبيدعيلها

شويه لقينا حسام جاي يجرى علينا كان دراعه متجبس ووشه فى كدمات كتير

حسام بدموع : ايه اللى حصل .. هى فين

بابا : تعالى يا حسام اهدى يابنى

ومسكه وقاعده على الكرسي

حسام : طمنى يا بابا …. الدكتور قال ايه

بابا : بيعملولها اشعه وتحاليل ولسه محدش رد علينا……. اقعد بس استريح ….. وهو

هايجي دلوقتي ويفهمنا

 

بعد حوالى نص ساعه

الدكتور قرب عليهم

حسام قام من مكانه بلهفه : خير يا دكتور انا ابنها … هى عندها ايه ؟

الدكتور : بصراحه بعد التحاليل والاشعه مفيش اى سبب عضوى للغيبوبه

حسام : يعنى ايه مش فاهم

الدكتور : احتمال كبير انها تكون غيبوبه نفسيه … اتعرضت لضغط

معين وبقت رافضه الحياه وانها ترجع تانى … يعنى الموضوع نفسي

2015-08-08_175307

انا وحسام بصينا لبعض وفضلنا ساكتين ومش عارفين نقول ايه

الدكتور : انا كلمت دكتور نفساني … وقالى خلي الناس القريبين منها

يقعدو معاها ويكلموها هى بتبقى سمعاهم …. وربنا كبير قادر يشفيها…. بعد اذنكم

وقتها حسيت بالذنب بطريقة مش طبيعية وفضلت اعيط بصوت مكتوم وحسام

كمان كان حاسس انه السبب وفضل واقف زى التايهه ولا بيعيط ولا بيتكلم

ولا فى اى ردة فعل غير انه تقريباً مغيب ومتنح

2015-08-08_175202

فات حوالي اسبوع

ومفيش اى جديد ولا هى بتفوق ولا حسام بيمشى من المستشفى وانا كنت بين

البيت بعمل اكل وبين المستشفى وبابا كان معظم الوقت معانا

حسام كل يوم كان بيدخل يقعد عندها ويتكلم معاها

وفى يوم كنت جيباله الاكل ودخلت عشان اقوله يطلع ياكل سمعت

 

حسام بدموع : ماما وحشتينى اوى …وحشنى حضنك مش هترجعيلى

تانى كده تسيبى حسام ابنك حبيبك لوحده يتعذب فالدنيا من غيرك …بس

انتى عارفه انتى عندك حق …عشان هو وحش وزعلك

وبعدين ابتسم ابتسامه بهته : فاكره وانا صغير لما كنت بزعلك كنت

بتستخبي مني وافضل ادور عليكي وفالاخر اقعد اعيط وانتى تجري عليا

وتخدينى فى حضنك … ها بقى مش هتيجي تجري عليا وتخديني في

حضنك زى زمان ….. للدرجادي انا مزعلك اوي كده

 

مسك ايديها وباسها بدموع : عشان خاطرى سامحيني وانا

مش هازعلك تانى بس متسبنيش لوحدي وتستخبي وتبعدي عني … ماما

ارجعيلي بقى انا عارف اني مش هاهون عليكي … ماما انا اسف وبحبك اوي

وفضل ماسك ايدها ويعيط

2015-08-13_150604

انا مقدرتش استحمل والدموع فى عنيا على منظرهم

خرجت وانا حسه انى السبب فى كل ده

تانى يوم روحت المستشفى حسام كان منظره صعب اوى دقنه

طويله ومش بياكل الا بسيط اوى وشكله مرهق وتعبان جدا

قربت منه : اخبارك ايه انهارده

حسام بارهاق : الحمد لله

انا : مش هتروح تنام وتستريح شويه

حسام : مش هستريح غير لما ماما تفوق

فضلت ساكته شويه

انا : ممكن اطلب منك طلب

 

حسام : طلب ايه ؟

انا : عاوزه ادخل لطنط ….ممكن

حسام باستغراب : ممكن … بس ليه ؟

انا : عاوزه اكلمها … انا عارفه انها هاتسمعنى … ممكن.؟

حسام : ماشى يانهى ادخليلها …. يمكن انتى تعملي اللى مقدرتش انااعمله

قومت ودخلتلها قاعدت جانبها وفضلت ابصلها شويه وانا سكته

وبعدين اخدت نفس طويل واتكلمت : طنط …طنط انتي سمعاني مش كده

مفيش اى ردة فعل

2015-08-13_150524

انا : بس انا حسه انك سمعاني … عارفه لما ماما الله يرحمها سبتنى

حسيت بقيمتها اوى فى حياتي وانتي كمان لما بعدتي عننا حسيت بقيمتك

وحسيت قد ايه انتي مهمه فى حياتي وحياة حسام  عشان كده انا حسه بتعبه

ووجعه …طب انتي عارفه كان نفسى اوى اقولك ياماما بدل كلمت طنط

الغلسه دي بس خوفت تزعلي او متتقبليهاش مني … انتي عارفه احنا

مشكلتنا ايه اننا بنحب حسام اوي بس حبنا ده ضره

فضلت ساكته شويه ومسكت ايدها : تعرفى انى بحبك يمكن صحيح مقولتهاش

قبل كده ولا حتى حسيستك بيها بس والله عمري ما فى يوم

كرهتك  انا عارفه اني غلطت وانتي كمان غلطتي بس برضه انا غلطي كان

اكبر … عشان خاطري ارجعي بقى عشان اقولك اني بحبك …ارجعي

عشان اصلح غلطي …ارجعي عشان احس بحنيتك وطيبتك اللى شوفتك

بتعاملي كل الناس بيها ماعدا انا …انا عارفه انك مش بتحبيني …طيب

لو انا المشكله انا هامشي بس انتي ارجعي …حسام محتاجلك اوي …

بلاش عشان خاطري انا عشان خاطر حسام … حسام تعبان اوي من

غيرك ماتخلنيش اعيش بذنب اني السبب فكل ده والله انا ماكنشي قصدي ازعلكوا اوي كده …

دموعى بداءت تنزل : طنط … لا قصدي ماما …من هنا ورايح هاقولك

ماما …. ارجعلنا بقى يا ماما عشان نقدر نعيش مبسوطين مع بعض

اوعدك اني مش هازعلك تانى ولو عاوزه اي حاجه هعملهالك ومش هبقى

زعلانه وهسمع كلامك … يلا بقى قومي عشان نخرج سوا ونتفسح

فكره لما خرجنا اول جوازنا مع بعض كنا مبسوطين ازاي …. يلا بقى قومي عشان خاطر حسام           

وفضلت اعيط شويه وحسيت بايدها بتضغط على ايدي

بصتلها بخضه لقيت صوابعها بتتحرك

جريت بسرعه بره : حسام ماما … حسام بتحرك ايدها والله انا شوفتها

حسام جرى بسرعه ونده للدكتور ودخلها

بعد شويه الدكتور خرج :مبروك … هى فاقت بس لسه الحاله مش مستقره

هنستنى كام ساعه وان شاء الله خير

حسام بفرحه خضنى فى حضنه وكان فرحان ومبسوط اوي

يااااااااااااااه كان وحشنى حضنه اوى بجد والفرحة اللي في عنيه كانت مخليانى طايره

2015-08-11_162017

فات كام يوم

والحمد لله فاقت واتنقلت اوضه عاديه وكنا كلنا حواليها

وفى وسط قاعدتنا حسام جالو تليفون وطلع بره وشوية رجع متنرفز جدا وباين عليه الضيق

قربت منه : حسام فى ايه .؟

حسام بضيق : الشغل

انا : ماله .

حسام وهو بيهمس : عاوزينى اقطع الاجازه وارجع بكره بيقولو فى شغل مهم

انا : بس انت دراعك لسه مخفش وبعدين مش هم مدينك شهر اجازه

حسام : مش عارف البشمهندس كلمنى وبيقولى موضوع مهم ولازم اسافر

انا : خلاص سافر عشان شغلك وعشان ميعملكشي مشكلة

حسام : مش هينفع يانهى وماما

انا : انا معاها اهوه وبابا معانا لو احتاجنا حاجه … وبعدين بكره

اصلا احنا هانروح يعنى ماتقلقشي وهى بقت كويسة الحمد لله

حسام بقلق : انتى متاكده انك هتقدرى على المسؤلية دي لوحدك

انا بابتسامه : ماتقلقشي … هقدر بجد ان شاء الله

حسام بتنهيده : ماشى يانهى … انا هسافر وهحاول ان شاء الله ارجع تاني فى اقرب وقت

انا : ان شاء الله

 

حسام قرب من مامته وقاعد جانبها وباس جيبنها

حسام : حبيبتى … معلشي انا مضر اسافر بكره

سهير بتعب : ليه

حسام : والله ياماما غصب عني … بس تقريباً فى مشكلة هناك … هاسافر اشوف

فى ايه وهارجعلك على طول

سهير : ربنا يعينك ياحبيبى … بس هتشتغل ازاى ودراعك كده

حسام : كلها يومين وهافك الجبس … متقلقيش عليا …. المهم انتي مش محتاجه

حاجه قبل ما اسافر

سهير بحب : محتاجه سلامتك يا حبيبى

حسام : نهى هتبقى معاكي واى حاجه تحتاجيها قوللها ع طول

سهير بصت عليا بنظرة حزن غريبة وسكتت

وفضلنا بقى كلنا نتكلم ونضحك عشان نفوقها

 

تانى يوم حسام سافر ورجعنا البيت كنت بشوف كل طلابتها بس المرادي

كان احساسي مختلف كنت بعمل كل حاجه وانا حبه اللي بعمله مش عشان

ارضي حسام وبس … بجد كنت حبه اوي اني اعمل لها حاجتها بـ ايديا وهى

كمان كانت مش بتغلس عليه زى اول بس مش عارفه ليه كانت دايما

بتبصلي بحزن وكأن فى حاجه عاوزه تقولهالي بس مترددة … وانا

محبتشي اضغط عليها ولا اضايقها

وفاتت الايام وهى بداءت تفوق وتقوم من مكانها وتتمشى في الشقه

وكانت ساعات بتصمم تعمل حاجات بسيطه فالشقه بس انا كنت على قد مااقدر مش بحاول اتعبها

وفى يوم كنت بروق فى المطبخ لقيتها دخله عليا

انا : بقلق … ماما اعملك حاجه

سهير : لاء … انتى خلصتي

انا : فضلى بس الطبقين دول واخلص … انتى محتاجه حاجه

سهير بتردد : عاوزه اتكلم معاكي شويه

انا بقلق : حاضر … اتفضلى انتى بس استريحي وانا دقايق وهاجي لحضرتك

سهير : ماشى

2015-08-14_202413

ومشت وسابنتى محتاره ” ياترى عاوزاني ليه “

 

*****************

ياترى عاوزاها في ايه ؟؟

ونكمل في الحلقة الحادية عشر

إلى اللقاء في الحلقة الحادية عشر بإذن الله

تجميع لحلقات مسلسل “يا انا يا حماتي “

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى