ترفيهمسلسل أم فتحي

مسلسل أم فتحي الحلقة العاشرة

الحلقة العاشرة


يا امي انتي مش فاهمة حاجة . هالة هي الغلطانة

وحتى لو كانت هالة هي الغلطانة ما يصحش تنصر مراتك عليها . دي مهما كان اختك .

لكن دي طلعت ولا نزلت مراتك وبكلمة واحدة تتحرم عليك وتغور في داهية

لا بجد دي اهانة وانا مش هستحمل اكتر من كدة . انا عايشة مذلولة في البيت ده والكل بيتحكم فيا

وايه يا حبيبتي اللي مصبرك ع الذل ما تلمي هدومك وتفارقينا

كدة برضو يا ماما . طب خلاص انا فعلا هلم هدومي

عاجبك كدة يا امي . عاجبك كدة يا هالة . والله لو مراتي سابت البيت انا كمان هسيبه ويبقى ده اخر اللي بينا

انت بتعلي صوتك عليا يا فتحي عشان خاطر المحروسة . طب يا فتحي على راحتك ياابني اللي عايز تعمله اعمله

 

 

مروة حبيبتي انتي بتعملي ايه بس

بلم هدومي . انا لازم امشي من هنا

تمشي من هنا ازاي

مش بعد كل التعب ده وكل اللي بعمله عشان مامتك ترضى عني وفي الاخر

بدل ماتشكرني على خدمتي ليها بتطردني من البيت


يا حبيبتي اهدي بس مش عايزين نكبر الموضوع

الموضوع كبير اوي يا فتحي من الاول وانا اللي بصغره ومابحبش

احكيلك على حاجة من اللي بيحصل وبشوفه

يا حبيبتي مجرد ما هالة هتمشي البيت هيهدا وكل حاجة هتبقى كويسة

اختك مش باين انها هتمشي وكمان انا مستغربة ان ماحدش فيكو حاول يصالحها على جوزها

يا حبيبتي لازم تعرفي ان هالة مالهاش كبير ومابتسمعش كلام حد عشان كدة

انا وممدوح مش بندخل في حياتها من اساسه

يا حبيبي دي بقالها شهرين هنا . انا خلاص تعبت . احنا بقالنا تلات شهور

متجوزين وماشوفتش يوم راحة في البيت ده . ياريتنا كنا جيبنا شقة يا فتحي حتى لو طولنا فترة الخطوبة

طب بس اهدي حبيبتي وان شاء الله كل الامور هتبقى كويسة .

انا هكلم ممدوح وهكلم اعمامي يجوا يشوفوا حل للست هالة اللي مقومة البيت حريقة دي
.
.
.
.
ترررررررررررررررررن تررررررررررررررررررررررررررن تررررررررررررررررررررررررن

الو ايوة يا فتحي

ازيك يا ممدوح

الله يسلمك يا فتحي عامل ايه

مش كويس

يا لطيف يارب . ليه كدة يا راجل

ايوة يا سيدي ما انت عايش بعيد ومش دريان بحاجة

ايه يا عم في ايه . اكيد هالة قالبة البيت ساحة حرب هههههههههههههههههه

انت بتضحك يا ممدوح . هالة اختك ماسكة ودن امك زي ابليس طول النهار

وعمالة تسلطها على مراتي الغلبانة وامك بتصدق اي حاجة بتسمعها وتبهدل مراتي

وفي الاخر طلعت مراتي هي اللي وحشة وغلطانة وهالة هي الحمل الوديع

لا حول ولا قوة الا بالله . انا مش عارف نعمل ايه مع البني ادمة دي .

دي حتى ايناس مراتي نفسها تيجي تزور مراتك وخايفة من هالة

قولي طيب هنتصرف ازاي

مافيش حل غير انها تعتذر لجوزها وترجع بيتها . لازم الشدة معاها المرة دي

طيب هتيجي امتى

بكرة ان شاء الله بعد الشغل

بقولك ايه يا هالة انتي لازم تعتذري لجوزك . انتي اهنتي الراجل وغلطتي في حقه وده مش اخلاق ستات محترمة

مش هعتذر يا ممدوح ومالكش دعوة انت

احترمي نفسك وانتي بتتكلمي مع اخوكي الكبير

وانت كمان يا فتحي ما تتحشرش

اما انك وقحة وقليلة الادب فعلا

تعالي ياماما شوفوا البهوات ولادك عاملين رجالة علية

بس يابت اخرسي اخواتك رجالة غصب عنك وكلامهم سيف على رقبتك .

ايه يابت انتي مالكيش كبير ولا ايه . عايزة تطلقي وتقعدي جنبي ؟

كدة يا ماما برضو

ايوة كدة واتفضلي لمي هدومك وخدي ولادك واخوكي هيوصلك بيتك بلا قلة ادب وكلام فاضي

ماشي يا ماما اهئ اهئ اهئئئئئئئئئئئئئئئئئئئئئئئئئئئئئئئئئئئئئئئئ

.
.
.
.
يااااااااااااااااااااااااااااااااااااااااااااااااااااااااااااااااااااااااااااااااه غمة وانزاحت

الحمدلله يا حبيبي . بصراحة كان البيت لا يحتمل

معلش يا مروة انتي اتحملتي كتير الفترة اللي فاتت

كله يهون عشان خاطر عيونك . انت فاضي امتى توديني

عند ماما عشان وحشتني اوي هي وبابا واخواتي

ان شاء الله الجمعة باليل بعد ما اخواتي يمشوا نبقى نعدي عليهم

خلاص ان شاء الله

طيب روحي راضي امي بكلمتين عشان زعلانة

هي برضو اللي زعلانة يا فتحي . انت ماشوفتش هي عملت فيا ايه

يا حبيبتي دي ست …

ماتكملش يا فتحي انا حفظت كلامك كله . دي ست كبيرة ولازم نراضيها .

حاضر يا حبيبي . حتى ولو على حساب كرامتي

هو انتي لما تراضي امي يبقى على حساب كرامتك

يا فتحي انا اللي اعرفه ان اللي يغلط يعتذر . لكن انا في البيت ده

بيتغلط في حقي واتبهدل وبرضو بعتذر

 

عارفة ليه يا حبيبتي

ليه يا حبيبي

عشان انتي اطيب وارق مخلوقة في الدنيا

ايوة يا سيدي اضحك عليا بكلمتين حلوين من بتوعك

انتي احلى حاجة في حياتي يا مروة

خلاص يا حبيبي عشان خاطر غلاوتك في قلبي هروح اراضيها بكلمتين

ربنا يخليكي يا اعقل زوجة في الوجود

مساء الخير يا ماما

اطلعي برا اوضتي يابت

انا جاية ابوس راسك واعتذرلك عشان زعلتك

ايوة يختي تغلطي وتقومي البيت حريقة وفي الاخر تعتذري

معلش يا ماما سامحيني مش هعمل كدة تاني

هسامحك بس عشان خاطر فتحي ابني حبيبي ونور عيني

ربنا يخليهولك يا ماما وتعيشي وتنوري حياتنا . عايزة حاجة قبل ما انام ؟

ايوة . اعمليلي كوباية ينسون عشان صوتي باظ من كتر الزعيق بسببك وسبب عمايلك

من عيوني يا ماما . احلى كوباية ينسون هتكون عندك

اعمل ايه . هو انا موديني في داهية الاطيبة قلبي مع مرتات ولادي . بس اللي يقدر حنان الحما

 


مروة

نعم يا حبيبي

تلات مجات نيسكافيه حلوين من ايديكِ الحلوة وتعالي

نقعد في البلاكونة مع امي نتونس معاها شوية

 

من عيوني يا حبيبي حاضر

ازيك يا ست الحبايب

اهلا يا فتحي يا حبيبي اقعد شوية في الهوا جنب امك

ما انا جاي فعلا اقعد معاكِ

ايه الرضا ده كله يا سي فتحي

رضا ايه بس يا امي . دانا اللي عايز رضاكِ يا غالية

راضية عليك يا حبيبي من كل قلبي يا مراضيني

ربنا يخليكِ يا امي وتفضلي راضية كدة على طول

الجو حلو اوي النهاردة وفيه نسمة حلوة

مابلاش سيرة نسمة دي هههههههههههههه

اه والله فكرتني بسهير اختي ونسمة بنتها دول جايين بكرة يتغدوا عندنا

امي ما تخليش حد يضايق مروة

ايه اللي جاب سيرة مروة دلوقتي

يعني انا مش عايز خالتي ولا نسمة يقولوها حاجة تضايقها وانتي عارفة اسلوبهم

ماله اسلوبهم . طب دي سهير طيبة الدنيا فيها ونسمة دي اسم على مسمى

ربنا يستر

السلام عليكم

وعليكم السلام

عملتلكو نيسكافيه اتفضلوا

ايه ده هي الكوباية التاتة دي بتاعة مين

بتاعتي انا يا ماما

هو انتي هتقعدي معانا زيك زينا كدة تشربي نيسكافيه

ده بعد اذنك يا ماما يعني

يابنتي حرام عليكي علبة النيسكافيه ما بتكملش اسبوع . وفري شوية يمكن يجيلنا ضيوف ولا حاجة

اوفر ازاي يعني

يعني تعمليلي انا وفتحي وانتي لأ ولما تروحي عند امك ابقي اشربي عندها

حاضر هبقى اشرب عند امي

يعني يا امي هي جت على كوباية مروة ههههههههههههه

بوفرلك يا حبيبي انا قلبي عليك

قلبك فيه الخير يا ست الحبايب

على فكرة يا ماما ماما بتسلم عليكي هي وبابا

الله يسلمهم من كل وحش ناس كويسين مع اني ما ارتاحتلهومش لما شوفتهم

اول مرة وخصوصا امك القنعورة دي

 

يا امي يا امي

ايه ياواد

غريبة مع ان ماما حبيتك خالص من اول ماشافتك وعلى طول هي وبابا يوصوني عليكي

ناس ولاد اصول ونعم النسب . هي امك اسمها ايه صحيح

ماما اسمها راضية

يوه . ابوكي اسمه صابر وامك اسمها راضية ! لا حول ولا قوة الا بالله .

هما اتجوزوا بعض غصب عنهم ولا ايه

 

تعرفي يا ماما القعدة معاكي جميلة اوي وما يتشبعش منها

ما انا عارفة

 

شوفتي يا امي مروة بتحبك ازاي

لازم تحبني مش مدياها راجل زي الفل لو لفت الدنيا ما تلاقيش ضفره

طبعا ياماما عندك حق والله

قومي يابت كفاية كدة انتي هتصاحبيني ولا ايه . روحي كملي شغل البيت اللي وراكي

حاضر يا ماما
.
.
.
.
تررررررررررررررررررررررررررن تررررررررررررررررررررررررن

شوفي مين بيرن جرس الباب يا مروة . دي باين سهير اختي جت هي وبنتها

حاضر يا ماما

روحي يا بت قولي لستك مديحة سهير هانم وبنتها الامورة نسمة هانم اتنازلوا وجم عشان يشرفوكوا

ايه ده ايه ده هي مين دي اللي بت يا ست انتي

هو مش انتي الشغالة برضو

لا وانتي الصادقة ان ست البيت ده

ست البيت ده اختي مديحة

وانا مرات ابنها ومتهيألي حضرتك عرفاني كويس واتقابلنا في الفرح

مش فاكرة

مش مهم . اتفضلوا في الصالون على ما اندهلكو حماتي

اهلا اهلا اهلا سهير اختي حبيبتي

ازيك يا مديحة

ازيك انتي يختي . عاملة ايه يا نسمة يا حبيبتي

الحمدلله يا خالتي . على فكرة اسمها ايه مرات فتحي دي

قابلتنا مقابلة وحشة اوي وكان ناقص تطردنا وما تدخلناش

ايوة حصل يا مديحة يختي بس انا مش راضية اقولك

ايه ايه ايه . وقعتها سودة انا رايحالها اطين عيشيتها

ربنا يوفقك يا اختي

جرا ايه يا ست مروة . مالك ومال اختي وبنت اختي

في ايه يا ماما

بيشتكوا منك مر الشكوى وبيقولوا انك قابلتيهم وحش .

والله ما حصل دول هما اللي كلموني بطريقة وحشة وكمان

نسمة عمالة تبصلي من فوق لتحت بكل كره

 

بقولك ايه يا مروة لو عايزة تعيشي معايا تحطي

لسانك جوا بقك وتشيلي جزم ضيوفي على دماغك

 

يا ماما لو سمحتي احترمي شعوري

شعورك ايه يا عديمة الشعور يا قرعة انتي .

انتي في البيت ده تقولي حاضر وطيب وما تناقشنيش

حاضر يا ماما حاضر

روحي حطي الاكل ع السفرا خلي الناس تاكل

ثواني والأكل هيكون ع السفرا

تررررررررررررررن تررررررررررررررررررررن

الو ايوة يا فتحي

ايه ده ايه الرد الناشف ده . مافيش كلمة يا حبيبي حتى

معلش يا فتحي اصل انا مخنوقة

في ايه يا حبيبتي . حد زعلك


الست خالتك وبنتها بيعاملوني على اني شغالة واللي اسمها زوبعة دي

عمالة تبصلي من فوق لتحت بطريقة مستفزة

 

هههههههههههههههههههههههه

انت بتضحك يا فتحي عشان تغيظني اكتر

يا حبيبتي ما هما لازم يعملوا كدة . هو انا ماقولتلكيش ان

نسمة كان نفسها ومنى عينها تتجوزني

ايوة ايوة بقى كدة . وطبعا كانت مامتك موافقة هي كمان

طبعا وزعلت معايا جدا لما رفضت اتجوز نسمة وفضلتك عليها

وعشان كدة مامتك مش طيقاني

لا يا حبيبتي ده موضوع وراح لحاله

بالنسبة لك يا سي فتحي . لكن بالنسبة لنسمة وامها لأ

والله يا مروة هما حرين

يعني ايه حرين

هو احنا هنحاكم الناس على مشاعرها

لأ يا سيدي مش حكاية مشاعر دول جايين يخططوا على تقيل وعايزين يرجعوك ليهم بأي طريقة

يا حبيبتي دماغك راحت لبعيد اوي

على العموم كويس اوي انك عرفتني عشان اوقف كل واحد عند حده ونسمة

دي بقى سبهالي خالص وانا هتصرف معاها مع السلامة دلوقتي

 

ايه يا مروة استني نكمل كلامنا

بعدين بعدين يا حبيبي ورايا مهمة صعبة هنفذها واكلمك سلام

الله يسلمك . مروة مراتي اتجننت . الله يسامحك يا امي انتي وخالتي

.
.
.
.
منورين جماعة . نورتي يا طنط سوسو نورتي يا نسومة يا امورة

منورين غصب عنك

معلش يا نسومة ما اتغدتش معاكو اصل انا بستنى فتحي حبيبي عشان نتغدا

سوا مابعرفش اكل من غيره وهو كمان يا روح قلبي يقعد من غير اكل لحد ما

يرجع البيت عشان ياكل معايا

اوووووف

مالك يا حبيبتي حرانة ولا ايه اشغلك التكيف قبل ما تولعي ؟

مالها البت دي عمالة تتني وتتفرد علينا كدة وماحدش مالي عينها يا مديحة

مش عارفة يختي ايه اللي جرالها دي كانت زي القطة المغمضة

اتفضلي شيكولاتة يا طنط سوسو

ما بحبهاش يا روح طنط سوسو

ولا انتي يا نسومة بتحبيها ؟

ما بحبش حاجة خالص

اصل النوع ده دايما فتحي يجيبهولي عشان بموت فيه . عمره ما اخرلي طلب ربنا يخليهولي

اوووووووووووووووووووووووووووف يا ماما يلا نمشي من هنا انا هطق

هههههههههههههههههههههههههههههههه

سلامتك يا ضنايا هتموتولي البت اللي حيلتي حرام عليكو

اجيبلك كوباية لمون تروق دمك يا نسومة

مش عايزة منك حاجة

على راحتك يا حلوة

وانتي بقى مش ناوية تتجوزي عشان نفرح بيكي ولا ايه

انا مابفكرش في الجواز خالص
ههههههههههههههه كل البنات بيقولوا كدة لما يتزنقوا

لأ يا حبيبتي انا بنتي عرسانها كتير فعلا بس انا مش راضية افرط فيها

على راحتك يا طنط سوسو

مش كفاية كدة يا ماما ولا مستنية نتهزأ أكتر من كدة

كفاية اوي يابنتي . قال وبيقولوا مرات فتحي طيبة وكنت فاكرة ان احنا اللي هنحرق دمها

لأ يا ست ماما هي اللي حرقت دمنا

يلا يابنتي نمشي

استني بس يا سهير

يختي بقى بلا سهير بلا نيلة جاتكو الارف انت وابنك ومرات ابنك

هههههههههههههههههههه ابقي تعالي يا طنط سوسو انتي ونسومة عشان نقوم معاكو بالواجب
.
.
.
.
ايه ده هي خالتي ونسمة مشيوا ولا ايه ؟

اسأل مراتك يا عين امك

عملت ايه مراتي بس

 

قعدت تتدلع وتتمرئع في كلامها مع الناس وتغيظ في نسمة الغلبانة

وخليتهم يقوموا يجروا زي اللي قرصهم تعبان


ههههههههههههههههههه يخرب عقلك يا مروة

ايوة اضحك اوي . ادي الست مراتك قطعتنا من الحبايب والقرايب وماحدش

هيزورنا تاني بسببها وهنقعد زي القرود في الجبلاية نطنطط لوحدينا

يا امي خليكي منصفة مرة واحدة مع مروة

انا لو اطول اقوم انصفها نصفين وارمي كل نصف في بلد مش هتأخر

انتي عارفة ان خالتي ونسمة ما بيطقوش مروة

وانا مع اختي وبنت اختي

على العموم هي دافعت عن نفسها وعن بيتها واديكو عرفتوا ان

عندها مخالب وانياب وتقدر تاخد حقها

 

عندها مخالب وانياب ! ايه يابني هو انت متجوز ملك الغابة . جايب واحدة ترعب

امك وتثير الزعر في المنطقة . بقى دا جزاء امك يا فتحي

يا امي هي عارفة ان انتي خط احمر وماتقدرش تقرب منك ولو بكلمة

اعتبر ده وعد يا ضنايا ؟ انا في حمايتك يا فتحي يابني

ماتخافيش يا امي ربنا معانا
.
.
.
.

ونكمل في الحلقة الحادية عشر بإذن الله
.
إلى اللقاء في الحلقة الحادية عشر

.
.
.
بقلم الكاتبة هبة نور

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى