مسلسل “الحب فى زمن الـــ لا حب” الحلقة الرابعة عشر

الحلقة الرابعة عشر

فالنادى كلهم كانو قاعدين والجو كان كله توتر وقلق

هاله : ايه العكننه اللى انتم فيها دى ………….انا هسمعكم حاجه تفرفشكم شويه

نور : ياريت ياهاله

هاله طلعت الموبيل بتاعها وشغلت حاجه وعلت الصوت وحاطتها فى وسط التربيزه

وبداءو يسمعو

………: كريم انت بتحبنى

كريم : طبعا يا هاله انا محبتشى حد غيرك

كريم بص لهاله زهو مصدوم من اللى بيسمعه وهاله ونور على وشهم ابتسامة نصر

هاله : بس انا سمعت انك مرتبط بساره وكمان فى غيرها كتير

كريم : انا عمرى ما حبيت ساره هى اللى بتجرى ورايا حتى مش عامله احترام لعلى صديق عمرى

هاله : بجد يا كريم ………يعنى انت عمرك ما حبتها

كريم : لا طبعا انا قلبى منفتحشى غير ليكى بس انتى ….انا صحيح عرفت بنات كتير بس كنت لما بقرب منهم واكتشف حقيقتهم كانت بحس انهم حد تانى غريب عنى ………. انا بحبك انتى ومحبتشى اى حد تانى غيرك

هاله بدلع : وانا كمان

خلص التسجيل والكل قاعد ساكت وساره كانت متجمده من الصدمه بس بعد لحظات الجمود فك وبداءت تعيط بانهيار نور ومريم قربو عليها واخدوها فحضنهم

نور : بس يا ساره اهدى

مريم : قومى يا ساره قومى عشان نروح

وبصو لكريم باستحقار ومشو

كريم بعصبيه : ممكن افهم ايه اللى انتى عملتيه ده

هاله بانتصار : بص يا كريم انت انسان مغرور وكان لازم حد يديك على دماغك عشان تفوق وتعرف انت قد ايه حقير ولا انت كنت فاهم ان كل البنات هيضحك عليهم وهيدخل عليهم الاسطوانه المشروخه بتاعك دى …………..لا فوق انت اصلا احقر مما تتخيل والوش الطيب اللى رسمه على وشك ده انا خلاص كشفته واعمل حسابك انا لو شوفتك واقف مع اى بنت هسمعها التسجيل ده ولو قربت من ساره او اصحبها تانى انا هوديك فداهيه انت بجد انسان مقرف اوى

مشت هاله بعد ما حست براحه وانها اخيرا خلصت من كريم وعرفته مقامه وكسرت غروره وعرفت ساره حقيقته اللى كانت مخدوعه فيها

 

………………………………………………………………………….

 

وتعدى ايام واسابيع وشهور ومفيش جديد ساره بقت على طول حزينه وبتقعد لوحدها كتير وفقدت الثقه فكل الناس نور ومريم كانو بيحاولو يخرجوها من الحاله دى ويرجعوها لطبيعتها بس فشلو

 

وتعدى الايام وينجحو البنات ونور تطلع الاولى وتبداء السنه الجديده ويبقى البنات فى سنه 3 جامعه

 

وفى يوم مريم بتكلم نور

مريم : حبيبى وحشتينى فينك بقالك يومين يا بت

نور: معلشى يا مريوم كنت بروق الشقه مع ماما ومهدوده معاها فالبيت

مريم : طيب بقولك عاوزاكى تجيلى انهارده وهكلم ساره هى كمان

نور : ليه خير فى ايه صوتك مش طبيعيى

مريم : بلاش رغى بقى كتير هتعرفى بليل ……………سلام دلوقتى

نور : اوكى ……..سلام يا لسعه

 

وبليل

نور : ها ياستى قولى بقى فى ايه

مريم : اتحايلى عليه شويه

ساره : انتى يا زفته قولى بقى مضايقنيش

مريم : خلاص هقول ايه ده الوحد ميعرفشى يغلس شويه

نور : هتقولى ولا اقوم اضربك وتعرفى الغلاسه على اصولها

مريم بابتسامه : انا جايلى عريس

ساره ونور بفرحه : بجـــــــــــــــــــــــد

نور: طيب ياله قولى يعرفك منين وبيشتغل ايه

ساره : امور ولا لاء …………طب عنده كام سنه

نور : شوفتيه ولا لسه ودارس ايه ؟؟؟؟؟؟

مريم : ايه ماتهدو شويه وانا هقولكم ……… ايه الرغى ده

ساره : طيب قولى واحنا هنسكوت اهوه

مريم : بصو بقى هو يبقى ابن شريك بابا عايش فى دبى مع باباه وعيلته وبيشتغل ما بابا وباباه فى الشركه عنده 28 سنه واسمه خالد

نور : شوفتيه قبل كده؟؟

مريم : اه لما كنت بروح لبابا فالاجازه كنا ساعات بتقابل بس عمرى ماتكلمت معاه ولا هو كلمنى

ساره : طيب تمام حلو اوى ……….مبروك يا مريوما

نور : استنى يا بنتى مبروك ايه ……….يعنى انتى مرتاحه وموافقه يامريم

مريم : انا لسه مش عارفه ولا حتى اعرفه ولا اتكلمت معاه …….. بس انا بصراحه مبسوطه هو ماديا كويس وبابا وماما بيقولو عليه محترم وكويس وطايرين بيه

نور : يابنتى مش كل حاجه فلوس ………..المهم انك تقتنعى بيه وبشخصيته

مريم : مش عارفه بقى هو المفروض هينزل مصر الاسبوع اللى جاى وهيجلنا هنا نتكلم مع بعض ولو وافقت بابا هينزل وعيلته ونعمل الخطوبه ونتخطب ونتجوز الاجازه اللى جايه

نور باستغراب : استنى ………يعنى تتجوز قبل متخلصى الكليه

ساره : وايه المشكله ؟؟

نور: ازاى يعنى ………..طيب هى هتبقى مركزه فالدراسه ولا فالجواز يابنتى الجواز مسؤليه كبيره

مريم : مهو اصلا مش هيبقى هنا احنا هنتجوز وهيسافر وانا هفضل هنا مع ماما عشان الكليه وهو هينزل كل فتره لما يعرف ياخد اجازه

نور : ياسلام وده بقى اسمه جواز ……… الجواز استقرار واتنين يعيشو مع بعض مش كل واحد فى ناحيه

مريم : طيب وايه المشكله مهو بابا وماما طول عمرهم بعاد عن بعض وكل واحد فيهم فى بلد

نور : مش عارفه مش مقتنعه

ساره : مبلاش غلاسه بقى وسيبى البت تفرح واحنا كمان نفرح معاها كفايه الهم والحزن اللى احنا فيه

نور بابتسامه : ربنا يقدملك الخير يامريوما ويسعدك يارب

مريم : ربنا يسعدنا كلنا ونفضل اخوات واصحاب طول العمر

نور وساره : اميـــــــــــــن يااارب

 

وفات الاسبوع وجه ميعاد المقابله بين مريم وخالد كانت مخضوضه وقلقانه اوى وكانت بتكلم نور وهى فى اوضاتها

نور : يابنتى اهدى شويه هو هياكلك

مريم : مش عارفه يانور بطنى بتوجعنى وحسه ان قلبى هيقف من كتر الدق

———–———-———————-————

ونكمل في الحلقة الخامسة عشر .. الى اللقاء في الحلقة الخامسة عشر

بقلم الكاتبة :ريم أحمد

 

مقالات ذات صله